ប្រជាជនជប៉ុនកំពុងរៀនញញឹមឡើងវិញ ក្រោយទម្លាប់ពាក់ម៉ាសយ៉ាងយូរ

ប្រជាជននៅប្រទេសជប៉ុនដែលស៊ាំនឹងការពាក់ម៉ាសអំឡុងពេលបិទខ្ទប់ នាំគ្នាចុះឈ្មោះចូលរៀនញញឹមម្ដងទៀត ។ ការពាក់ម៉ាសបានគ្របដណ្ដប់លើមនុស្សជុំវិញពិភពលោកតាំងពីមុនកូវីដ-១៩ ដើម្បីទប់ស្កាត់ការរីករាលដាល រហូតដល់ពេលរដ្ឋាភិបាលដាក់កំហិតឲ្យពាក់ម៉ាសជាដាច់ខាត ធ្វើឲ្យសន្ទុះអ្នកប្រើប្រាស់កាន់តែកើនឡើងច្រើនថែមទៀត ។

មនុស្សស្ទើរទាំងអស់បានចេញក្រៅដោយពាក់ម៉ាសជាប់រហូតក្លាយជាទម្លាប់ពិភពលោកទៅហើយ ទោះបីរដ្ឋាភិបាលអនុញ្ញាតឲ្យដោះម៉ាសក៏ពួកគេនៅតែមានទម្លាប់រស់នៅជាមួយវាដដែល ។

ទន្ទឹមនោះកញ្ញា Himawari Yoshida អាយុ ២០ ឆ្នាំ គឺជាមនុស្សម្នាក់ក្នុងចំណោមមនុស្សទាំងឡាយណាដែលមិនចេះរស់នៅដោយគ្មានម៉ាស “ខ្ញុំមិនសូវធ្វើចលនាសាច់ដុំមុខប៉ុន្មានទេអំឡុងពេលកូវីដ” នាងនិយាយ ។ ឥលូវ Himawari បានទទួលសេវាកម្មបង្រៀនញញឹមពីអ្នកគ្រូ Keiko Kawana ដើម្បីជួយនាងរៀបចំខ្លួនប្រឡូកក្នុងទីផ្សារការងារប្រទេសជប៉ុន ។

ដោយឡែក Egaoiku ជាក្រុមហ៊ុនអ្នកគ្រូ Keiko Kawana សង្កេតឃើញមានការកើនឡើងតម្រូវការ “មេរៀនញញឹម” ដល់ទៅបួនដងឯណោះ ចំណែកឯតម្លៃសម្រាប់មនុស្សម្នាក់គឺជិត ៥៥ ដុល្លារក្នុងមួយវគ្គ ។ អ្នកគ្រូ Keiko គិតថាមនុស្សគួរតែមានស្នាមញញឹមច្រើនជាងនេះ យោងតាមភ្ញៀវទេសចរដែលត្រឡប់មកកម្សាន្តនៅប្រទេសជប៉ុនទៀត ។

ការស្ទង់មតិដោយទូរទស្សន៍សាធារណៈ NHK ក្នុងខែឧសភា បង្ហាញថា ប្រជាជនជប៉ុន ៥៥ ភាគរយនៅតែពាក់ម៉ាសជាប់ដូចពេលរដ្ឋាភិបាលដាក់កំហិត និង ៨ ភាគរយប៉ុណ្ណោះដែលឈប់ពាក់ ៕

ប្រភព ៖ skynews

ចុចអាន ៖ កុំកំណាញ់! ឧស្សាហ៍ញញឹមផ្ដល់គុណប្រយោជន៍ច្រើនយ៉ាងណាស់ដល់អ្នក