ត្រាំ និយាយដោយចំហថា លោកមិនពេញចិត្ត ហ្សេលេនស្គី និងថែមទាំងបន្ទោសចំៗ

ក្នុងសន្និសីទកាសែតជាមួយនាយករដ្ឋមន្ត្រីអ៊ីតាលីនៅសេតវិមានកាលពីថ្ងៃព្រហស្បតិ៍ទី១៧ខែមេសាឆ្នាំ២០២៥, ប្រធានាធិបតីអាមេរិក ដូណាល់ ត្រាំ បាននិយាយដោយចំហនិងបន្ទោសចំៗថា លោកមិនសប្បាយចិត្តជាមួយមេដឹកនាំអ៊ុយក្រែនឡើយ ហើយមិនពេញចិត្តទាល់តែសោះចំពោះវិធីដែលលោក ហ្សេលេនស្គី ប្រើដើម្បីដោះស្រាយជម្លោះជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រាំនិយាយយ៉ាងច្បាស់ថា «ខ្ញុំមិនឲ្យហ្សេលេនស្គី ទទួលខុសត្រូវចំពោះអ្វីដែលបានកើតឡើងនោះទេ ប៉ុន្តែខ្ញុំពិតជាមិនពេញចិត្តមែន ចំពោះដើមចមដែលនាំឲ្យសង្គ្រាមផ្ទុះឡើង។ រុស្ស៊ីមានកម្លាំងទ័ពធំជាងអ៊ុយក្រែន បើអ្នកឆ្លាត អ្នកមិនគួរឲ្យកើតមានសង្គ្រោះនោះទេ»។

ស្របពេលជាមួយគ្នានោះ លោកត្រាំបន្ទោសមេដឹកនាំអ៊ុយក្រែន ខ្លាំងៗថា «ហ្សេលេនស្គី មិនព្រមចុះកិច្ចព្រមព្រៀងសន្តិភាពជាមួយទីក្រុងមូស្គូ។ អ្នកមិនគួរធ្វើសង្រ្គាមជាមួយនរណាម្នាក់ដែលធំជាងខ្លួន២០ដង ហើយបែរជាទៅរំពឹងគេផ្សេងដែលថានឹងជួយមីស៊ីលដល់អ្នកនោះទេ»។

លោក ត្រាំ ត្រូវគេស្គាល់ច្បាស់ថា មិនមែនជាអ្នកដែលគាំទ្រអ៊ុយក្រែននោះទេ នៅក្នុងសង្គ្រាមជាមួយរុស្ស៊ី។ តាំងពីមុនកាន់អំណាចជាប្រធានាធិបតីអាមេរិកអាណត្តិទី២មក អ្នកសាធារណរដ្ឋរូបនេះតែងតែជំទាស់ចំពោះការផ្តល់ជំនួយដល់ទីក្រុងកៀវ និងព្រមានកាត់ជំនួយម្តងហើយម្តងទៀត។

អ្វីដែលកាន់តែក្តៅ គឺព្រឹត្តិការណ៍កក្រើកពិភពលោកថ្ងៃទី២៨ខែកុម្ភៈ ដែលលោកត្រាំនិងហ្សេលេនស្គី បានឈ្លោះគ្នាបែកផ្សែងនៅការិយាល័យពងក្រពើ អំឡុងពេលមេដឹកនាំអ៊ុយក្រែន ធ្វើដំណើរទៅសហរដ្ឋអាមេរិក ដើម្បីស៊ីញេលើកិច្ចព្រមព្រៀងរ៉ែកម្រជាថ្នូរនឹងជំនួយយោធា។

ជម្លោះនោះបានចាប់ផ្តើមនៅ​ពេលលោក ត្រាំ ចោទ​លោក ហ្សេលេនស្គី ថា​មិនចេះ​ដឹង​គុណដល់​ការ​គាំទ្រ​របស់​សហរដ្ឋ​អាមេរិក ហើយបន្ទោសថា អ៊ុយក្រែន កំពុងលលេងជាមួយសង្គ្រាមលោកលើកទី៣ ដោយសារតែមិនព្រមស្វែងរកសន្តិភាពជាមួយរុស្ស៊ី។ 

យ៉ាងណាក្តី លោក ហ្សេលេនស្គី បានការពារជំហររបស់អ៊ុយក្រែន ដោយសង្កត់ធ្ងន់លើតម្រូវការសម្រាប់ការធានាសន្តិសុខដ៏រឹងមាំ និងបង្ហាញពីក្តីបារម្ភថា បើលែងមានការគាំទ្រនោះរុស្ស៊ីនឹងឈ្លានពានកាន់តែខ្លាំង ហើយក្រោយការប្រកែកគ្នាយ៉ាងតឹងសរសៃ.ក លោក ហ្សេលេនស្គី ក៏ចាកចេញពីសេតវិមាន ចំណែកសន្និសីទកាសែតក៏ត្រូវលុបចោល រីឯកិច្ចព្រមព្រៀងរ៉ែ ក៏មិនបានចុះហត្ថលេខាដែរ៕

អត្ថបទ៖ សុខ សុវណ្ណ

ចុចអាន៖ Trump និង Zelensky ឈ្លោះគ្នានៅសេតវិមាន ផ្អើលពិភពលោក