បង្ក្រាបសង្វៀនជល់មាន់នៅខណ្ឌដង្កោ​ ដកហូតរថយន្ត​២គ្រឿងនិងម៉ូតូ៥គ្រឿង

ភ្នំពេញ ៖ លោក ទុយ ច័ន្ទ អភិបាលរងខណ្ឌដង្កោ ដឹកនាំកម្លាំងឆ្មក់បង្ក្រាបទីតាំងសង្វៀនជល់មាន់ លេងអាប៉ោង លេងបៀរ មួយកន្លែងនៅក្បែរទីលានចាក់សំរាមភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ ។

សកម្មភាពរបស់កម្លាំងគណៈបញ្ជាការឯកភាពរដ្ឋបាលខណ្ឌដង្កោឆ្មក់បង្ក្រាបទីតាំងល្បែងនេះ កើតឡើងកាលពីវេលាម៉ោង១៣និង២០ រសៀលថ្ងៃទី២៤ ខែសីហា ឆ្នាំ២០២១ ។

លោក ទុយ ច័ន្ទ អភិបាលរងខណ្ឌដង្កោ ប្រាប់អោយដឹងថា ការបង្ក្រាបទីតាំងល្បែងបានជោគជ័យនេះ គឺបន្ទាប់ពីទទួលបានព័ត៌មានសំងាត់ពីប្រជាពលរដ្ឋល្អ ទើបលោកដឹកនាំកម្លាំងសណ្តាប់ធ្នាប់សាលាខណ្ឌ សហការជាមួយនគរបាលប៉ុស្តិ៍រដ្ឋបាលដង្កោ និងកម្លាំងនគរបាលអធិការដ្ឋាននគរបាលខណ្ឌដង្កោ ឆ្មក់ចុះភ្លាមៗ ។

ក្នុងប្រតិបត្តិការខាងលើមិនមានឃាត់មនុស្សនោះទេ ដោយសារពេលកម្លាំងចុះដល់ទីតាំង គឺក្រុមញៀនល្បែងបានរត់គេចអស់ ហើយកម្លាំងបានដកហូត ម៉ូតូ៥គ្រឿង រថយន្ត២គ្រឿង ( រថយន្ត Ford ,រថយន្ត Prus ) ដែលចតនៅក្បែរ ទីតាំងសង្វៀនជល់មាន់នោះ នាំយកមកប្រគល់អោយសមត្ថកិច្ច នៃអធិការដ្ឋាននគរបាលខណ្ឌដង្កោចាត់ការបន្តតាមនីតិវិធី ។

ទោះបីយ៉ាងណាក្តីលោកអភិបាលរងខណ្ឌដង្កោ សូមសំណូមពរប្រជាពលរដ្ឋទាំងអស់ ចូលរួមអនុវត្តវិធានការ បង្ការការពារទប់ស្កាត់ការរីករាលជំងឺកូវីដ-១៩ ជាពិសេសជំងឺបំប្លែងថ្មី ( Delta) និងត្រូវប្រព្រឹត្តអំពើល្អ ស្របច្បាប់ បើមិនពុំនោះទេ អ្នកប្រព្រឹត្តខុស ត្រូវតែមានទោសចំពោះមុខច្បាប់ ៕

អត្ថបទ ៖ រ៉ាវុទ្ធ