ព័ត៌មានអន្ដរជាតិ

អ្នកវិទ្យាសាស្រ្ត បញ្ចេញរូបភាពថ្មីនៃ Black Hole មហាធំមហិមា ជាមួយរបកគំហើញ យ៉ាងភ្ញាក់ផ្អើល

បានផុស

៣ ខែ មុន

នៅ

ថ្ងៃព្រហស្បតិ៍ ២៨ មីនា ២០២៤

ដោយ

តាមការចុះផ្សាយរបស់គេហទំព័រ Space.com កាលពីថ្ងៃពុធទី២៧ខែមីនា, ក្រុមអ្នកវិទ្យាសាស្ត្រ បានបញ្ចេញរូបភាពនៃប្រហោងខ្មៅ (Black Hole) ដ៏មហាធំមហិមាមួយឈ្មោះ Sagittarius A* (Sgr A*) ស្ថិតនៅចំកណ្តាល Milky Way របស់យើង ជាមួយនឹងរបកគំហើញដ៏គួរឲ្យភ្ញាក់ផ្អើលជាទីបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រាវជ្រាវជាង៣០០នាក់ មកពីទ្វីបអាហ្រ្វិក អាស៊ី អឺរ៉ុប អាមេរិកខាងជើងនិងអាមេរិកខាងត្បូង បានបង្កើតរូបថតជាទីចាប់អារម្មណ៍នេះ ដោយប្រើតេឡេស្កុប Event Horizon ដែលបង្ហាញឲ្យឃើញនូវរលកពន្លឺពណ៌ទឹកក្រូចនៅជុំវិញប្រហោងខ្មៅ។

ដើមឡើយ កាលពីរូបថត Sgr A* ត្រូវបានគេបញ្ចេញដំបូងក្នុងខែឧសភាឆ្នាំ២០២២ គឺមិនសូវច្បាស់ទេ ទើបតែខែមីនាឆ្នាំ២០២៤នេះប៉ុណ្ណោះ ដែលក្រុមអ្នកវិទ្យាសាស្រ្ត ខិតខំធ្វើឲ្យរូបកាន់តែច្បាស់ បង្ហាញរលកពន្លឺនិងដែនម៉ាញេទិករបស់ប្រហោងខ្មៅ មិនធ្លាប់ឃើញពីមុន។

ចំពោះរបកគំហើញដែលបង្កភាពភ្ញាក់ផ្អើលគឺថា ដែនម៉ាញេទិចរបស់ Sgr A* គឺស្រដៀងទៅនឹងប្រហោងខ្មៅមួយទៀតឈ្មោះ Messier 87 (M87) ដែរប៉ុន្តែបើគិតពីម៉ាសវិញប្រហោងខ្មៅទាំងពីរមានម៉ាសខុសគ្នាឆ្ងាយណាស់ ពោលគឺ Sgr A* របស់កាឡាក់ស៊ី Milky Way មានម៉ាសធ្ងន់ជាងព្រះអាទិត្យ ៤.៣លានដង ចំណែក M87* របស់កាឡាក់ស៊ី M87 មានម៉ាសធ្ងន់ជាងព្រះអាទិត្យដល់ទៅ ៦.៥ពាន់លានដងឯណោះ។

អ្នកស្រី Sara Issaoun សហប្រធានគម្រោងនៃសាកលវិទ្យាល័យ Harvard និយាយថា “អ្វីដែលយើងកំពុងឃើញនៅពេលនេះគឺថា មានដែនម៉ាញេទិករឹងមាំនិងបត់បែនខ្លាំង នៅជិតប្រហោងខ្មៅ កណ្តាលនៃកាឡាក់ស៊ី Milky Way។ ជាមួយការសិក្សារវាង Sgr A* និង M87* យើងបានដឹងច្បាស់ថា ដែនម៉ាញេទិកដ៏រឹងមាំ គឺមានសារៈសំខាន់ចំពោះរបៀបដែលប្រហោងខ្មៅ ធ្វើអន្តរកម្មជាមួយឧស្ម័ននិងអ្វីៗនៅជុំវិញខ្លួនវា។