ជប៉ុន ជួបគ្រោះរញ្ជួយដីកម្រិត ៦.៦ រ៉ិចទ័រ និងកំពុងចេញការព្រមានពី​រលកយក្សស៊ូណាមិ

គ្រោះរញ្ជួយដីកម្រិត ៦.៦ រ៉ិចទ័របានវាយប្រហារកោះ Izu ក្បែរមហាសមុទ្រប៉ាស៊ីហ្វិករបស់ប្រទេសជប៉ុននៅថ្ងៃព្រហស្បតិ៍ ទី៥ ខែតុលានេះ ហើយក៏បានជំរុញឲ្យអាជ្ញាធរក្នុងតំបន់ជិតកោះរបស់ខេត្ត Shizuoka ចេញការព្រមានអំពីរលកយក្សស៊ូណាមិផងដែរ ។

មជ្ឈមណ្ឌលគ្រប់គ្រងគ្រោះរញ្ជួយដីអ៊ឺរ៉ុប និងមេឌីទែរ៉ាណេបានបង្ហាញថា ការរញ្ជួយដីបានវាយប្រហារនៅម៉ោងប្រហែល ១១ ព្រឹក នៅជិតកោះ Izu ក្នុងជម្រៅ ១០ គីឡូម៉ែត្រ ខណៈរយៈពេល ៤៧ នាទី ក្រោយការរញ្ជួយដីលើកទី ១ ក៏មានការរញ្ជួយដីមួយទៀតនៅកម្រិត ៥.៤ រ៉ិចទ័រ ។

ពាក់ព័ន្ធនឹងបញ្ហានេះដែរ ក្រុមអ្នកឧតុនិយមបាននិយាយថា រលកយក្សស៊ូណាមិ ត្រូវបានគេរំពឹងនឹងមានកម្ពស់រហូតដល់ ១ ម៉ែត្រ ខណៈរយៈកម្ពស់បែបនេះក៏អាចបង្កឲ្យមានផលប៉ះពាល់ទៅដល់អាយុជីវិតរបស់ពលរដ្ឋនៅក្នុងតំបន់នោះផងដែរ ។

ស្របពេលជាមួយគ្នានេះ ប្រជាពលរដ្ឋ​ក៏ត្រូវ​បាន​ជំរុញ​ឲ្យនៅ​ឆ្ងាយ​ពី​ច្រាំង​សមុទ្រ និង​ស្វែង​រកទីទួលសុវត្ថិភាពផងដែរ ​ដោយសារតែរលកទីមួយនៃរលកយក្សស៊ូណាមិ ត្រូវបានគេរំពឹងថា នឹងខិតមកជិតឆ្នេរសមុទ្រនៃកោះ Izu នៅពេលថ្ងៃត្រង់ថ្ងៃព្រហស្បតិ៍នេះ ។

គួរបញ្ជាក់ថា រហូតមកដល់ពេលនេះ មិនទាន់មានសេចក្ដីរាយកាណ៍ណាមួយបង្ហាញពីផលប៉ះពាល់ ក៏ដូចជាមនុស្សស្លាប់ ឬរងរបួសបណ្ដាលមកពីគ្រោះរញ្ជួយដីនេះនៅឡើយទេ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik / NHK

ចុចអាន ៖ តើមូលហេតុអ្វីខ្លះទើបប្រធានរដ្ឋសភា អាមេរិក ជ្រុះចេញពីតំណែង ហើយប៉ះ​ពាល់យ៉ាងណាដល់ អ៊ុយក្រែន?