ក្រុមហេសបូឡា​ តតាំង​អ៊ីស្រាអែលយ៉ាងចាស់​ដៃ ដោយ​បាញ់​មីស៊ីល​រាប់រយគ្រាប់​

ក្រុមហេសបូឡាបានបាញ់រ៉ុកកែតប្រហែល២៥០គ្រាប់ និងមីស៊ីលផ្សេងទៀតទៅកាន់ប្រទេសអ៊ីស្រាអែលកាលពីថ្ងៃអាទិត្យ ដែលជាការវាយប្រហារដ៏ធំ​បំផុតមួយរបស់ក្រុមសកម្មប្រយុទ្ធនេះក្នុងរយៈពេលជាច្រើនខែជាការឆ្លើយតបទៅនឹងការវាយប្រហារដ៏សាហាវរបស់អ៊ីស្រាអែលលើទីក្រុងបេរូត (Beirut)។ យោង​ទីភ្នាក់ងារព័ត៌មាន​AP​នៅ​ថ្ងៃនេះ​។

យោធាអ៊ីស្រាអែល បាននិយាយថា រ៉ុក្កែត​ប្រហែល២៥០គ្រាប់ត្រូវបានបាញ់ចេញ​ពីលីបង់កាលពីថ្ងៃអាទិត្យ ដោយមានការស្ទាក់ចាប់ខ្លះៗ និងបានបណ្ដាលឲ្យមនុស្ស៧នាក់បានរងរបូស។ ខណៈការវាយប្រហារតាមអាកាសរបស់អ៊ីស្រាអែល ដោយគ្មានការព្រមាន​ជាមុន​​​កាលពីថ្ងៃសៅរ៍​​នៅ​កណ្តាលទីក្រុង Beirut បាន​សម្លាប់មនុស្សយ៉ាងហោចណាស់ ២៩ នាក់ និងរបួស​៦៧នាក់។ នេះបើយោងតាមក្រសួងសុខាភិបាលរបស់ប្រទេសលីបង់។

សរុបការវាយប្រហាររបស់អ៊ីស្រាអែលបានសម្លាប់ទាហានលីបង់ជាង៤០នាក់ ចាប់តាំងពីការចាប់ផ្តើមនៃសង្រ្គាមរវាងអ៊ីស្រាអែល និងក្រុមហេសបូឡា។ នាយករដ្ឋមន្ត្រីរបស់ប្រទេសលីបង់ លោក Najib Mikati បានថ្កោលទោសការវាយប្រហារចុងក្រោយនេះថាជាការវាយលុកលើកិច្ចខិតខំប្រឹងប្រែងបទឈប់បាញ់ដែលដឹកនាំដោយសហរដ្ឋអាមេរិក។

គួររម្លឹកថា ក្រុមហេសបូឡា បានចាប់ផ្តើមបាញ់រ៉ុកកែត មីស៊ីល និងយន្តហោះគ្មានមនុស្សបើក ចូលទៅក្នុងប្រទេសអ៊ីស្រាអែល បន្ទាប់ពីការវាយប្រហាររបស់ពួកហាម៉ាស នៅថ្ងៃទី ៧ខែតុលា ឆ្នាំ ២០២៣ ចេញពីតំបន់ហ្គាហ្សា បានបញ្ឆេះសង្រ្គាមនៅទីនោះ ខណៈក្រុម​ហេសបូឡា​បាន​ពណ៌នា​ការ​វាយ​ប្រហារ​នេះ​ថា​ជា​ទង្វើ​នៃ​សាមគ្គីភាព​ជាមួយ​ប៉ាឡេស្ទីន និង​ក្រុម​ហាម៉ាស។

អ៊ីស្រាអែលបានបើកការវាយប្រហារតាមផ្លូវអាកាសសងសឹកទៅលើក្រុមហេសបូឡា ហើយនៅក្នុងខែកញ្ញា ជម្លោះកម្រិតទាបបានផ្ទុះឡើងជាសង្រ្គាមពេញមួយខណៈដែលអ៊ីស្រាអែលបានបើកការវាយប្រហារតាមផ្លូវអាកាសនៅទូទាំងផ្នែកធំនៃលីបង់ និងបានសម្លាប់មេដឹកនាំកំពូលរបស់ហេសបូឡាគឺលោក Hassan Nasrallah។

គួរបញ្ជាក់ថា ការវាយប្រហាររបស់អ៊ីស្រាអែលបានសម្លាប់មនុស្សជាង ៣៧០០នាក់នៅក្នុងប្រទេសលីបង់ ហើយការប្រយុទ្ធគ្នានេះបានជម្លៀសប្រជាជនប្រហែល ១,២លាននាក់ ឬមួយភាគបួននៃចំនួនប្រជាជនរបស់ប្រទេសលីបង់។

ចំណែកនៅខាងអ៊ីស្រាអែល ទាហានប្រហែល ៩០នាក់ និងជនស៊ីវិលជិត ៥០នាក់ត្រូវបានសម្លាប់ដោយការទម្លាក់គ្រាប់បែកនៅភាគខាងជើងអ៊ីស្រាអែល និងនៅក្នុងការប្រយុទ្ធបន្ទាប់ពីការលុកលុយរបស់អ៊ីស្រាអែលនៅដើមខែតុលានិងជនជាតិអ៊ីស្រាអែលប្រហែល ៦០០០០ នាក់ត្រូវបានផ្លាស់ទីលំនៅពីភាគខាងជើងរបស់ប្រទេស។

បេសកជនសហភាពអឺរ៉ុបក៏បានកំពុងអំពាវនាវឱ្យមានសម្ពាធដើម្បីឈានដល់បទឈប់បាញ់ ដោយអ្នកការទូតកំពូលរបស់សហភាពអឺរ៉ុបបានអំពាវនាវកាលពីថ្ងៃអាទិត្យសម្រាប់សម្ពាធបន្ថែមទៀតលើអ៊ីស្រាអែល និងក្រុមហេសបូឡា ដើម្បីឈានដល់កិច្ចព្រមព្រៀងមួយ ដោយនិយាយថា កិច្ចព្រមព្រៀងមួយកំពុងរង់ចាំកិច្ចព្រមព្រៀងចុងក្រោយពីរដ្ឋាភិបាលអ៊ីស្រាអែល៕

អត្ថបទ៖ ប៊ុន សុភាព