ព័ត៌មានអន្ដរជាតិ

EU ប្រកាសដកទណ្ឌកម្មសេដ្ឋកិច្ចលើស៊ីរី ដែលធ្លាប់ដាក់កាលពីរបបលោក Assad

បានផុស

៣៨ វិនាទី មុន

នៅ

ថ្ងៃពុធ ២១ ឧសភា ២០២៥

ដោយ

Chheang

លោកស្រី Kaja Kallas ប្រធានគោលនយោបាយសហភាពអឺរ៉ុប បានប្រកាសកាលពីថ្ងៃទី២០ខែឧសភាថា សហភាពអឺរ៉ុបនឹងដកទណ្ឌកម្មសេដ្ឋកិច្ចជាផ្លូវការលើស៊ីរី ក្នុងគោលបំណងជួយសម្រួលដល់ការងើបឡើងវិញរបស់ប្រទេសមួយនេះ បន្ទាប់ពីការដួលរលំនៃរបបអតីតប្រធានាធិបតី Bashar al-Assad ក្នុងខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Kallas បាននិយាយថា សហភាពអឺរ៉ុប«បានយល់ព្រមដកទណ្ឌកម្មសេដ្ឋកិច្ចទាំងអស់ដែលធ្លាប់បានដាក់ពាក់ព័ន្ធនឹងរបបរបស់លោក Assad និងការរំលោភសិទ្ធិមនុស្ស»។

ការបន្ធូរបន្ថយទណ្ឌកម្មនេះ មានលក្ខខណ្ឌនិងអាចត្រូវបានដាក់ឡើងវិញម្ដងទៀត ដោយផ្អែកលើដំណើរការរបស់រដ្ឋាភិបាលស៊ីរីថ្មីក្នុងការលើកកម្ពស់សន្តិភាព ការការពារសិទ្ធិមនុស្ស និងការជំរុញស្ថិរភាពសេដ្ឋកិច្ច។ ទោះទណ្ឌកម្មសេដ្ឋកិច្ចត្រូវបានដកចេញ សហភាពអឺរ៉ុបនឹងរក្សាដដែលនូវវិធានការដាក់ទណ្ឌកម្មប្រឆាំងនឹងបុគ្គលដែលមានទំនាក់ទំនងជាមួយលោក Assad និងអ្នកដែលជាប់ពាក់ព័ន្ធក្នុងការរំលោភសិទ្ធិមនុស្ស។

លោកស្រី Kallas បានសង្កត់ធ្ងន់ថា «គ្មានសន្តិភាពទេបើគ្មានផ្លូវទៅរកការងើបឡើងវិញនៃសេដ្ឋកិច្ច។ យើងទាំងអស់គ្នាត្រូវការស៊ីរីដែលមានស្ថិរភាព…យើងត្រូវផ្ដល់ឱកាសឲ្យប្រជាជនស៊ីរី»។

រដ្ឋមន្ត្រីការបរទេសស៊ីរី លោក Asaad al-Shaibani បានស្វាគមន៍ចំពោះការសម្រេចចិត្តរបស់សហភាពអឺរ៉ុប ដោយបញ្ជាក់ថា វាជាឱកាសប្រវត្តិសាស្ត្រ និងឆ្លុះបញ្ចាំងពីការប្តេជ្ញាចិត្តរបស់សហគមន៍អន្តរជាតិ ដើម្បីគាំទ្រការស្តារឡើងវិញរបស់ស៊ីរី។

ចំណាត់ការរបស់សហភាពអឺរ៉ុប ធ្វើឡើងបន្ទាប់ពីការសម្រេចចិត្តថ្មីៗរបស់សហរដ្ឋអាមេរិកក្នុងការបន្ធូរបន្ថយទណ្ឌកម្មលើស៊ីរី។ បន្ទាប់ពីកិច្ចប្រជុំជាមួយប្រធានាធិបតីថ្មីរបស់ស៊ីរី លោក Ahmed al-Sharaa លោកប្រធានាធិបតី ដូណាល់ ត្រាំ បានប្រកាសថា អាមេរិកនឹងដកទណ្ឌកម្ម ដោយមានគោលបំណងទប់ស្កាត់អស្ថិរភាពបន្ថែមទៀតនៅក្នុងតំបន់ និងគាំទ្រស៊ីរីឆ្ពោះទៅរកការងើបខ្លួនឡើងវិញ។

ការដកទណ្ឌកម្មត្រូវបានគេរំពឹងថានឹងអនុញ្ញាតឲ្យអាជីវកម្មអាមេរិក និងអង្គការក្រៅរដ្ឋាភិបាលចូលរួមក្នុងការកសាងឡើងវិញរបស់ស៊ីរី ជាពិសេសក្នុងវិស័យសំខាន់ៗដូចជា អគ្គិសនី ទឹក និងអនាម័យ។ ការវិវឌ្ឍនេះ ធ្វើឡើងបន្ទាប់ពីមានការអំពាវនាវពីអង្គការមនុស្សធម៌ ដែលជំរុញឲ្យមានការដកចេញនូវទណ្ឌកម្មយ៉ាងទូលំទូលាយ ដែលបានរារាំងការផ្តល់ជំនួយ និងធ្វើឲ្យប្រជាជនស៊ីរីរាប់លាននាក់រងទុក្ខវេទនា។

សូមបញ្ជាក់ថា ចាប់តាំងពីសង្គ្រាមស៊ីវិលផ្ទុះឡើងនៅក្នុងឆ្នាំ២០១១ ប្រជាជនស៊ីរីជាងកន្លះលាននាក់បានបាត់បង់ជីវិត និងរាប់លាននាក់ផ្សេងទៀតត្រូវបម្លាស់ទីលំនៅ បង្កជាវិបត្តិមនុស្សធម៌ដ៏ធ្ងន់ធ្ងរមួយនៅតំបន់មជ្ឈិមបូព៌ា៕