ព័ត៌មានជាតិ

មេឃុំព្រែកខ្សាច់ ច្រានចោលព័ត៌មានថាមានសកម្មភាពកាប់ព្រៃកោងកាងជាង២០០ហិចតា

បានផុស

៥ years មុន

នៅ

ថ្ងៃអង្គារ ១ មិថុនា ២០២១

ដោយ

កោះកុង៖ លោកមេឃុំព្រែកខ្សាច់ បដិសេធច្រានចោលនូវព័ត៌មានដែលមានសកម្មភាពលួចកាប់រុករានដីព្រៃកោងកាងជាង២០០ហិចតានៅចំណុចភ្នំពយអគ្គីនេត្រ ស្ថិតនៅក្នុងភូមិព្រែកខ្សាច់ ហើយលោកចាត់ទុកថាការបង្ហោះហ្វេសប៊ុក និងចុះផ្សាយព័ត៌មានដែលរឿងរ៉ាវយូរឆ្នាំមកហើយនេះគឺក្នុងន័យញុះញង់បង្កឱ្យអសន្តិសុខសណ្តាប់ធ្នាប់នៅមូលដ្ឋានរបស់ខ្លួន។

លោក រៀម រុំ មេឃុំព្រែកខ្សាច់ នៃស្រុកគិរីសាគរ ខេត្តកោះកុង បានពន្យល់នៅថ្ងៃទី១ ដើមខែមិថុនា ឆ្នាំ២០២១នេះថា គ្មានទៀតទេសកម្មភាពរបស់ក្រុមពលរដ្ឋខិលខូចលួចទន្ទ្រានកាប់ដីព្រៃកោងការដែលលាតសន្ធឹងចាប់ពីភ្នំពយអគ្គីនេត្រាដល់ព្រែករូង។ ដូច្នេះលោកសុំបដិសេធទាំងស្រុង គ្រាព័ត៌មាននេះចាស់តាំងពីឆ្នាំ២០២០មកម្ល៉េះយកមកកកកាយឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តទៀតថា រាល់ការបង្ហោះព័ត៌មាន និងផ្សព្វផ្សាយលក្ខណៈប្រឌិត២ទៅ៣ថ្ងៃមកនេះ គឺក្នុងបំណងធ្វើឱ្យខូចសេចក្តីថ្លៃថ្នូរ បម្រើប្រយោជន៍មនុស្សមួយក្រុមតូច ព្រមទាំងបង្កការភ័ន្តច្រឡំយ៉ាងខ្លាំងពីសាធារណជនទូទៅមកលើរូបលោកទាំងបាននឹងកំពុងយកចិត្តទុកដាក់ពីការអភិវឌ្ឍន៍ និងកាតព្វកិច្ចចំពោះមុខការពារថែរក្សាព្រៃឈើក្នុងសហគមន៍។

លោក រៀម រុំ បញ្ជាក់ដែរថា មានជនខិលខូចមួយក្តាប់តូចព្យាយាមញុះញុង់បំប៉ោងព័ត៌មានដែលខុសពីការពិតពីព្រោះតែភាពច្រណែនគ្នីគ្នាទៅមកតាមរយៈការកាប់រុករានដីព្រៃកោងកាងទាំងបំពានច្បាប់។ ចំណែកផ្ទៃដីព្រៃរងប៉ះពាល់កន្លងទៅ មានតែទំហំជាង២ហិចតាប៉ុណ្ណោះ បែរជានិយាយថាជាង២០០ហិចតា និងថែមទាំងលក់ដូរតម្លៃ៣ពាន់ទៅ៤៥០០ដុល្លារទៅវិញ។

ជាក់ស្តែងរូបលោក ក៏បានសុំកិច្ចអន្តរាគមន៍ពីរដ្ឋបាលស្រុក និងមន្ត្រីជំនាញបរិស្ថានចុះពិនិត្យជាក់ស្តែង និងផ្សព្វផ្សាយអប់រំណែនាំបន្តបន្ទាប់កុំឱ្យបន្តធ្វើសកម្មភាព ដើម្បីបម្រុងទុកអភិវឌ្ឍន៍ ឬតម្រូវការចាំបាច់ណាមួយទៅអនាគត។ អ្វីរឹតតែបដិសេធទៀត គឺលោកពុំបានហ៊ានចុះហត្ថលេខាទទួលស្គាល់លិខិតទិញលក់ដីនៅតំបន់សហគមន៍ដូចការចោទប្រកាន់ឡើយ ករណីបើមានគឺមានកាលអាណត្តិអតីតមេឃុំមុនៗឯណោះ។

រឿងរ៉ាវបទល្មើសធនធានធម្មជាតិ គឺលោក ហ៊ុន ម៉ាឌី ប្រធានមន្ទីរបរិស្ថានខេត្តកោះកុង ទទួលស្គាល់ថាជាព័ត៌មានចាស់ហើយត្រូវបានគេផ្សាយឡើងវិញឱ្យមានការយល់ច្រឡំដល់មហាជន។ មែនទែនទៅ តំបន់ទំនាស់ខាងលើ មួយផ្នែកបានក្លាយជាដីសហគមន៍ហើយ ដោយរាជរដ្ឋាភិបាលកម្ពុជាសម្រេចកាត់ប្រគល់ដល់រដ្ឋបាលខេត្តកោះកុងជាអ្នកគ្រប់គ្រងថែរក្សា។

លោកប្រធានមន្ទីរបរិស្ថានខេត្ត អះអាងបន្ថែមថា សកម្មភាពកាប់បំផ្លាញយកធ្វើកម្មសិទ្ធិពីជនខិលខូចកន្លងទៅពិតជាមានប្រាកដមែន ប៉ុន្តែមិនច្រើនដល់ខ្ទង់រាប់រយហិចតាឡើយ។ សំណុំរឿងនេះ ក៏ត្រូវបានបញ្ជូនទៅតុលាការខេត្តកោះកុង ដើម្បីឲ្យអាជ្ញាធរមូលដ្ឋានស្វែងរកមុខជនពាកព័ន្ធឲ្យទទួលខុសត្រូវចំពោះមុខច្បាប់ស្តីពីកិច្ចការពារធនធានធម្មជាតិ៕

ដោយ ៖ សិរីវឌ្ឍនៈ

Related Topics:បដិសេធ ច្រានចោល

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា