លោក ជិន ម៉ាលីន ៖ មិនគួរប្រៀបធៀបសកម្មជននៅប្រទេសគេ ដែលធ្វើសកម្មភាពស្របតាមច្បាប់នោះទេ
Connect with us
Helistar Cambodia - Helicopter Charter Services

ព័ត៌មានជាតិ

លោក ជិន ម៉ាលីន ៖ មិនគួរប្រៀបធៀបសកម្មជននៅប្រទេសគេ ដែលធ្វើសកម្មភាពស្របតាមច្បាប់នោះទេ

បានផុស

នៅ

មន្ត្រីជាន់ខ្ពស់រាជរដ្ឋាភិបាល បានលើកឡើងថា ក្រុមអង្គការសង្គមស៊ីវិល មិនគួរប្រៀបធៀបសកម្មជននៅកម្ពុជា ជា​មួយសកម្មជននានា នៅលើពិភពលោកនោះទេ ពីព្រោះសកម្មជនរបស់គេ ធ្វើសកម្មភាពស្របតាមច្បាប់ រីឯសកម្ម​ជ​ន​មួយចំនួននៅកម្ពុជា ដែលប្រព្រឹត្តល្មើសច្បាប់ ត្រូវតែចាត់ការទៅតាមផ្លូវច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ គ្រាដែលក្រុមអង្គការស៊ីវិលមួយចំនួន បានបន្តយុទ្ធនាការឈានដល់សប្តាហ៍ទី៦ ដើម្បីទាមទារ​ឲ្យ​​មាន​​ការដោះលែងលោក រ៉ុង ឈុន មេដឹកនាំសហជីព ដែលត្រូវ​បាន​តុលាការ​​កាត់​ទោស​​ ជាប់​ពន្ធនាគារ​២​ឆ្នាំ ​​ក្នុង​បទចោទប្រកាន់ ”​ញុះញង់​ឲ្យ​ប្រព្រឹត្ត​អំពើ​ បង្ក​ឲ្យ​មាន​ភាព​​វឹកវរ​ធ្ងន់ធ្ងរ ​ដល់​សន្តិសុខ​សង្គម ” និងការចោទប្រកាន់ពីបទ “ញុះញង់ឲ្យប្រព្រឹត្តិបទឧក្រិដ្ឋជាអាទិ៍” ទៅលើសកម្មជនសង្គមជាយុវជនចំនួន ៧នាក់ ដែលជាសមាជិកក្រុម ខ្មែរថាវរៈ និងសមាគមសម្ព័ន្ធនិស្សិតបញ្ញាវ័ន្តខ្មែរ។

ក្រុមអង្គការសង្គមស៊ីវិល ដដែលនេះ បានលើកឡើងដែរថា សកម្មជននានានៅលើពិភពលោក តែងតែទទួលបានការគាំទ្រ និងលើកទឹកចិត្តពីសំណាក់សាធារណជន និងអាជ្ញាធររដ្ឋ។ រីឯសកម្មជន និងអ្នកការពារសិទ្ធិមនុស្សនៅកម្ពុជាវិញ បែរជាប្រឈមនឹងការគំរាមកំហែង បំភិតបំភ័យ និងអាចឈានដល់ការជាប់ពន្ធនាគារទៅវិញ។

ពាក់ព័ន្ធនឹងបញ្ហានេះ​ លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ មានប្រសាសន៍ប្រាប់​អ្នក​សារព័ត៌​មានកម្ពុជាថ្មី នាព្រឹកថ្ងៃទី១៥ ខែកញ្ញានេះថា ការធ្វើយុទ្ធនាការ ដោយមិនផ្អែកលើទិដ្ឋភាពច្បាប់ រប​ស់ក្រុមអង្គការស៊ីវិលមួយចំនួននេះ គឺទម្លាប់ពួកគេតាំងពីដើមមកហើយ នរណាក៏គេដឹងដែរ ក្នុងការការពារសកម្ម​ជន ដែលជាដៃជើងរបស់ពួកគេ។ លោកថា យុទ្ធនាការនេះ​ គ្រាន់តែជាសារនយោបាយ ដើម្បី កេងចំណេញផ្នែក​នយោបាយប៉ុណ្ណោះ ហើយបន្តុះបង្អាប់ និងបំបាក់មុខរាជរដ្ឋាភិបាល នៅលើឆាកអន្តរជាតិប៉ុណ្ណោះ។ ប៉ុន្តែយុទ្ធនា​ការ​នេះ មិនមែនជាមធ្យោបាយស្របច្បាប់ ឬមធ្យោបាយតាមផ្លូវច្បាប់ ក្នុងការការពារជនជាប់ចោទ ដែលផ្អាកលើ​ទិដ្ឋភាពរដ្ឋធម្មនុញ្ញ និងទិដ្ឋភាពច្បាប់របស់កម្ពុជានោះទេ។

