អតីត​សមាជិក​ក្រុម One Direction បាន​បាត់បង់ជីវិត ក្រោយ​ធ្លាក់​ពី​លើ​សណ្ឋាគារ​ជាន់​ទី​៣

អតីតតារាចម្រៀង​ក្រុម​ One Direction គឺ​លោក Liam Payne ត្រូវបានគេប្រទះឃើញស្លាប់នៅខាងក្រៅសណ្ឋាគារក្នុងទីក្រុង Buenos Aires ប្រទេស​អាហ្សង់ទីន បន្ទាប់ពីធ្លាក់ពីលើឡៅតឿ​បន្ទប់ជាន់ទី៣។

ប៉ូលិសអាហ្សង់ទីន បានបញ្ជាក់កាលពីថ្ងៃពុធថា មុន​កើត​ហេតុ មាន​មនុស្ស​រាយការណ៍​ថា​ឃើញ​ «បុរស​​ម្នាក់​ដែល​ស្ថិតនៅក្រោមឥទ្ធិពលនៃគ្រឿងញៀន និងគ្រឿងស្រវឹង»។

សេចក្តីថ្លែងការណ៍​របស់​ប៉ូលិស បានឲ្យ​ដឹង​ថា អ្នកគ្រប់គ្រងសណ្ឋាគារបានលឺសំលេងខ្លាំងនៅខាងក្រោយសណ្ឋាគារ ហើយនៅពេលដែលប៉ូលីសទៅដល់ ពួកគេបានរកឃើញថាបុរសម្នាក់បានធ្លាក់ពីលើ​ឡៅតឿ​បន្ទប់របស់ខ្លួន។

បុគ្គលិកសង្គ្រោះបន្ទាន់ បានបញ្ជាក់ពីការស្លាប់របស់តារាចម្រៀងជនជាតិអង់គ្លេស​វ័យ​៣១ឆ្នាំ។

ប៉ុស្ដិ៍​​ទូរទស្សន៍ MTV បាន​បង្ហោះ​សារ​នៅ​លើ​បណ្ដាញ​សង្គម X ថា៖ «យើងមានការសោកស្ដាយយ៉ាងខ្លាំងដែលបានដឹងពីសោកនាដកម្មរបស់ Liam Payne នៅថ្ងៃនេះ»។

Liam Payne ទទួលបានភាពល្បីល្បាញជាសកល ហើយ​ជា​អតីត​សមាជិក​ក្រុម​ One Direction ដែល​មាន​សមាជិក​​ផ្សេង​ទៀត​ដូចជា Harry Styles, Zayn Malik, Niall Horan និង Louis Tomlinson ។

ក្រុម One Direction ត្រូវ​បាន​បង្កើត​ឡើង​ក្រោយ​ជាប់​ចំណាត់ថ្នាក់​ទី​៣ ក្នុងកម្មវិធីប្រកួត​ចម្រៀង​ដ៏​ល្បី «X Factor» របស់ចក្រភពអង់គ្លេសក្នុងឆ្នាំ​២០១០ ប៉ុន្តែក្រុមនេះបានបែកបាក់គ្នានៅឆ្នាំ២០១៦ ដោយសារសមាជិករបស់ខ្លួនបានចាប់​យក​គម្រោងផ្សេងៗគ្នា រួមទាំងអាជីព​ជា​តារា​ចម្រៀង​ទោល។

One Direction បានជាប់ចំណាត់ថ្នាក់ជាក្រុមចម្រៀងប្រុសដ៏អស្ចារ្យបំផុត​លំដាប់​ទី​៣ របស់​ទស្សនាវដ្ដី Entertainment Weekly ក្នុងឆ្នាំ២០២៤​នេះ។ យោងតាម ​​Celebrity Net Worth តារា​ចម្រៀង Liam Payne រកប្រាក់ចំណូល​ពី​អាជីព​សិល្បៈ​របស់​ខ្លួន​បានប្រហែល ៧០​លានដុល្លារ៕

ដោយ៖ ឈាង​