បុរសម្នាក់ត្រូវបញ្ជូនទៅតុលាការភ្លាមៗ បន្ទាប់ពីផ្សាយព័ត៌មាន​ញុះញង់តាមតិកតុក

កម្លាំងនគរបាលប្រឆាំងភេវរកម្ម និងឧក្រិដ្ឋកម្មឆ្លងដែននៃស្នងការនគរបាលខេត្តកំពង់ឆ្នាំង នៅព្រឹកថ្ងៃទី ២៦ ខែមេសានេះ បានចាប់បញ្ជូនបុរសម្នាក់ទៅតុលាការ ដែលបានកាត់តវីដេអូប្រសាសន៍សម្តេចតេជោ ហ៊ុន សែន ផ្សាយតាមប្រព័ន្ធសង្គមតិក​តុក ក្នុងចេតនាញុះញង់បង្ករអសន្តិសុខក្នុងសង្គម។

លោកឧត្តមសេនីយ៍ត្រី អៀរ ប៊ុនធឿន អ្នកនាំពាក្យស្នងការនគរបាលខេត្តកំពង់ឆ្នាំងបានឱ្យដឹងថា បុគ្គលឈ្មោះ ភឹម ផាយផាត់ អាយុ៣៩ឆ្នាំ រស់នៅក្នុងភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ បានបង្ហោះរូបភាព និងសារសំឡេងសម្តេចតេជោ ហ៊ុន សែន ភ្ជាប់នូវការនិយាយបន្ថែមខ្លួនឯងខុសពីការពិតពាក់ព័ន្ធនឹងចំណាត់ការរបស់រាជរដ្ឋាភិបាលលើបញ្ហាជំងឺកូវីដ១៩ដែលកំពុងឆ្លងរាលដាលក្នុងសហគមន៍ ដោយក្នុងខ្លឹមសារបង្ហោះនោះបាននិយាយថា “ចប់ហើយបងប្អូនអើយ ខ្ញុំអាណិតដល់កម្មករកម្មការនី ៣ខែទៀត”៕