នយោបាយ

ប្រធានាធិបតីចិនថានឹងបន្តជួយធ្វើឱ្យស្ថានភាពព្រំដែនកម្ពុជា-ថៃល្អប្រសើរឡើងវិញ

បានផុស

៥ នាទី មុន

នៅ

ថ្ងៃសៅរ៍ ១៨ កក្កដា ២០២៦

ដោយ

ប្រធានាធិបតីចិនលោក ស៊ី ជិនពីង ថាប្រទេសចិននឹងបន្តដើរតួនាទីជាអ្នកសម្របសម្រួលឱ្យស្ថានភាពជម្លោះព្រំដែនកម្ពុជានិងថៃមានភាពល្អប្រសើរឡើងវិញ ដោយបានវាយតម្លៃខ្ពស់ពីការព្យាយាមរក្សាបានបទឈប់បាញ់ និងការកសាងទំនុកចិត្តឡើងវិញរបស់កម្ពុជានិងថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយលើគេហទំព័រក្រុមប្រឹក្សារដ្ឋនៃសាធារណរដ្ឋប្រជាមានិតចិននៅថ្ងៃទី១៧ ខែកក្កដា ឆ្នាំ២០២៦ បានឱ្យដឹងថាក្នុងជំនួបជាមួយនាយករដ្ឋមន្ត្រីកម្ពុជានៅទីក្រុងសៀងហៃ លោក ស៊ី បានលើកឡើងថាការរក្សាបានបទឈប់បាញ់ និងការកសាងទំនុកចិត្តគ្នាទៅវិញទៅមករវាងកម្ពុជា និងថៃជាបណ្ដើរៗ គឺបម្រើដល់ផលប្រយោជន៍ជាមូលដ្ឋាន និងយូរអង្វែងដល់ប្រទេសទាំងពីរ។ លោកបានបញ្ជាក់ថាប្រទេសលោក គាំទ្រដល់កម្ពុជានិងថៃក្នុងការស្វែងរកដំណោះស្រាយតាមរយៈការសន្ទនា និងពិគ្រោះយោបល់ ហើយចិនត្រៀមខ្លួនរួចជាស្រេចដើម្បីជួយក្នុងរឿងនេះ។

ក្នុងជំនួបនោះសម្ដេចធិបតី ហ៊ុន ម៉ាណែត បានថ្លែងអំណរគុណប្រទេសចិនដែលបានចូលរួមយ៉ាងសកម្មក្នុងការជំរុញការចរចាសន្ដិភាព និងការដោះស្រាយទំនាស់ដោយសន្ដិវិធីរវាងកម្ពុជានិងថៃ។ សម្ដេចក៏បញ្ជាក់ប្រាប់លោក ស៊ី ផងដែរថាកម្ពុជានឹងបន្តប្រកាន់ខ្ជាប់នូវការសន្ទនានិងការចរចាដើម្បីបន្ធូរនូវស្ថានការណ៍។

គិតរហូតមកដល់ពេលនេះគឺជិតមួយឆ្នាំហើយដែលថៃបានបើកការវាយប្រហារឈ្លានពានកម្ពុជាកាលពីថ្ងៃទី២៤ ខែកក្កដា ឆ្នាំ២០២៥។ បើទោះបីសម្រេចបានបទឈប់បាញ់ដល់ទី២លើកហើយក្ដី និងមានកិច្ចព្រមព្រៀងរៀបចំព្រំដែនរវាងប្រទេសទាំងពីរក៏ដោយតែមកដល់ពេលនេះថៃនៅតែបន្តកាន់កាប់ទឹកដីកម្ពុជាដោយខុសច្បាប់ និងបង្កបញ្ហាជាមួយកម្ពុជាជារឿយៗផងដែរ ដោយងាកចេញពីយន្តការទ្វេភាគី និងព្យាយាមគេចវេះពីកិច្ចប្រជុំ JBC ជាបន្តបន្ទាប់៕