តើមូលហេតុអ្វីខ្លះទើបប្រធានរដ្ឋសភា អាមេរិក ជ្រុះចេញពីតំណែង ហើយប៉ះ​ពាល់យ៉ាងណាដល់ អ៊ុយក្រែន?

ប្រធានរដ្ឋសភាអាមេរិកលោក Kevin McCarthy ត្រូវបានបណ្ដេញចេញពីតំណែងនៅពាក់កណ្ដាលអាណត្តិកាលពីថ្ងៃទី៣ ខែតុលា ជាមួយនឹងសំឡេងបោះឆ្នោត ២១៦ ទល់នឹង ២១០ ក្រោយការដាក់ញត្តិពីសំណាក់លោក Matt Gaetz ដែលជាអ្នកសាធារណរដ្ឋដូចគ្នាមកពីរដ្ឋផ្លរីដា ។

លោក Matt Gaetz បានដាក់ញត្តិមួយដើម្បីបោះឆ្នោតបណ្តេញលោក McCarthy កាលពីថ្ងៃចន្ទ ពោលគឺ ២ ថ្ងៃ បន្ទាប់ពីប្រធានរដ្ឋសភារូបនេះកៀរគរសមាជិកសភាបក្សសាធារណរដ្ឋឲ្យអនុម័តច្បាប់ផ្តល់មូលនិធិដល់រដ្ឋាភិបាលសហព័ន្ធអាមេរិកដើម្បីបញ្ចៀសការបិទ រហូតដល់ថ្ងៃទី១៧ ខែវិច្ឆិកា ។

នេះហើយគឺជាដើមចមដ៏ធំមួយសម្រាប់លោក McCarthy ធ្លាក់ចេញពីកៅអីប្រធានរដ្ឋសភា ព្រោះតែការខុសមាត់ខុស ក របស់លោកក្នុងការរក្សាពាក្យសម្ដីដែលធ្លាប់បានសន្យា នៅពេលឡើងកាន់តំណែងមួយនេះ ។ អំឡុងពេលនោះ លោកប្ដេជ្ញាធ្វើការឆ្ពោះទៅរកការកាត់បន្ថយថ្លៃចំណាយរបស់រដ្ឋាភិបាលសហព័ន្ធ ប៉ុន្តែអ្វីគ្រប់យ៉ាងគឺផ្ទុយស្រឡះពីចិត្តគំនិតរបស់អ្នកសាធារណរដ្ឋ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងការធ្លាក់ចេញពីកៅអីប្រធានរដ្ឋសភានេះទៀតសោត ខាងគណបក្សប្រជាធិបតេយ្យមួយចំនួនក៏កំពុងភ័យខ្លួនផងដែរ ដោយសារតែការបោះឆ្នោតដកតំណែងលោក McCarthy នឹងបណ្ដាលឲ្យមានការពន្យារពេលអនុម័តសេចក្តីព្រាងថវិកាដែលបានដាក់ជូនដោយរដ្ឋាភិបាលក្រោមការដឹកនាំរបស់ប្រធានាធិបតី Joe Biden ជាពិសេសវាអាចនឹងយឺតយ៉ាវក្នុងការផ្ដល់ប្រាក់កាក់ដល់អ៊ុយក្រែន ដែលកំពុងដង្ហើយហៅរកជំនួយពីរដ្ឋាភិបាលទីក្រុងវ៉ាស៊ីនតោន ។

ស្របពេលជាមួយគ្នានេះ ក្រោយលោក McCarthy អស់តំណែងហើយនោះ, លោក Patrick McHenry សមាជិកសភារបស់គណបក្សសាធារណរដ្ឋមកពីរដ្ឋ North Carolina ត្រូវបានប្រកាសឲ្យអង្គុយកៅអីជាប្រធានរដ្ឋសភាស្តីទី រហូតដល់មានការបោះឆ្នោតជ្រើសតាំងថ្មី ហើយនេះក៏ជាលើកដំបូងផងដែរក្នុងប្រវត្តិសាស្ត្រអាមេរិករយៈពេល ២៣៤ ឆ្នាំដែលមានការបោះឆ្នោតទម្លាក់ប្រធានរដ្ឋសភាបែបនេះ ។

គួរបញ្ជាក់ថា លោក McCarthy បានជាប់ឆ្នោតជាប្រធានរដ្ឋសភាកាលពីថ្ងៃទី១៥ ខែមករា បើទោះបីជាមានការប៉ុនប៉ងរារាំងពីសំណាក់គណបក្សសាធារណរដ្ឋក៏ដោយ ។ ទោះយ៉ាងណា បុរសវ័យ ៥៨ ឆ្នាំកាន់តំណែងរដ្ឋសភាបានត្រឹមតែរយៈពេល ២៦៩ ថ្ងៃប៉ុណ្ណោះ ហើយក៏ជាអាណត្តិដ៏ខ្លីបំផុតទី ២ ក្នុងប្រវត្តិសាស្ត្រអាមេរិកផងដែរ ក្រោយលោក Michael C. Kerr កាន់តំណែងមួយនេះបានរយៈពេល ២៥៧ ថ្ងៃ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក McCarthy ថ្លែងបែបណាខ្លះ ក្រោយអស់តំណែងជាប្រធានរដ្ឋសភា អាមេរិក