កម្ពុជា-អាម៉េរិក ឈានដល់ការពិភាក្សាលើនីតិវិធីក្នុងការជ្រើសរើសយោធាកម្ពុជាទៅសិក្សានៅសាលាទ័ពជើងទឹកអាម៉េរិក

សហរដ្ឋអាម៉េរិកត្រៀមបើកទ្វារទទួលយកនាយទាហានកម្ពុជាឱ្យសិក្សានៅសាលាយោធារបស់ខ្លួន ខណៈប្រតិភូក្រសួងការពារជាតិកម្ពុជា ដឹកនាំដោយលោកឧត្តមសេនីយ៍ឯក រ៉ាត់ ដារ៉ារ័ត្ន បានធ្វើទស្សនកិច្ចទៅកាន់បណ្ឌិត្យសភាកងទ័ពជើងទឹកសហរដ្ឋអាម៉េរិក ក្នុងរដ្ឋម៉ារីលែន។

ដំណើរទស្សនកិច្ចរបស់ប្រតិភូក្រសួងការពារជាតិកម្ពុជា ដែលធ្វើឡើងកាលពីព្រឹកថ្ងៃទី២៣ ខែកក្កដា ឆ្នាំ២០២៦ ត្រូវបានទទួលស្វាគមន៍ពីលោក Paul Fujimura នាយកការិយាល័យកម្មវិធីអន្តរជាតិ នៃបណ្ឌិត្យសភាកងទ័ពជើងទឹកសហរដ្ឋអាម៉េរិក។ ជាការកត់សម្គាល់ នេះគឺជាលើកទីមួយហើយ ដែលគណៈប្រតិភូយោធាបានមកទស្សនកិច្ចជាផ្លូវការនៅស្ថាប័ននេះ។

នៅក្នុងជំនួបនោះ លោកឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការក្រសួងការពារជាតិ និងលោក Paul Fujimura បានឈានដល់ការពិភាក្សាអំពីនីតិវិធីរួមគ្នាក្នុងការជ្រើសរើសសិក្ខាកាមកម្ពុជា ដើម្បីទៅសិក្សានៅសាលាយោធាមួយនេះ។ បន្ថែមពីនេះ ភាគីទាំងពីរក៏បានពិនិត្យទៅលើការងារមួយចំនួនទៀត ដែលអាចពង្រឹងកិច្ចសហប្រតិបត្តិការយោធាទ្វេភាគីរវាងកងយោធពលខេមរភូមិន្ទកម្ពុជា និងបណ្ឌិត្យសភាកងទ័ពជើងទឹកសហរដ្ឋអាម៉េរិកទៅថ្ងៃអនាគតផងដែរ។

ការទទួលយកនាយទាហានកម្ពុជានេះជាផ្នែកមួយនៃការពង្រឹងឡើងវិញនូវកិច្ចសហប្រតិបត្តិការយោធារវាងកម្ពុជា និងសហរដ្ឋអាម៉េរិក ហើយក៏ជាការឆ្លើយតបទៅនឹងពាក្យសន្យារបស់រដ្ឋាភិបាលវ៉ាស៊ីនតោន ដែលបានប្រកាសជួយអភិវឌ្ឍន៍ធនធានមនុស្សកម្ពុជាលើវិស័យយោធា តាមរយៈការបង្កើនកៅអីសម្រាប់មន្ត្រីកម្ពុជាឱ្យទៅសិក្សានៅមហាវិទ្យាល័យយោធាអាម៉េរិក ដូចជា សាលាយោធា West Point និង Air Force Academy ព្រមទាំងសាលាផ្សេងៗទៀត៕

ដោយ៖ ធឿន វ៉ាន់សុង