ប៉ូលិស​ប៉ាគីស្ថាន​​ ចាប់បានអ្នកជួញដូរក្រលៀនមនុស្សជាង ៣០០ នាក់

ប៉ូលិសប៉ាគីស្ថានចាប់បានអ្នកជួញដូរក្រលៀន ៨ នាក់ ដែលធ្លាប់យកក្រលៀនរបស់មនុស្សជាង ៣០០ នាក់មកហើយ ។

មេរបស់ពួកគេមានឈ្មោះថា Fawad Mukhtar ដែលតែងតែលក់ក្រលៀនឲ្យអតិថិជនភាគច្រើនដែលជាអ្នកមាន ។ មែនទែនទៅ Fawad ធ្លាប់ត្រូវប៉ូលិសចាប់ខ្លួន ៥ ដងហើយ ប៉ុន្តែគាត់អាចធានាឲ្យនៅក្រៅឃុំរហូត ។

អាជ្ញាធរ​បាន​ឲ្យដឹង​ថា យ៉ាង​ហោច​ណាស់​មនុស្ស​ ៣ ​នាក់​បាន​ស្លាប់​ដោយសារ​ការ​វះយកគ្រឿងក្នុង ។

ក្រុមសង្គមងងឹតខាងលើតែងតែធ្វើប្រតិបត្តិការនៅទូទាំងខេត្ត Punjab ភាគខាងកើត ក៏ដូចជាតំបន់ Kashmir ដែលគ្រប់គ្រងដោយប៉ាគីស្ថានផងដែរ ។

ពួកគេចូលចិត្តលួងលោមអ្នកជំងឺឲ្យចេញពីមន្ទីរពេទ្យមកដើម្បីវះកាត់យកគ្រឿងក្នុងនៅកន្លែងឯកជន ខណៈក្រលៀនមួយអាចលក់បានដល់ទៅ ១២០ ០០០ ដុល្លារឯណោះ ។

តាមពិត ការលក់ដូរគ្រឿងក្នុងមនុស្សត្រូវបានហាមឃាត់នៅប្រទេសប៉ាគីស្ថានតាំងពីឆ្នាំ ២០១០ មកម្ល៉េះ ។ សម្រាប់អ្នកបំពានច្បាប់នឹងត្រូវកាត់ទោសឲ្យជាប់ពន្ធនាគារ ១០ ឆ្នាំ និងការផាកពិន័យជាទឹកប្រាក់មួយចំនួនធំ ៕

ប្រែសម្រួល៖ វារី

ប្រភព៖ BBC

ចុចអាន៖ ឃាត់ខ្លួនមនុស្ស ២ នាក់ ពាក់ព័ន្ធការជួញដូរក្រលៀននៅ ទីក្រុងហាណូយ