ក្រសួងយុត្តិធម៌ បង្កើតក្រុមស្រាវជ្រាវ និងវិភាគផ្នែកយុទ្ធសាស្រ្ដ ក្នុងវិស័យយុត្តិធម៌

ក្រសួងយុត្តិធម៌ បានសម្រេចបង្កើតក្រុមស្រាវជ្រាវ និងវិភាគផ្នែកយុទ្ធសាស្រ្ដ និងគោលនយោបាយ ក្នុងវិស័យយុត្តិធម៌ ដែលក្រុមការងារនេះដឹកនាំដោយប្រធាន ១រូប, អនុប្រធាន ១រូប និងសមាជិកចំនួន ១០រូបផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីសម្រេចចុះហត្ថលេខាដោយលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នៅថ្ងៃទី ៥ ខែមករា ឆ្នាំ ២០២៤ បានឲ្យដឹងថា ក្រុមការងារខាងលើនេះ មានលោក ជិន ម៉ាលីន រដ្ឋលេខាធិការក្រសួងយុត្តិធម៌​ ជាប្រធាន និងលោក កេង សុម៉ារិទ្ធ រដ្ឋលេខាធិការក្រសួងយុត្តិធម៌ ជាអនុប្រធាន ព្រមទាំងមានសមាជិកចំនួន ១០រូបន្ថែមទៀត។

ក្រុមការងារពិសេសនេះ មាតតួនាទី ភារកិច្ច ដូចជា៖ សិក្សាស្រាវជ្រាវ វិភាគ និងផ្ដល់យោបល់ផ្នែកយុទ្ធសាស្រ្ដ និង គោលនយោបាយ សម្រាប់ការងារពាក់ព័ន្ធការកែទម្រង់ក្នុងវិស័យយុត្តិធម៌ និងពិនិត្យ វិភាគ និងផ្ដល់យោបល់លើការរៀបចំ ឬការធ្វើវិសោធនកម្មច្បាប់ និងលិខិតបទដ្ឋានគតិយុត្តសំខាន់ៗ ក្នុងវិស័យយុត្តិធម៌។

ម្យ៉ាងទៀត ក្រុមការងារនេះ ក៏មានតួនាទី ភារកិច្ច តាមដាន វិភាគព័ត៌មានពាក់ព័ន្ធនឹងវិស័យច្បាប់ និងយុត្តិធម៌ ហើយរៀបចំសុន្ទរកថា បទអន្តរាគមន៍ និងឯកសារជំនួយស្មារតីនានា របស់រដ្ឋមន្ត្រីក្រសួងយុត្តិធម៌ ព្រមទាំងអនុវត្តភារកិច្ចផ្សេងទៀត តាមការប្រគល់របស់រដ្ឋមន្ត្រីក្រសួងយុត្តិធម៌៕