កីឡា

យប់នេះជំនួបសំខាន់ ក្រុមបាល់ទះកម្ពុជា ប៉ះ ឥណ្ឌូណេស៊ី ជាការជួបគ្នាលើកទី១១

បានផុស

២៩ វិនាទី មុន

នៅ

ថ្ងៃពុធ ២២ កក្កដា ២០២៦

ដោយ

ក្រុមបាល់ទះជម្រើសជាតិកម្ពុជា ត្រូវតទល់នឹងក្រុមម្ចាស់ផ្ទះ ឥណ្ឌូណេស៊ី វេលាម៉ោង ៧ យប់ ថ្ងៃទី២២ ខែកក្កដា នេះ សម្រាប់ការប្រកួតសន្សំពិន្ទុក្នុងពូល B ពានរង្វាន់ SEA V. Cup ឆ្នាំ ២០២៦ ជើងទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះនឹងក្លាយជាការប្រកួតដ៏តានតឹងសម្រាប់ក្រុមបាល់ទះកម្ពុជា ដែលត្រូវប្រឈមនឹងខ្លាំង ឥណ្ឌូណេស៊ី នៅចំពោះមុខអ្នកគាំទ្ររបស់ពួកគេ។ ជាពិសេស ពួកគេកំពុងដាក់ចិត្តសងសឹកលើក្រុមកម្ពុជា បន្ទាប់ពីពួកគេបានចាញ់ក្នុងការប្រកួតវគ្គផ្តាច់ព្រ័ត្រ ពានរង្វាន់ដដែលនេះ កាលពីថ្ងៃទី១៩ ខែកក្កដា ឆ្នាំ ២០២៦ នៅប្រទេសហ្វីលីពីន។

ក្រុមបាល់ទះកម្ពុជា និង ឥណ្ឌូណេស៊ី ធ្លាប់បានជួបគ្នា ១០ លើកមកហើយ គឺ កម្ពុជា ឈ្នះ ១ ដង និង ឥណ្ឌូណេស៊ី ឈ្នះ៩ លើក ក្នុងនោះ ៦ លើកនៅក្នុងព្រឹត្តិការណ៍កឡាស៊ីហ្គេម ឥណ្ឌូណេស៊ី ឈ្នះដោយលទ្ធផល ៣-០ ចំនួន ៥ លើក និងឈ្នះដោយលទ្ធផល ៣-១ មួយលើក។ ជួបគ្នា ៤ លើកទៀតគឺក្នុងពានរង្វាន់ SEA V. Cup គឺ ឥណ្ឌូណេស៊ី ឈ្នះដោយពិន្ទុ ៣-០ ចំនួន ៣ លើក ប៉ុន្តែការជួបគ្នាចុងក្រោយបំផុត កម្ពុជា បានយកឈ្នះ ដោយលទ្ធផល ៣-២ នៅវគ្គផ្តាច់ព្រ័ត្រ ដែលបានក្លាយជាជ័យជម្នះលើកដំបូងរបស់ កម្ពុជា លើឥណ្ឌូណេស៊ី។

សម្រាប់ការត្រៀមខ្លួន SEA V. Cup ឆ្នាំ ២០២៦ ជើងទី២ ឥណ្ឌូណេស៊ី បានផ្លាស់ប្តូរកីឡាករថ្មី ដើម្បីប្រជែងជើងឯក។ ស្មាត់ស្តាំ Doni ត្រូវបានជម្រុះចេញពីបញ្ជីជម្រើសជាតិឥណ្ឌូណេស៊ី ហើយយកស្មាត់ Luvi ជាកីឡាករល្អបំផុត ២ លើកជាប់គ្នាក្នុងពានរង្វាន់តេជោលីគ ដើម្បីជំនួស។

សម្រាប់កម្ពុជា បានបង្កើតប្រវត្តិសាស្ត្រ ២ គឺ បានឈ្នះជើងឯក SEA V. Cup ជាលើកដំបូង និងបានឈ្នះ ឥណ្ឌូណេស៊ី ជាលើក ហើយកំពុងបោះជំហានទៅរកការចូលរួមប្រកួតជើងឯកអាស៊ី AVC Cup ជាលើកដំបូង។

ចំណែក ឥណ្ឌូណេស៊ី បានឈ្នះជើងឯកពានរង្វាន់អាស៊ី AVC Cup ជាលើកដំបូងនៅឆ្នាំ ២០២៦ នេះ។ ប្រសិនបើ ពួកគេមិនបានឈ្នះជើងឯក SEA V. Cup ឆ្នាំ ២០២៦ នៅជើងទី ២ ទេ ពួកគេប្រហែលជាគ្មានឱកាសទៅប្រកួតការពារជើងឯកអាស៊ី AVC Cup នៅឆ្នាំ ២០២៧ ទេ។

សម្រាប់ការប្រកួតជាមួយ ឥណ្ឌូណេស៊ី យប់នេះ លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានលើកឡើងថា ការប្រកួតនេះគឺផ្អែកលើស្ថានភាពជាក់ស្តែង។ ប្រសិនបើស្ថានភាពប្រកួតអំណោយផលល្អ គឺ កម្ពុជា នឹងផ្តាច់យកឈ្នះ ឥណ្ឌូណេស៊ី តែម្តងដើម្បីឱកាសឡើងវគ្គពាក់កណ្តាលផ្តាច់ព្រ័ត្រ ប៉ុន្តែប្រសិនបើស្ថានភាពតឹងតែងខ្លាំង ប្រហែលជាអាចលេងតាមដំណើរដើម្បីទុកកម្លាំងលេងតទល់នឹង ហ្វីលីពីន សម្រាប់ការប្រកួតវគ្គសន្សំពិន្ទុលើកទី២ នៅថ្ងៃទី២៣ ខែកក្កដា ស្អែក ពីព្រោះប្រសិនបើចាញ់ ឥណ្ឌូណេស៊ី ប៉ុន្តែឈ្នះ ហ្វីលីពីន គឺ កម្ពុជា នៅតែឡើងដដែល។