អាជ្ញាធរជាតិអប្សរា អនុវត្តវិធានការ លើដើមឈើមានហានិភ័យខ្ពស់ នៅខ្លោងទ្វារជ័យក្រុងអង្គរធំ

គណៈកម្មការ អាជ្ញាធរជាតិអប្សរា បាននិងកំពុងចុះត្រួតពិនិត្យ ចំពោះដើមឈើមួយចំនួន នៅខ្លោងទ្វារជ័យក្រុងអង្គរធំ ដែលមានហានិភ័យខ្ពស់រៀបចំកាត់ និងបង្កលក្ខណៈងាយស្រួល សម្រាប់ការទស្សនាទេសភាពខ្លោងទ្វារ។

​ដើម្បី​ធានា​សុវត្ថិភាព​ជូន​ភ្ញៀវទេសចរ ជៀសវាង​គ្រោះថ្នាក់​ប៉ះពាល់​ដល់​អាយុជីវិត និង​បង្ការ​ការ​បាក់​ធ្លាក់​មែកឈើ ឬ​ដួលរលំ​ដើមឈើ ដែល​នឹង​អាច​បណ្តាល​ឲ្យ​ខូចខាត​ដល់​ចម្លាក់​ថ្ម​បង្កាន់ដៃ​នាគ​ផង និង​បង្ក​លក្ខណៈ​ងាយស្រួល ​សម្រាប់​ការ​ទស្សនា​ទេសភាព​ខ្លោងទ្វារ អាជ្ញាធរ​ជាតិ​អប្សរា បាន​ពិនិត្យ និង​អនុវត្ត​វិធានការ​បន្ទាន់​ ចំពោះ​ដើមឈើ​មួយ​ចំនួន​ ដែល​មាន​ហានិភ័យ​ខ្ពស់​។​

​លោក ឡុង កុសល អ្នក​នាំ​ពាក្យ​របស់​អាជ្ញាធរ អប្សរា បាន​ឲ្យ​ដឹងថា នៅថ្ងៃនេះ អាជ្ញាធរ​អប្សរា បានធ្វើការ​កាត់​ក្រី និង​ដកហូត​ដើមឈើ​ដែលមាន​ហានិភ័យ​ខ្ពស់​នៅ​ខ្លោងទ្វារ​ជ័យ នៅក្នុង​ស្រុក​អង្គរធំ ហើយ​ដើមឈើ​ដែល​បាន​កាត់​ដកហូត​រួមមាន ដើម​ពង្រ​តូចៗ​១១​ដើម ស្នាយ​២​ដើម អាកាស្យា​១​ដើម ស្វាយ​១​ដើម ឈើទាល​តូច​១​ដើម ខ្ចាស់​១​ដើម និង​ស្លែង​តូច​១​ដើម ដែល​ស្ថានភាព​ដើមឈើ​ទាំងនេះ ដុះ​ទ្រេត​ជាប់​នឹង​រចនាសម្ព័ន្ធ​ថ្ម​ប្រាសាទ មាន​មែក​ដុះ​គ្របពីលើ​បង្កាន់ដៃ​នាគ​។ ចំណែក​ដើមឈើ​បាន​កាត់​ក្រី​មែក​ចំនួន​២២​មែក​ចេញ​មាន ឈើទាល​៦​ដើម ចាន់​១​ដើម និង​សិរមាន់​១​ដើម​៕​

អត្ថបទ៖ គឿន​វេត​