លោក ជិន ម៉ាលីន ដែលជាអនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជាផងនោះ បានលើក​ឡើងបន្តថា «ចឹងទេ! យុទ្ធនាការនេះ វាមិនមានឥទ្ធិពលអ្វី ទៅលើការសម្រេចតុលាការ ដែលជាស្ថាប័នឯករាជ្យ ហើយក៏មិនជួយដល់ជនជាប់ចោទបានដែរ តាមផ្លូវច្បាប់។ លោកបន្តទៀតថា មានការចូលរួមដំណើរការ នីតិវិធី​របស់តុលាការ និងបង្ហាញមូលដ្ឋានសក្ខីកម្មផ្លូវច្បាប់ឲ្យបានរឹងមាំ ក្នុងការដោះបន្ទុក ហើយតតាំងជាមួយបទចោទ ដែលនេះទើបជាធម្យោបាយតាមផ្លូវច្បាប់ តែមួយគត់ក្នុងការការពារជនជាប់ចោទ តែបើក្រុមសង្គមស៊ីវល ធ្វើតាមតែ​ទម្លាប់របស់ពួកគេរបៀបនេះ វាមិនអាចជួយអ្វីដល់ជនជាប់ចោទបាននោះទេ។ លើសពីនេះទៀត វាកាន់តែបង្ហាញ​កាន់តែច្បាស់ថា សកម្មភាពរបស់ក្រុមអង្គការសង្គមស៊ីវិលទាំងអស់នេះ គឺមានរបៀបវារៈនយោបាយ នៅពីក្រោយ ហើយបង្ហាញវិជ្ជាជីវៈ និងអព្យាក្រឹត្យភាពរបស់ពួកគេថែមទៀត។

ជាមួយគ្នានេះ លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានលើកឡើងទៀតថា ក្រុ​ម​អង្គការសង្គមស៊ីវិល មិនគួរលើកយកករណីសកម្មជននានា នៅលើពិភពលោក មកប្រៀបធៀបជាមួយ​សក​ម្មជនមួ​យ​ចំនួន នៅកម្ពុជានោះដែរ។ លោកថា សកម្មជននៅប្រទេសគេ ដែលទទួលបានការការពារ និងលើកទឹកចិត្តនោះ ក៏ព្រោះតែពួកគេធ្វើសកម្មភាពស្របតាមច្បាប់ និងផ្អាកតាមច្បាប់ ដោយមិនបានប៉ះពាល់ដល់ផលប្រយោជន៍ជាតិ និងមិនបំពានច្បាប់ ក៏ដូចជាសិទ្ធិសេរីភាពរបស់អ្នកដទៃដែរ។ ដូច្នេះពួកគេ ទទួលបាននូវការលើកទឹកចិត្ត​ និងការ​ពា​រ។

មន្ត្រីជាន់ខ្ពស់រាជរដ្ឋាភិបាលរូបនេះ បានលើកឡើងបន្ថែមថា «ក៏ប៉ុន្តែនៅកម្ពុជា ការអនុវត្តច្បាប់ទៅលើសកម្ម ជន​នេះ មិនមែនដោយសារតែ ការអនុវត្តសិទ្ធិសេរីភាពរបស់ខ្លួន តាមផ្លូវច្បាប់នោះទេ ដោយសារតែការប្រព្រឹត្តល្មើស​ទៅ​នឹងច្បាប់ ហើយសមត្ថកិច្ចមានភស្ដុតាង មូលដ្ឋាន មានសក្ខីកម្មរឹងមាំច្បាស់លាស់ ក្នុងការចោទប្រកាន់ ដំណើរ​ការនីតិវិធីតាមផ្លូវតុលាការ និងឈានដល់ការផ្ដន្ទាទោស អញ្ចឹងបើសិនជាយើង ធ្វើការលើកទឹកចិត្ត ការពារដល់​សកម្មជន ដែលបំពានច្បាប់បែបនេះ អាហ្នឹងហាក់ដូចជាលើកទឹកចិត្ត ឲ្យប្រជាពលរដ្ឋដទៃទៀតហ្នឹង កាន់តែ​ប្រ​ព្រឹត្ត​​ល្មើសច្បាប់នៅកម្ពុជា ហើយវាប៉ះពាល់សន្តិសុខជាតិ និងផលប្រយោ ជន៍សាធារណៈ របស់ជាតិជាមិនខានទេ»​៕

អត្ថបទ៖ ឃួន សុភ័ក្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services