ទីបំផុត អ៊ុយក្រែនព្រមប្រគល់រ៉ែកម្រឲ្យអាមេរិក ​ខណៈ ហ្សេលេនស្គី នឹងទៅវ៉ាស៊ីនតោន ដើម្បីស៊ីញេកិច្ច​ព្រមព្រៀង

ប្រភពពីរដ្ឋាភិបាលអ៊ុយក្រែន បានឲ្យដឹងថា ពេលនេះលោក វ្ល៉ូឌីមៀរ ហ្សេលេនស្គី បានឯកភាពប្រគល់ធនធានរ៉ែកម្រឲ្យសហរដ្ឋអាមេរិក​ជាថ្នូរនឹងជំនួយយោធាដើម្បីប្រឆាំងជាមួយរុស្ស៊ី ខណៈលោកនឹងធ្វើដំណើរទៅទីក្រុងវ៉ាស៊ីនតោន នៅថ្ងៃសុក្រ​នេះ ដើម្បីចុះហត្ថលេខាលើកិច្ចព្រមព្រៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNN នៅថ្ងៃពុធទី២៦ខែកុម្ភៈឆ្នាំ២០២៥ ដោយដកស្រង់សម្តីអ៊ុយក្រែន មូលហេតុដែលទីក្រុងកៀវ ឯកភាពលើកិច្ចព្រមព្រៀងនេះគឺដោយសារតែ សហរដ្ឋអាមេរិកក៏មិនទាមទារទឹកប្រាក់បានពីធនធានរ៉ែរហូតដល់​៥០០ពាន់លានដុល្លារ យកមកសងខ្លួនដូចលើកមុនដែរ។

ឯកសារព្រាងចុងក្រោយដែលចុះកាលបរិច្ឆេទថ្ងៃចន្ទ ត្រូវគេមើលឃើញថា អាមេរិកនឹងតម្រូវឲ្យទីក្រុងកៀវបង្កើតមូលនិធិមួយ ហើយទុក៥០%នៃចំណូលបានពីធនធានរ៉ែគ្រប់គ្រងដោយរដ្ឋរបស់ខ្លួន ហើយយកមូលនិធិនេះ ទៅវិនិយោគនៅក្នុងឧស្សាហកម្មអ៊ុយក្រែន។

យ៉ាងណាក្តី សហរដ្ឋអាមេរិក មិនបញ្ជាក់ឡើយថាតើ អ៊ុយក្រែន ពិតជាយល់ព្រមលើលក្ខខណ្ឌដែរឬក៏អត់ ប៉ុន្តែប្រមុខសេតវិមានលោក ដូណាល់ ត្រាំ បានប្រាប់អ្នកកាសែតក្នុងវិមានពងក្រពើ កាលពីថ្ងៃអង្គារថា «ខ្ញុំឮថាគាត់ (លោក ហ្សេលេនស្គី) នឹងមកនៅថ្ងៃសុក្រ។ ខ្ញុំមិនថាអីទេបើគាត់ចង់មក ហើយគាត់នឹងស៊ីញេជាមួយគ្នា។ ខ្ញុំគិតថា នេះគឺជាកិច្ចព្រមព្រៀងដ៏ធំមួយ»។

សូមជម្រាបជាថ្មី បើយោងតាមរបាយការណ៍វេទិកាសេដ្ឋកិច្ចពិភពលោកឆ្នាំ២០២៤, អ៊ុយក្រែន ជាប្រទេសមានសក្តានុពលធំធេង ក្នុងនាមជាអ្នកផ្គត់ផ្គង់វត្ថុធាតុដើមសំខាន់ៗទូទាំងពិភពលោកដែលចាំបាច់សម្រាប់វិស័យឧស្សាហកម្មការពារជាតិ បច្ចេកវិទ្យាទំនើប និងថាមពលបៃតង។

ប្រទេសនេះមានទុនបម្រុងទីតានីញ៉ូមធំជាងគេនៅអឺរ៉ុប ហើយស្មើនឹង៧% នៃទុនបម្រុងពិភពលោក។ ពិសេស មុនពេលជម្លោះជាមួយរុស្ស៊ីផ្ទុះឡើងក្នុងឆ្នាំ២០២២ អ៊ុយក្រែនគឺជាអ្នកផ្គត់ផ្គង់ទីតានីញ៉ូមដ៏សំខាន់សម្រាប់ឧស្សាហកម្មយោធា ទៀតផង។

ចំពោះលោហធាតុកម្រ គេដឹងថានៅអ៊ុយក្រែនមានដូចជា បេរីលីយ៉ូម ម៉ង់ហ្គាណែស ហ្គាលីញ៉ូម អ៊ុយរ៉ាញ៉ូម ហ្សីកញ៉ូម ក្រាហ្វីត អាប៉ាទីត ហ្វ្លុយអូរីត និងនីកែល។ មិនត្រឹមប៉ុណ្ណឹង ប្រទេសនេះក៏មានទុនបម្រុងលីចូមធំបំផុតប្រចាំអឺរ៉ុបផងដែរ ដែលគេប៉ាន់ស្មានថាមានចំនួន ៥០០ ០០០តោន៕

អត្ថបទ៖ សុខ សុវណ្ណ

ចុចអាន៖ ត្រាំ ថា អាមេរិក-អ៊ុយក្រែន ជិតឈានដល់កិច្ចព្រមព្រៀង ចែកលុយគ្នាពីការលក់ធនធានរ៉ែហើយ