ព័ត៌មានអន្ដរជាតិ

យោធាប៉ាគីស្ថានបញ្ចប់ប្រតិបត្តិការរំដោះចំណាប់ខ្មាំងដោយសម្លាប់ក្រុមបំបែកខ្លួន៣៣នាក់និងចំណាប់ខ្មាំង២៧នាក់ក៏គ្រោះថ្នាក់ស្លាប់ដែរ

បានផុស

១ year មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

យ៉ាងហោចណាស់ចំណាប់ខ្មាំង៣៤៦ នាក់ត្រូវបានជួយសង្គ្រោះពីរថភ្លើងដឹកអ្នកដំណើរដែលត្រូវបានវាយប្រហារ និងចាប់ដោយក្រុមទាមទារបំបែកខ្លួននៅក្នុងខេត្ត Balochistan ភាគនិរតីប្រទេសប៉ាគីស្ថាន។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៣ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យយោធាប៉ាគីស្ថាន បាននិយាយថា ប្រតិបត្តិការជួយសង្គ្រោះបានបញ្ចប់កាលពីថ្ងៃពុធ ហើយក្រុមសកម្មប្រយុទ្ធវាយប្រហារទាំង៣៣នាក់ត្រូវបានសម្លាប់ ប៉ុន្តែយ៉ាងហោចណាស់ចំណាប់ខ្មាំង២៧នាក់ដែលជាអ្នកដំណើរ និងទាហានប៉ារ៉ាម្នាក់ត្រូវបានសម្លាប់ក្នុងអំឡុងពេលប្រយុទ្ធគ្នាក្នុងប្រតិបត្តិការរំដោះនោះ។

ក្រុមសកម្មប្រយុទ្ធរបស់កងទ័ពរំដោះ Balochistan (BLA) ដែលជាក្រុមបំបែកខ្លួនបានស្វែងរកឯករាជ្យពីប៉ាគីស្ថានបានអះអាងទទួលខុសត្រូវចំពោះការវាយប្រហារលើរថភ្លើង Jaffar Express កាលពីថ្ងៃអង្គារ និងចរចាដោះលែងអ្នកដំណើរ ប្រសិនបើអាជ្ញាធរយល់ព្រមដោះលែងអ្នកប្រយុទ្ធរបស់ខ្លួនដែលជាប់គុក។

រថភ្លើងដែលត្រូវបានវាយប្រហារនេះកំពុងធ្វើដំណើរពីតំបន់ Quetta ទីរួមខេត្ត Balochistan ទៅកាន់ទីក្រុង Peshawar នៃខេត្ត Khyber Pakhtunkhwa ភាគពាយ័ព្យ ដោយដឹកអ្នកដំណើរជាង៤០០នាក់និងកំពុងឆ្លងកាត់ផ្លូវរូងក្រោមដីនៅជិតទីក្រុង Sibi ប្រហែល ១៦០ គីឡូម៉ែត្រពី Quetta ។

គួរបញ្ជាក់ថាខេត្ តBalochistan បានប្រឈមនឹងការខ្វះខាតសន្តិសុខជាច្រើនទសវត្សរ៍មកហើយ។ តំបន់នេះជាជម្រករបស់ក្រុមប្រដាប់អាវុធជាច្រើន រួមទាំង BLA ផងដែរ។ ចាប់តាំងពីឆ្នាំ ២០០៦ក្រុមនេះត្រូវបានហាមប្រាមដោយប៉ាគីស្ថាន និងសហរដ្ឋអាមេរិក ដែលចាត់ទុកជាអង្គការ «ភេរវករ»៕