របាយការណ៍៖ ប្រជាជនភាគច្រើននៅលើពិភព​លោកកំពុងដកដង្ហើមជាមួយខ្យល់ពុល

របាយការណ៍ថ្មីមួយ ​រក​ឃើញ​ថា ចំនួនប្រជាជន​ភាគច្រើន​​​នៅ​លើ​ពិភពលោកកំពុងដកដង្ហើមជាមួយខ្យល់ពុលដោយមានតែប្រទេសចំនួន៧ប៉ុណ្ណោះដែលស្របតាមស្តង់ដារគុណភាពខ្យល់របស់អង្គការសុខភាពពិភពលោក (WHO) កាលពីឆ្នាំមុន។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី១២ខែមីនានេះ។

យោងតាមទិន្នន័យត្រួតពិនិត្យគុណភាពខ្យល់ដែលមានមូលដ្ឋាននៅប្រទេសស្វីស IQAir បានបង្ហាញការរកឃើញរបស់ខ្លួនកាលពីថ្ងៃអង្គារ ដែលទាញយកទិន្នន័យពីស្ថានីយត្រួតពិនិត្យគុណភាពខ្យល់ចំនួន ៤ម៉ឺន​នៅក្នុងប្រទេសចំនួន១៣៨ ដោយ​បានរកឃើញថា ប្រទេសឆាដ​នៅអាហ្វ្រិក បង់ក្លាដែស ប៉ាគីស្ថាន ឥណ្ឌា ​នៅ​អាស៊ីខាងត្បូង និងសាធារណៈរដ្ឋប្រជាធិបតេយ្យកុងហ្គោ​នៅអាហ្រ្វិក​ មានខ្យល់ពុលច្រើនជាងគេក្នុងពិភពលោក។

ក្នុងចំណោមប្រទេសដែលបានវិភាគ មានតែប្រទេសអូស្ត្រាលី នូវែលហ្សេឡង់ បាហាម៉ាស បាបាដូស ហ្គ្រេណាដា អេស្តូនី និងអ៊ីស្លង់ ប៉ុណ្ណោះ ដែលបានទទួលស្តង់ដារគុណភាពខ្យល់អន្តរជាតិរបស់អង្គការសុខភាពពិភពលោក។

មាត្រដ្ឋាននៃបញ្ហាអាចនឹងធំជាងការរាយការណ៍ ដោយសារផ្នែកជាច្រើននៃពិភពលោកខ្វះការត្រួតពិនិត្យដែលត្រូវការសម្រាប់ទិន្នន័យដែលត្រឹមត្រូវជាងនេះ។ ជាឧទាហរណ៍ នៅទូទាំងទ្វីបអាហ្រ្វិក មានស្ថានីយ៍ត្រួតពិនិត្យតែមួយប៉ុណ្ណោះសម្រាប់មនុស្ស ៣.៧​លាននាក់។

លើសពីនេះគម្លាតទិន្នន័យអាចកាន់តែធំឡើង បន្ទាប់ពីមានការប្រកាសដោយក្រសួងការបរទេសសហរដ្ឋអាមេរិកកាលពីសប្តាហ៍មុនថា អាមេរិកនឹងលែងបង្ហាញជាសាធារណៈនូវទិន្នន័យដែលខ្លួនប្រមូលបានពីស្ថានទូត និងស្ថានកុងស៊ុលរបស់ខ្លួនជុំវិញពិភពលោក។

ប្រទេសកំពុងអភិវឌ្ឍន៍ជាច្រើនបានពឹងផ្អែកលើឧបករណ៍ចាប់សញ្ញាគុណភាពខ្យល់ដែលបំពាក់នៅលើអគារស្ថានទូត និងស្ថានកុងស៊ុលអាមេរិក ដើម្បីតាមដានកម្រិតខ្យល់ពុលរបស់ពួកគេ ប៉ុន្តែឥឡូវនេះក្រសួងការបរទេសសហរដ្ឋអាមេរិកកំពុងបញ្ចប់គម្រោងត្រួតពិនិត្យដោយលើកឡើងពីបញ្ហាថវិកា។ បន្ទាប់ពីកម្មវិធីអាមេរិកបិទ យ៉ាងហោចណាស់ប្រទេសចំនួន ៣៤នឹងបាត់បង់សិទ្ធិទទួលបានទិន្នន័យបំពុលដែលអាចទុកចិត្តបាន។

លោក Christi Chester-Schroeder អ្នកគ្រប់គ្រងវិទ្យាសាស្ត្រគុណភាពខ្យល់របស់ IQAir បានព្រមានថា ការប្រែប្រួលអាកាសធាតុកំពុងដើរតួនាទីកាន់តែកើនឡើងក្នុងការជំរុញការបំពុល។ លើសពីនេះជាមួយនឹងសីតុណ្ហភាពកាន់តែខ្ពស់បណ្តាលឱ្យមានភ្លើងឆេះព្រៃកាន់តែខ្លាំង និងយូរជាងនេះ ដែលបានលេបត្របាក់តំបន់អាស៊ីអាគ្នេយ៍ និងអាមេរិកខាងត្បូង។

គួរបញ្ជាក់ផងដែរថាយោងតាមរបាយការណ៍នេះ ប្រទេសឆាដ និងបង់ក្លាដែស មានកម្រិតខ្យល់ពុលជាមធ្យមខ្ពស់ជាង ១៥ ដង ខ្ពស់ជាងការណែនាំរបស់ WHO កាលពីឆ្នាំមុន។ ប្រទេសឆាដជាប់ចំណាត់ថ្នាក់ជាប្រទេសដែលមានការបំពុលច្រើនបំផុតក្នុងឆ្នាំ ២០២២ដោយសារតែធូលីពីវាលខ្សាច់សាហារ៉ា ក៏ដូចជាការដុតបំផ្លាញសំណល់ដំណាំដែលមិនអាចគ្រប់គ្រងបាន៕

អត្ថបទ៖ ប៊ុន​ សុភាព