ព័ត៌មានអន្ដរជាតិ

UN ព្រួយបារម្ភខ្លាំង ខណៈរោងចក្រនុយក្លេអ៊ែរអ៊ុយក្រែន រងការបាញ់ផ្លោងជាថ្មី

បានផុស

២ years មុន

នៅ

ថ្ងៃសុក្រ ១២ សីហា ២០២២

ដោយ

មានសេចក្តីរាយការណ៍អំពីការបាញ់ផ្លោងកាន់តែច្រើនលើរោងចក្រថាមពលនុយក្លេអ៊ែរ Zaporizhzhia របស់ប្រទេសអ៊ុយក្រែន ខណៈទីក្រុងកៀវ និងមូស្គូ បានស្តីបន្ទោសគ្នាទៅវិញទៅមកចំពោះការវាយប្រហារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីនីមួយៗបាននិយាយថា មានការវាយប្រហារចំនួន១០លើក លើការិយាល័យ និងស្ថានីយ៍ពន្លត់អគ្គិភ័យនៃរោងចក្រថាមពលដ៏ធំបំផុតរបស់អឺរ៉ុប កាលពីថ្ងៃព្រហស្បតិ៍ទី១១ខែសីហា។

ស្របពេលជាមួយគ្នានោះ ក្រុមប្រឹក្សាសន្តិសុខអង្គការសហប្រជាជាតិ កំពុងប្រជុំដើម្បីពិភាក្សាអំពីស្ថានភាពនេះ ខណៈប្រធានអង្គការឃ្លាំមើលនុយក្លេអ៊ែររបស់ខ្លួន គឺលោក Rafael Grossi បានព្រមានថា វាជាពេលវេលាដ៏លំបាកបំផុត។

ប្រធានអង្គការឃ្លាំមើលនុយក្លេអ៊ែរ លោក Rafael Grossi

ចំណែក អគ្គលេខាធិការអង្គការសហប្រជាជាតិ លោក Antonio Guterres ក៏បាននិយាយផងដែរថា វាអាចនាំទៅរកគ្រោះមហន្តរាយ។

អ៊ុយក្រែនបានព្រមានថា រុស្ស៊ីអាចនឹងបង្កឧបទ្ទវហេតុនុយក្លេអ៊ែរដ៏អាក្រក់បំផុតដល់ពិភពលោក នៅរោងចក្រដែលត្រូវរុស្សីរឹបអូសបានកាលពីដើមខែមីនា។

ទន្ទឹមនឹងនោះ សហរដ្ឋអាមេរិក បានអំពាវនាវឲ្យបង្កើតតំបន់គ្មានយោធា នៅជុំវិញរោងចក្រនេះ ហើយអ្នកនាំពាក្យក្រសួងការបរទេសបាននិយាយថា “ការប្រយុទ្ធនៅក្បែររោងចក្រនុយក្លេអ៊ែរគឺមានគ្រោះថ្នាក់ និងគ្មានការទទួលខុសត្រូវទាល់តែសោះ”។

ទីតាំង និងតំបន់ជុំវិញរោងចក្រ នៅកណ្តាលឆៀងខាងកើតប្រទេសអ៊ុយក្រែន បានជួបប្រទះការបាញ់ផ្លោងកាលពីសប្តាហ៍មុន ដោយរុស្ស៊ី និងអ៊ុយក្រែនក៏បានចោទប្រកាន់គ្នាទៅវិញទៅមកផងដែរ ចំពោះការវាយប្រហារនោះ។

អ៊ុយក្រែននិយាយថា រុស្ស៊ីបានប្រែក្លាយទីតាំងនេះទៅជាមូលដ្ឋានយោធា ដោយបើកការវាយប្រហារពីទីនោះ ព្រោះដឹងថា កងកម្លាំងអ៊ុយក្រែនទំនងជាមិនអាចសងសឹកបាន៕

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ុយក្រែន អះអាងថា ខ្លួនជាអ្នកវាយប្រហារមូលដ្ឋានកងទ័ពរុស្ស៊ី នៅ Crimea