ព័ត៌មានជាតិ

រកឃើញអ្នកពាក់ព័ន្ធផ្ទាល់ និងប្រយោល ជាមួយអ្នកផ្ទុកកូវីដ១៩ ជិត៤០នាក់ នៅស្រុករុក្ខគិរី

បានផុស

៤ years មុន

នៅ

ថ្ងៃព្រហស្បតិ៍ ២២ មេសា ២០២១

ដោយ

បាត់ដំបង ៖ មន្ត្រីសុខាភិបាល បានអះអាងថា រកឃើញអ្នកពាក់ព័ន្ធ ចំនួនជិត៤០នាក់ ដែលប៉ះពាល់ ផ្ទាល់និងប្រយោលជាមួយបុរសឈ្មោះ យ៉ាន គឹមយ៉ា អាយុ២៧ឆ្នាំ រស់នៅភូមិខ្នាចអំពរ ឃុំព្រែកជីក ស្រុករុក្ខគីរី ខេត្តបាត់ដំបងដែលជាអ្នក រកស៊ីដឹកម្នាស់ លក់នៅផ្សារនាគ មាសរាជធានីភ្នំពេញ ក្រោយពិនិត្យឃើញថា មានវិជ្ជមានកូវីដ១៩ កាលពីថ្ងៃទី២០ខែមេសា កន្លងទៅថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍របស់លោកឱសថបណ្ឌិត វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង នាព្រលប់ថ្ងៃទី២១ខែមេសា បានបញ្ជាក់ឲ្យដឹងថា បុរសដែលក្រុមគ្រូពេទ្យបានរកឃើញវិជ្ជមានកូវីដ១៩ខាងលើនេះ មានប្រវត្តិ ថ្ងៃទី១១មេសា២០២១ ដឹកម្នាស់ ទៅផ្សារនាគមាស និង ថ្ងៃ១២ខែមេសា បានត្រឡប់មកខេត្តបាត់ដំបង វិញជាមួយអ្នកបើកឡានជាមួយគ្នា២នាក់។

បុរសរូបនេះ បានសម្រាកជាមួយប្រពន្ធនិងកូន២នាក់ ចាប់ពីថ្ងៃ ទី១២មេសាដល់ថ្ងៃទី២០មេសា (ប្រពន្ធជាគ្រូបង្រៀនបានចាក់វ៉ាក់សាំង២លើករួចមកហើយ) និងបានប៉ះពាល់ជាមួយ មិត្តភក្តិក្នុង ភូមិចំនួន១៥នាក់ (ដែលមន្ត្រីសុខាភិបាលនិង អាជ្ញាធរបាន ចុះស្រាវជ្រាវជាបន្ទាន់)។

បុរសនេះ បានប៉ះពាល់ប្រយោលចំនួន២០នាក់ ត្រូវបានដាក់ឲ្យធ្វើចត្តាឡីស័កនៅវិទ្យាល័យមោងឫស្សី ជាមួយគ្នា (ដែលលទ្ធផលតេស្តលើកទី១អវិជ្ជមានកូវីដ១៩)។ មន្ទីរសុខាភិបាលបញ្ជាក់ថា បុរសមានវិជ្ជមានកូវីដ១៩ខាងលើនេះ កំពុងដាក់ឲ្យ ព្យាបាលនៅ មន្ទីរពេទ្យ បង្អែកខេត្តបាត់ដំបង។

សូមបញ្ជាក់ថាក្រោយពីរកឃើញវិជ្ជមានកូវីដ១៩លើបុរសខាងលើនេះ រដ្ឋបាលខេត្តបាត់ដំបងសម្រេចបិទខ្ទប់ភូមិខ្នាចអំពរ ឃុំព្រែកជីក ស្រុករុក្ខគីរី ខេត្តបាត់ដំបង ជាតំបន់ ដែលមានការរីករាលដាលជំងឺកូវីដ១៩ក្នុងព្រឹត្តិការណ៍២០កុម្ភៈ រយៈពេល១៤ថ្ងៃ ចាប់ពីម៉ោងសូន្យថ្ងៃទី២២ ខែមេសា ដល់ថ្ងៃទី ០៥ ខែឧសភា ឆ្នាំ ២០២១ ក្នុងបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលជំងឺកូវីដ១៩ កុំឲ្យរាលដាលទៅតំបន់ផ្សេងទៀត៕

ដោយ ៖ សោ និយមរដ្ឋ