ព័ត៌មានអន្ដរជាតិ

អ៊ុយក្រែនធ្វើតេស្តជោគជ័យលើដ្រូនថ្មីអាចបញ្ជាហោះបាន៣០០០គីឡូម៉ែត្រចូលដីរុស្ស៊ី

បានផុស

១ សប្តាហ៍ មុន

នៅ

ថ្ងៃអង្គារ ១៨ មីនា ២០២៥

ដោយ

ដ្រូនប្រភេទថ្មីផលិតក្នុងស្រុករបស់អ៊ុយក្រែនអាចត្រូវបានបញ្ជាហោះចម្ងាយ៣០០០គីឡូម៉ែត្រ ដោយកំណត់គោលដៅវាយប្រហារលើរោងចក្រចម្រាញ់ប្រេង និង មូលដ្ឋានកងទ័ពរុស្ស៊ីនៅតំបន់ឆ្ងាយ លើសពីការវាយប្រហារនៅតំបន់ព្រំដែននិងទីក្រុងមូស្គូ ដែលយោធាអ៊ុយក្រែនធ្លាប់ធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលអ៊ុយក្រែនបានអះអាងថា មន្ត្រីរបស់ខ្លួនអភិវឌ្ឍ ផលិត និង សាកល្បងដោយជោគជ័យលើយន្តហោះគ្មានមនុស្សបើក (ដ្រូន) រយៈចម្ងាយឆ្ងាយដែលអាចត្រូវបានបញ្ជារហូតដល់ចម្ងាយ៣០០០គីឡូម៉ែត្រចូលជ្រៅដល់ទឹកដីរុស្ស៊ីពីព្រំដែនរបស់ប្រទេសអ៊ុយក្រែន និងឆ្ងាយរហូតដល់ ទីក្រុង Novosibirskនៅភាគខាងជើងប្រទេសម៉ុងហ្គោលីឯណោះ។

ការប្រកាសរបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ត្រូវបានចុះផ្សាយនៅលើគេហទំព័រយោធារបស់អ៊ុយក្រែនឈ្មោះថា «Militarnyi» កាលថ្ងៃទី១៧ខែមីនា។ ការប្រកាសនេះក៏នៅបន្ទាប់ពីការប្រកាសពីការធ្វើតេស្តសាកល្បងលើការអភិវឌ្ឍន៍មីស៊ីលផ្លោងរយៈចម្ងាយឆ្ងាយផលិតនៅក្នុងស្រុកកាលពីពីរថ្ងៃមុន។

ការចេញផ្សាយរបស់គេហទំព័រយោធារបស់អ៊ុយក្រែននោះ បានឲ្យដឹងថា យន្តហោះគ្មានមនុស្សបើក (drone) របស់ប្រទេសអ៊ុយក្រែនត្រូវបានធ្វើតេស្តសាកល្បងដោយជោគជ័យ ដែលអាចហោះបានចម្ងាយឆ្ងាយរហូតដល់៣០០០គីឡូម៉ែត្រ ដែលអាចកំណត់គោលដៅវាយប្រហារលើហេដ្ឋារចនាសម្ព័ន្ធផលិតកម្មប្រេងឥន្ធនៈរបស់មហាអំណាចរុស្ស៊ី។

គេហទំព័រនេះ បានស្រង់សម្តីប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ដូចបានប្រកាសថា៖«ថ្ងៃនេះខ្ញុំជួបប្រជុំ។ មានរឿងរ៉ាវជាច្រើនដែលបានពិភាក្សា ប៉ុន្តែរឿងសំខាន់បំផុត១គឺដ្រូន។ ដ្រូនគ្រប់ប្រភេទដែលយើងត្រូវការ។ មានដំណឹងរីករាយពាក់ព័ន្ធដ្រូនចម្ងាយឆ្ងាយ។ ដ្រូនរបស់យើងហោះបានចម្ងាយ៣០០០គីឡូម៉ែត្រ បានឆ្លងផុតការធ្វើតេស្តជោគជ័យហើយ។ ខ្ញុំសូមថ្លែងអំណរគុណដល់ក្រុមអភិវឌ្ឍន៍និងផលិត។ យើងកំពុងអភិវឌ្ឍប្រព័ន្ធអាវុធចម្ងាយឆ្ងាយដែលយើងនឹងជួយធានានូវសន្តិសុខរដ្ឋរបស់យើង»។

តាមរយៈការអភិវឌ្ឍដ្រូនប្រភេទនេះបង្កើន រដ្ឋាភិបាលអ៊ុយក្រែនបានដាក់គោលដៅសំខាន់ៗប្រកបដោយសក្តានុពលច្រើនទៀតក្នុងទឹកដីរុស្ស៊ី ដែលអាចពង្រីកដល់ឆ្ងាយរហូតដល់ Novosibirsk។ ជាក់ស្តែងបំផុត រោងចក្រចម្រាញ់ប្រេងឥន្ធនៈធំបំផុតក្នុងប្រទេសរុស្ស៊ីនៅតំបន់ Omsk ដែលឥឡូវនេះអាចបញ្ជាទៅដល់។

គេហទំព័រយោធាដដែលនេះ បានលើកឡើងថា កន្លងមក ការវាយប្រហារឆ្ងាយបំផុតតគឺនៅមូលដ្ឋានទ័ពអាកាស Olenya ក្នុងខេត្ត Murmansk ដែលមានចម្ងាយប្រហែល១៨០០គីឡូម៉ែត្រពីព្រំដែនអ៊ុយក្រែន៕

ដោយ រ៉ាន់ រើយ