កូរ៉េខាងត្បូង ឲ្យ ជប៉ុន សម្រេចចិត្តផ្នែកនយោបាយលើបញ្ហាសំណងពលកម្មក្នុងសម័យសង្គ្រាម

ក្នុងជំនួបនៅខាងក្រៅសន្និសីទសន្តិសុខនាទីក្រុង​ Munich ប្រទេសអាល្លឺម៉ង់, រដ្ឋមន្ត្រីការបរទេសកូរ៉េខាងត្បូងលោក Park Jin ជំរុញឲ្យភាគីជប៉ុនធ្វើការសម្រេចចិត្តផ្នែកនយោបាយលើបញ្ហាសំណងពលកម្មដោយបង្ខំក្នុងសម័យសង្គ្រាម ។

លោក Park និយាយថា បញ្ហាសំខាន់ៗទាំងអស់​ត្រូវបានលើកយកមកពិភាក្សា ហើយឥឡូវនេះកំពុងត្រូវការការប្តេជ្ញាចិត្តផ្នែកនយោបាយពីសំណាក់ភាគីជប៉ុន ។

ជាមួយបញ្ហានេះ កូរ៉េខាងត្បូង និងជប៉ុនក៏បានធ្វើការរួមគ្នាអស់ជាច្រើនទសវត្សមកហើយ​ក្នុងការស្វែងរកដំណោះស្រាយ ។ នៅក្នុងឆ្នាំ ២០១៩ តុលាការកំពូលរបស់កូរ៉េ បានសម្រេចឲ្យក្រុមហ៊ុនជប៉ុន Mitsubishi Heavy Industries និង Nippon Steel គួរបង់ប្រាក់សំណងដល់ជនរងគ្រោះកូរ៉េខាងត្បូងដែលនៅរស់រានមានជីវិតពីការបង្ខំឲ្យធ្វើការក្នុងសម័យសង្គ្រាម ។

ទោះជាយ៉ាងណាក៏ដោយ ជប៉ុនអះអាងថា សំណងទាំងអស់ដែលបានមកពីការកាន់កាប់ប្រទេសកូរ៉េឆ្នាំ ១៩១០ ដល់ ១៩៤៥ ត្រូវបានដោះស្រាយក្រោមសន្ធិសញ្ញាឆ្នាំ ១៩៦៥ ដែលធ្វើឲ្យទំនាក់ទំនងរវាងប្រទេសទាំងពីរមានលក្ខណៈធម្មតាវិញហើយ ។

បន្ថែមពីនេះ កូរ៉េខាងត្បូងក៏ស្នើឲ្យបង្កើត​មូលនិធិដើម្បីជួយជនរងគ្រោះកំលាំងពលកម្ម ប៉ុន្តែជប៉ុនមិនមានឆន្ទៈក្នុងការចូលរួមក្នុងមូលនិធិនេះនោះទេ ដោយលើកឡើងថា បើសិនជាបរិច្ចាក គឺប្រៀបបានដូចជា ការទទួលយកការកាត់ក្តីរបស់តុលាការកំពូលកូរ៉េខាងត្បូង ។

ដោយឡែក បន្ថែមពីលើបញ្ហាកម្លាំងពលកម្មដោយបង្ខំក្នុងសម័យសង្រ្គាម អ្នកការទូតកំពូលទាំងពីរក៏ពិភាក្សាអំពីការគំរាមកំហែងសន្តិសុខដែលបង្កឡើងដោយកូរ៉េខាងជើងផងដែរ ខណៈប្រទេសនេះបានបាញ់មីស៊ីលផ្លោងអន្តរទ្វីប (ICBM) មួយទៀត មុនពេលកិច្ចប្រជុំនៅថ្ងៃសៅរ៍នេះ ៕

ប្រែសម្រួលដោយ ៖ នាង រតនៈ

ប្រភព ៖ The Korea Times

ចុចអាន ៖ អ៊ុយក្រែន ថា រុស្ស៊ី នឹងបាញ់ស្រោចមីស៊ីលខ្នាតធំនៅថ្ងៃខួប ១ ឆ្នាំនៃប្រតិបត្តិ ការសឹក