ព័ត៌មានជាតិ

អាជ្ញាធរសម្រេចបិទខ្ទប់ភូមិមួយ ក្នុងស្រុកជើងព្រៃ ខណៈមានអ្នកឆ្លងជំងឺកូវីដ បំប្លែងថ្មី មកពីភ្នំពេញ

បានផុស

៤ years មុន

នៅ

ថ្ងៃអង្គារ ៣១ សីហា ២០២១

ដោយ

អាជ្ញាធរខេត្តកំពង់ចាម បានសម្រេចបិទខ្ទប់ភូមិមួយក្នុងស្រុកជើងព្រៃ ខណៈមានអ្នកឆ្លងជំងឺកូវីដ១៩ បំប្លែងថ្មី ដែលតា ចូលមកនៅក្នុងភូមិនេះ និងបន្តរកឃើញអ្នកវិជ្ជមានជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ូត ឈាងលី អភិបាលស្រុកជើងព្រៃ បានប្រាប់ឲ្យដឹងនៅល្ងាចថ្ងៃទី៣០ ខែសីហានេះថា ដោយសារមានស្ត្រីម្នាក់មកពីភ្នំពេញមានផ្ទុកកូវីដ-១៩ ប្រភេទដែលតា បានចូលមកលេងផ្ទះបងប្អូននៅក្នុងភូមិទទោល ឃុំគោគរវៀង ស្រុកជើងព្រៃ ក្រោយមកអាជ្ញាធរមូលដ្ឋានបានសហការជាមួយក្រុមគ្រូពេទ្យចុះពិនិត្យតាមដានអ្នក ដែលសង្ស័យប៉ះពាល់ផ្ទាល់ និងប្រយោល រកឃើញមានវិជ្ជមានកូវីដ-១៩បន្ថែមទៀត ទើបអាជ្ញាធរសម្រេចបិទខ្ទប់ភូមិទទោល មួយរយៈ សិន។

លោកអភិបាលជើងព្រៃ បានបន្ថែមទៀតថា គិតត្រឹមថ្ងៃទី៣០ ខែសីហានេះ អ្នកភូមិទទោល ក្នុងឃុំគោករវៀង មានចំនួន៥៣នាក់ហើយដែលមានវិជ្ជមានកូវីដ ប៉ុន្តែមិនទាន់បញ្ជាក់បានថា អ្នកជំងឺកូវីដអស់នេះ មានផ្ទុកវីរុសបំប្លែងថ្មី ដែលតា ឬយ៉ាងណាឡើយ ដោយរង់ចាំការបញ្ជាក់បន្ថែមទៀតពីវិទ្យាស្ថានប៉ាស្ព័រ។ ជាមួយគ្នានេះដែរ អាជ្ញាធរស្រុកនៅតែបន្តអំពាវនាវដល់បងប្អូនប្រជាពលរដ្ឋ ដែលធ្លាប់ប៉ះពាល់ ផ្ទាល់ឬប្រយោល ជាមួយអ្នកជំងឺកូវីដ ត្រូវចូលរួមសហការជាមួយក្រុមគ្រូពេទ្យ ដើម្បីយកសំណាកតេស្តរកវីរុសកូវីដ-១៩ និងបន្តអនុវត្ត វិធានការ សុខាភិបាល បីកុំ បីការពារឲ្យខ្ជាប់ខ្ជួនជានិច្ច។

សូមជម្រាបជូននៅថ្ងៃទី៣០ ខែសីហា ឆ្នាំ២០២១នេះ រដ្ឋបាលខេត្តកំពង់ចាម បានចេញសេចក្តីប្រកាសព័ត៌មាន ស្តីពីការបិទខ្ទប់ភូមិទទោល ឃុំគោករវៀង ស្រុកជើងព្រៃ រយៈពេល១៤ថ្ងៃសិន ខណៈដែលមានប្រជាជនឆ្លងជំងឺកូវីដ-១៩ ក្នុងព្រឹត្តិការណ៍២០កុម្ភៈ៕

អត្ថបទ៖ ហុង ម៉េងហៀ