រថភ្លើងបុកឡានបណ្តាល​ឲ្យស្លាប់​និង​របួស​២០​នាក់​​នៅភាគឦសាន​អេហ្ស៊ីប

យ៉ាងហោចណាស់មនុស្ស៨នាក់បានស្លាប់ និង១២នាក់ផ្សេងទៀតបានរងរបួស ក្នុងហេតុការណ៍រថភ្លើងដឹកអ្នកដំណើរ​បុក​ជាមួយ​ឡានក្រុងធុនតូចមួយគ្រឿងក្នុងទីក្រុង Ismailia ភាគឦសាននៃប្រទេសអេហ្ស៊ីប។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១៤ខែមីនានេះ។

ហេតុការណ៍នេះបានកើតឡើងនៅពេលដែលឡានក្រុងធុនតូចបាន​ព្យាយាមឆ្លងកាត់ផ្លូវរថភ្លើងដែលមិនមានការអនុញ្ញាត្ត​​ឲ្យ​ប្រើប្រាស់​​។ ក្រសួងសុខាភិបាលបានបញ្ជូនរថយន្តសង្គ្រោះចំនួន១៣គ្រឿង ទៅកាន់កន្លែងកើតហេតុ ដើម្បីដឹកជនរងគ្រោះទៅមន្ទីរពេទ្យ East Qantara Centralដើម្បីព្យាបាល ដែលក្នុងចំណោមនោះមានកុមារម្នាក់ស្ថិតក្នុងស្ថានភាពធ្ងន់ធ្ងរ។

ការិយាល័យប្រព័ន្ធផ្សព្វផ្សាយរបស់រដ្ឋាភិបាលក្នុងតំបន់ បាន​ផ្សាយ​ថា នាយករដ្ឋមន្ត្រីអេហ្ស៊ីបលោក Mustafa Madbouly បាន​បញ្ជាឱ្យបង់ប្រាក់ចំនួន១០ម៉ឺន​ផោនអេហ្ស៊ីប ស្មើនឹង១៩៧០ដុល្លារ ដល់គ្រួសារនៃជនរងគ្រោះម្នាក់ៗដែលបានបាត់បង់ជីវិតនៅក្នុងឧប្បត្តិហេតុនេះ។

​មាន​ការ​កត់សម្គាល់​​ឃើញថា ការបុកគ្នាឬការក្រឡាប់ទាក់ទងនឹងរថភ្លើងគឺជារឿងធម្មតានៅក្នុងប្រទេសអេហ្ស៊ីប ដែលមានប្រព័ន្ធផ្លូវដែកចាស់ៗ​ ហើយក៏ត្រូវបានញាំញីដោយការគ្រប់គ្រងមិនត្រឹមត្រូវផងដែរ។

កាល​ពី​ខែ​តុលាឆ្នាំ​មុន ក៏​កើត​មាន​ហេតុការណ៍រថភ្លើង​បុកគ្នាក្នុង​ទីក្រុង Cairo នៅ​ភាគ​ខាង​ត្បូង​ប្រទេស​អេហ្ស៊ីប​។ ចំណែកគ្រោះមហន្តរាយផ្លូវដែកដ៏សាហាវបំផុតរបស់ប្រទេសនេះគឺបានកើតឡើងក្នុងឆ្នាំ២០០២ នៅក្នុងស្រុក Ayyat ខេត្ត Giza ដែលមានភ្លើងឆេះនៅក្នុងរថភ្លើងធ្វើដំណើរពីទីក្រុង Cairo ទៅ Luxor សម្លាប់មនុស្សជាង៣៨០នាក់។

ទោះយ៉ាងណាក្នុងប៉ុន្មានឆ្នាំថ្មីៗនេះ រដ្ឋាភិបាលបានប្រកាសពីគំនិតផ្តួចផ្តើមដើម្បីកែលម្អផ្លូវដែករបស់ខ្លួន។ លោកប្រធានាធិបតី Abdel-Fattah el-Sissi បាននិយាយនៅក្នុងឆ្នាំ២០១៨ ថា នឹងចំណាយទឹកប្រាក់ប្រមាណ ៨.១៣ពាន់លានដុល្លារដើម្បីជួសជុលបណ្តាញផ្លូវដែកឱ្យបានត្រឹមត្រូវ៕

អត្ថបទ៖ ប៊ុន សុភាព