នយោបាយ

ប្រធានសភានឹងទៅបំពេញទស្សនកិច្ចនៅប្រទេសវៀតណាមក្នុងនាសប្ដាហ៍ក្រោយ

បានផុស

១៣ នាទី មុន

នៅ

ថ្ងៃសៅរ៍ ២៥ កក្កដា ២០២៦

ដោយ

ប្រធានសភាកម្ពុជាសម្ដេចសភាធិបតី ឃួន សុដារី នឹងដឹកនាំគណៈប្រតិភូជាន់ខ្ពស់រដ្ឋសភា បំពេញទស្សនកិច្ចជាផ្លូវការនិងមិត្តភាព នៅសាធារណរដ្ឋសង្គមនិយមវៀតណាម ពីថ្ងៃទី២៧ ដល់ថ្ងៃទី២៩ ខែកក្កដា ឆ្នាំ២០២៦ ខាងមុខ ដើម្បីរឹតចំណងមិត្តភាព និងកិច្ចសហប្រតិបត្តិការរវាងប្រទេសកម្ពុជានិងវៀតណាមឱ្យកាន់តែជិតស្និត រឹងមាំ និងស៊ីជម្រៅបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីជូនដំណឹងថ្ងៃទី២៤ ខែកក្កដា ឆ្នាំ២០២៦ អគ្គលេខាធិការដ្ឋានរដ្ឋសភាបានឱ្យដឹងថាក្នុងដំណើរទស្សនកិច្ចនេះសម្ដេចនឹងជួបសម្ដែងការគួរសមជាមួយ អគ្គលេខាធិការបក្សកុម្មុយនីស និងជាប្រធានរដ្ឋវៀតណាម លោក តូ ឡឹម (TO Lam) ជួបពិភាក្សាការងារទ្វេភាគី ជាមួយ ប្រធានរដ្ឋសភាវៀតណាមលោក ជិន ថាញ់មិន និងនាយករដ្ឋមន្ត្រីវៀតណាមលោក ឡេ មិញហ៊ឹង (Le Minh Hung) ផងដែរ។

អគ្គលេខាធិការរដ្ឋសភាលោក ឡេង ប៉េងឡុង បានបញ្ជាក់ថា៖ «ដំណើរទស្សនកិច្ចនេះធ្វើឡើងតបតាមការអញ្ជើញរបស់ ឯកឧត្តម ជិន ថាញ់មិន (Tran Thanh Man) ប្រធានរដ្ឋសភានៃសាធារណរដ្ឋសង្គមនិយមវៀតណាម ក្នុងការរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែជិតស្និទ្ធ រឹងមាំ និងស៊ីជម្រៅបន្ថែមទៀត ទាំងក្នុងក្របខណ្ឌស្ថាប័ននីតិប្បញ្ញត្តិ និងនីតិប្រតិបត្តិ ឈរលើស្មារតី ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង»។

បើតាមអគ្គលេខាធិការដ្ឋានរដ្ឋសភា គណៈកម្មការជំនាញនៃរដ្ឋសភាប្រទេសទាំងពីរ សមាជិកគណៈប្រតិភូដែលអមដំណើរសម្តេចប្រធានរដ្ឋសភានឹងមានជំនួបពិភាក្សាការងារទ្វេភាគី ជាមួយសមភាគីវៀតណាម ក្នុងការចែករំលែកព័ត៌មាន ផ្លាស់ប្តូរបទពិសោធជាមួយគ្នាផងដែរ។

សម្ដេចសភាធិបតី ឃួន សុដារី និងប្រធានរដ្ឋវៀតណាម លោក តូ ឡឹម នៅវិមានសភាកម្ពុជាថ្ងៃទី១៣ កក្កដា ឆ្នាំ២០២៤។

ក្រៅពីនេះ គណៈប្រតិភូជាន់ខ្ពស់រដ្ឋសភាកម្ពុជា ដឹកនាំដោយ សម្តេចប្រធានរដ្ឋសភាក៏គ្រោងអញ្ជើញទស្សនកិច្ចទីតាំងសំខាន់ៗ រួមមានតំបន់ឧស្សាហកម្ម តំបន់វប្បធម៌ ទេសចរណ៍ និងមន្ទីរពេទ្យនៃប្រទេសវៀតណាម ដើម្បីភ្ជាប់ទំនាក់ទំនង រវាងប្រជាជននិងប្រជាជន ក៍ដូចជាដើម្បីពង្រឹងវិស័យពាណិជ្ជកម្ម ទេសចរណ៍ វប្បធម៌ សេវាសុខាភិបាល សំដៅបម្រើឧត្តមប្រយោជន៍ ប្រជាពលរដ្ឋនៃប្រទេសទាំងពីរបន្ថែមទៀត៕

អត្ថបទដោយ ហ៊ុន សិរីវឌ្ឍន៍