ទីភ្នាក់ងារ UN ថា ប្រេងឥន្ធនៈនៅតំបន់ហ្គាហ្សាអាចប្រើបានតែ ៣ ថ្ងៃទៀត​ប៉ុណ្ណោះ

ទីភ្នាក់ងារជំនួយ និងកិច្ចការរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បានប្រកាសកាលពីថ្ងៃអាទិត្យថា នឹងអស់ប្រេងឥន្ធនៈសម្រាប់ជួយទៅដល់តំបន់ហ្គាហ្សាស្ទ្រីបក្នុងរយៈពេល ៣ ថ្ងៃទៀត ។

លោក Philippe Lazzarini អគ្គស្នងការនៃទីភ្នាក់ងារអង្គការសហប្រជាជាតិ បាននិយាយនៅក្នុងសេចក្តីថ្លែងការណ៍ជាលាយលក្ខណ៍អក្សរមួយថា “បើ​គ្មាន​ប្រេង​ទេ នោះក៏មិនមាន​ទឹក ​មន្ទីរពេទ្យ និង​ហាង​ធ្វើនំប៉័ងដែរ ​។ បើគ្មានប្រេងឥន្ធនៈនោះទេ ជំនួយផ្សេងៗនឹងមិនអាចទៅដល់ជនស៊ីវិលជាច្រើននាក់ដែលកំពុងត្រូវការជាចាំបាច់នោះទេ” ។

លោក​បាន​និយាយ​ទៀត​ថា បើមិនមានប្រេងឥន្ធនៈទេនោះ វាប្រៀបដូចជាច្របាច់ ក ប្រជាជននៅតំបន់ហ្គាហ្សា ជាពិសេសជំនួយទាំងនោះមិនបានទៅដល់ដៃប្រជាជនដែលត្រូវការនោះទេ ដូច្នេះយើងមិនអាចឲ្យរឿងនេះកើតមានឡើងឡើយ” ។

លោកបានបន្ថែមថា “ខ្ញុំសូមអំពាវនាវដល់ភាគីទាំងអស់ និងអ្នកដែលមានឥទ្ធិពលលើពួកគេ គួរតែអនុញ្ញាតឲ្យមានការផ្គត់ផ្គង់ប្រេងឥន្ធនៈភ្លាមៗទៅកាន់តំបន់ហ្គាហ្សាស្ទ្រីប និងដើម្បីធានាថា ប្រេងឥន្ធនៈត្រូវបានប្រើប្រាស់យ៉ាងត្រឹមត្រូវដើម្បីការពារការបង្អាក់ការផ្គត់ផ្គង់ផ្នែកមនុស្សធម៌” ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់សប្ដាហ៍ទី ២ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៤,៦០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈមនុស្ស​ជាង ១៤,០០០ នាក់បាន​រង​របួស ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អតីតនាយករដ្ឋមន្ត្រី អ៊ីស្រាអែល ស្នើឲ្យលោក Netanyahu លាលែងពីតំណែង