Nikolov កំពុងក្លាយជាស្មាត់ស្តាំកំពូលម្នាក់ បន្តពី Michieletto, Leon ក្រោយសាងស្ថិតិដ៏អស្ចារ្យ ២ ឆ្នាំចុងក្រោយ

ស្មាត់ជម្រើសជាតិ ប៊ុលហ្គារី កីឡាករ Aleksandar Nikolov កំពុងត្រូវបានគេចាត់ទុកជាស្មាត់ស្តាំកំពូលម្នាក់នាពេលបច្ចុប្បន្ន បន្ទាប់ពីរូបគេបានសាងនូវស្ថិតិដ៏អស្ចារ្យក្នុងរយៈពេល ២ ឆ្នាំចុងក្រោយនេះ។

នៅក្នុងវិស័យបាល់ទះ មានស្មាត់ស្តាំលំដាប់ពិភពលោកជាច្រើន ដូចជាស្មាត់ អ៊ីតាលី Alessandro Michieletto, ស្មាត់ ប៉ូឡូញ Wilfredo León និងស្មាត់ ជប៉ុន Yuki Ishikawa ជាដើម។ ចំណែកស្មាត់វ័យ ២១ ឆ្នាំ Nikolov ក៏កំពុងក្លាយជាស្មាត់កំពូលម្នាក់ផងដែរ បន្ទាប់ពីបង្ហាញសមត្ថភាពយ៉ាងអស្ចារ្យ ជាពិសេសក្នុងការប្រកួតពាន FIVB Men’s Volleyball Nations League 2026។

ក្នុងពានរង្វាន់ FIVB Nations League 2026 នេះ Nikolov កំពុងឈរជាកីឡាកររកបានពិន្ទុច្រើនជាងគេបំផុត សម្រាប់ការប្រកួតជុំដំបូង ដែលឆ្លងកាត់ ១២ ប្រកួតក្នុងរយៈពេល ៣ សប្តាហ៍។ កីឡាកររកបានពិន្ទុសរុបបានចំនួន ២៧៨ ពិន្ទុ ក្នុងនោះរកបានតាមរយៈការវាយផ្តាច់ ២៤៧ ពិន្ទុ, បាំងបាល់ជោគជ័យ ១១ ពិន្ទុ និងវាយសេវា ២០ ពិន្ទុ។

ទោះបីជាកីឡាករមកពីក្រុម Cucine Lube Civitanova រូបនេះ ធ្វើបានយ៉ាងល្អឥតខ្ចោះបែបនេះក៏ដោយ ប៉ុន្តែក្រុមជម្រើសជាតិ ប៊ុលហ្គារី មិនអាចឡើងទៅកាន់ការប្រកួតជុំផ្តាច់ព្រ័ត្រពាន Nations League 2026 បានទេ ដោយសារពួកគេបានបញ្ចប់ការប្រកួតជុំដំបូង ដោយស្ថិតនៅលេខរៀងទី ៨។ ប៊ុលហ្គារី ឆ្លងកាត់ ១២ ប្រកួត ក្នុងនោះឈ្នះ ៧ និងចាញ់ ៥ មាន ២០ ពិន្ទុ។

យ៉ាងណាមិញ Nikolov ត្រូវបានគេចាត់ទុកជាស្មាត់កំពូលម្នាក់រួចទៅហើយ តាមរយៈស្ថិតិដ៏ល្អរបស់គេតាំងពីឆ្នាំមុនមកដល់ឆ្នាំ ២០២៦ នេះ។ ក្រឡេកទៅមើលឆ្នាំ ២០២៥ កន្លងទៅ គឺ Nikolov បានដើរតួយ៉ាងសំខាន់ក្នុងការជួយឱ្យក្រុម ប៊ុលហ្គារី ឡើងទៅកាន់វគ្គផ្តាច់ព្រ័ត្រពាន FIVB Men’s Volleyball World Championship ប៉ុន្តែបានត្រឹមជើងឯករង បន្ទាប់ពីចាញ់ក្រុម អ៊ីតាលី ៣ សិត ១។

នៅពេលនោះ Nikolov បានឈ្នះពានរង្វាន់ឯកត្តជន ១ គឺពានរង្វាន់ស្មាត់ស្តាំល្អបំផុត។ នៅក្នុងឆ្នាំ ២០២៥ នោះដដែល ស្មាត់វ័យ ២១ ឆ្នាំ កម្ពស់ ២.០៧ ម៉ែត្រ ត្រូវបាន FIVB ផ្តល់ចំណាត់ថ្នាក់ជាកីឡាករលេខ ២ ក្នុងពិភពលោក បន្ទាប់ពីកីឡាករ Michieletto ដែលឈរលេខ ១។

ផ្អែកតាមស្ថិតិប៉ុណ្ណេះ គឺអាចវាយតម្លៃបានហើយ ថា Nikolov កំពុងឈរជាស្មាត់កំពូលម្នាក់នៅក្នុងពិភពលោក។ បច្ចុប្បន្នកីឡាករក៏មានវ័យនៅក្មេង ហើយថែមទាំងមានសមត្ថភាពអស្ចារ្យថែមទៀត ដូច្នេះមិនយូរឬឆាប់ រូបគេនឹងវ៉ារៀមច្បង Michieletto ដើម្បីឡើងមកឈរចំណាត់ថ្នាក់លេខ ១ ក្នុងពិភពលោកវិញ៕

អត្ថបទ៖ សេម កុសល