យក​អគារ​មង្គលការ​ពីរកន្លែង​ទៀត ត្រៀម​ទុក​ព្យាបាលអ្នក​ឆ្លងកូវីដ ១៩

ភ្នំពេញ៖ក្រសួងសុខាភិបាលបានយកអគារដឺព្រេមៀ សេនធ័រ សែនសុខនិងអគារវិមានពិភពថ្មីសែនសុខធ្វើជាទីតាំងសម្រាប់ព្យាបាលអ្នកជំងឺកូវីដ១៩នៅរាជធានីភ្នំពេញ។

លោកវេជ្ជបណ្ឌិត ងី ម៉េងហេង ប្រធានមន្ទីរសុខាភិបាលរាជធានីភ្នំពេញបានមានប្រសាសន៍នៅរសៀលថ្ងៃទី១៨មេសានេះថា ដោយសារស្ថានភាពជំងឺកូវីដ១៩នៅរាជធានីភ្នំពេញចេះតែបន្តកើនឡើងជាបន្តបន្ទាប់ ក្រសួងសុខាភិបាលបាន​យកអគារដឺព្រេមៀ សេនធ័រ សែនសុខ និងអគារវិមានពិភពថ្មីសែនសុខ ធ្វើជាទីតាំងសម្រាប់ព្យាបាលអ្នកជំងឺ​កូវីដ​១៩​នៅរាជធានីភ្នំពេញ។

អគារទាំងពីរទីតាំងនេះ អាចដាក់គ្រែសម្រាប់ព្យាបាលអ្នកជំងឺបានជិត២ពាន់គ្រែ ក្នុងនោះអគារដឺព្រេមៀ សេនធ័រ សែនសុខអាចដាក់បានជាង១ពាន់គ្រែ និងអគារវិមានពិភពថ្មីសែនសុខ អាចដាក់បានពី ៦០០ទៅ៧០០គ្រែ។

លោកបានបន្តថា នៅដើមសប្តាហ៍ក្រោយនេះ អគារទាំងពីរនេះអាចដំណើរការសម្រាប់ដាក់អ្នកជំងឺបានហើយដែលនឹងជួយសម្រាលបន្ទុកដល់អ្នកជំងឺក្នុងការមានទីកន្លែងសម្រាកព្យាបាល។

លោក ប្រធានមន្ទីរសុខាភិបាលរាជធានីភ្នំពេញបានឲ្យដឹងថា បើគិតចាប់ពីថ្ងៃទី០៧ខែមេសារហូតមកដល់ពេលនេះនៅរាជធានីភ្នំពេញមានអ្នកឆ្លងជំងឺកូវីដ១៩ប្រមាណជាង២ពាន់នាក់ ហើយកំពុងធ្វើចត្តាឡីស័កតាមផ្ទះនិងមណ្ឌលនានាជាង១ម៉ឺននាក់៕

អត្ថបទ៖ សំអឿន