ព័ត៌មានអន្ដរជាតិ

ជប៉ុន ចង់ដាក់មីស៊ីលចម្ងាយឆ្ងាយលើកោះ Kyushu តែកូរ៉េខាងជើងព្រមាន

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

Chheang

យោងតាមការចុះផ្សាយរបស់ទីភ្នាក់ងារព័ត៌មានរដ្ឋ KCNA នៅថ្ងៃព្រហស្បតិ៍ទី២០ខែមីនានេះ កូរ៉េខាងជើងបានចេញការព្រមានយ៉ាងម៉ឺងម៉ាត់ចំពោះប្រទេសជប៉ុន ទាក់ទងនឹងផែនការដាក់ពង្រាយមីស៊ីលរយៈចម្ងាយឆ្ងាយនៅលើកោះ Kyushu នាឆ្នាំ២០២៦ខាងមុខ ដោយសង្កត់ធ្ងន់ថា សកម្មភាពបែបនេះអាចបង្កើនភាពតានតឹងក្នុងតំបន់ និងបង្កឲ្យមានវិធានការតបតជាក់ជាមិនខាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់ពង្រាយដែលបានស្នើឡើង រួមបញ្ចូលប្រភេទមីស៊ីល Type-12 ដែលទើបធ្វើទំនើបកម្មរបស់ជប៉ុន អាចបាញ់ក្នុងរយៈចម្ងាយឆ្ងាយប្រមាណ ១ ០០០គីឡូម៉ែត្រឯណោះ។ បើជប៉ុនដាក់ពង្រាយមីស៊ីលរយៈចម្ងាយឆ្ងាយនេះនៅលើកោះ Kyushu មីស៊ីលទាំងនោះនឹងមានចម្ងាយគ្រប់គ្រាន់ ដើម្បីវាយប្រហារគោលដៅនៅក្នុងប្រទេសកូរ៉េខាងជើង និងផ្នែកខ្លះនៃតំបន់ឆ្នេររបស់ប្រទេសចិន។ នៅក្នុងបរិបទយោធា នេះអាចត្រូវបានគេមើលឃើញថាជាចលនាយុទ្ធសាស្ត្ររបស់ជប៉ុន ដើម្បីបង្កើនសមត្ថភាពការពារ និងការរារាំងរបស់ខ្លួន ប៉ុន្តែវាក៏បង្កើនការព្រួយបារម្ភសម្រាប់កូរ៉េខាងជើង និងចិន ដែលអាចចាត់ទុកវាជាការគំរាមកំហែងដោយផ្ទាល់ដល់សន្តិសុខរបស់ពួកគេ។

ការដាក់ពង្រាយនេះត្រូវបានគេរំពឹងថានឹងចាប់ផ្តើមនៅខែមីនាឆ្នាំក្រោយ ហើយមានគោលបំណងពង្រឹងសន្តិសុខនៃប្រជុំកោះ Nansei ដែលជាតំបន់មានសារៈសំខាន់ជាយុទ្ធសាស្ត្រ ដោយសារវានៅជិតកោះតៃវ៉ាន់។

សូមរឭកថា កាលពីខែកុម្ភៈកន្លងទៅ លោក គីម ជុងអ៊ុន មេដឹកនាំកូរ៉េខាងជើង បាននិយាយថា កិច្ចសហប្រតិបត្តិការយោធាត្រីភាគីរវាងសហរដ្ឋអាមេរិក ជប៉ុន និងកូរ៉េខាងត្បូង កំពុងបង្កើនភាពតានតឹងនៅក្នុងតំបន់ ហើយលោកបានប្ដេជ្ញាចាត់វិធានឆ្លើយតប ដោយរួមបញ្ចូលទាំងការបង្កើនការអភិវឌ្ឍនៃកងកម្លាំងនុយក្លេអ៊ែរ៕