មន្រ្តីជាន់ខ្ពស់ក្រសួងយុត្តិធម៌៖ គិតត្រឹមថ្ងៃទី១២ កញ្ញា អ.ដ.ក. ទទួលបានពាក្យបណ្តឹងសរុបចំនួន ២២៧ ករណី

លោក ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ បានប្រាប់ «កម្ពុជាថ្មី»ថា អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) ដែលបានចាប់ផ្តើមទទួលពាក្យបណ្តឹងពីប្រជាពលរដ្ឋ ចាប់ពីថ្ងៃទី១ ខែមីនា ឆ្នាំ២០២៤ ​រហូតមកដល់​ថ្ងៃទី១២ ខែកញ្ញា ឆ្នាំ២០២៤ នេះ បានទទួលពាក្យបណ្តឹងសរុបចំនួន ២២៧ ករណី (សំណុំរឿង) ពី​ប្រជាព​ល​រដ្ឋ។

មន្រ្តីជាន់ខ្ពស់រូបនេះ បញ្ជាក់ថា ក្នុងចំណោមសំណុំរឿងទាំង ២២៧ករណី ភាគច្រើន គឺពាក់ព័ន្ធនឹងវិវាទវិវាទដីធ្លី វិវាទកិច្ចសន្យាខ្ចីប្រាក់ វិវាទកិច្ចសន្យាទិញលក់ វិវាទមត៌ក និងវិវាទពាក់ព័ន្ធនឹងការលែងលះ។ លោកបានឱ្យដឹងថា អ.ដ.ក. បានចាប់ផ្តើមធ្វើការដោះស្រាយសំណុំរឿងដែលទទួលបានពីប្រជាពលរដ្ឋចាប់ពីដើមខែកក្កដា ឆ្នាំ២០២៤ នេះ ពោលគឺបន្ទាប់ពីមន្ត្រីសម្រុះសម្រួលដោះស្រាយវិវាទនៃ អ.ដ.ក. បាន​បញ្ចប់​ដោយ​ជោគ​ជ័យ​នូវ​វគ្គ​ប​ណ្តុះ​បណ្តាលជំនាញសម្រុះសម្រួលផ្សះផ្សាវិវាទ និងបានទទួលនីតិសម្បទាពី អ.ដ.ក.។

ជាលទ្ធផល គិតត្រឹមថ្ងៃទី១២ ខែកញ្ញា ឆ្នាំ២០២៤ ម្សិលមិញនេះ មានសំណុំរឿងសរុបចំនួន ២២សំណុំរឿង ដែលត្រូវបានចាត់ការរួចរាល់ ក្នុងនោះមានសំណុំរឿងចំនួន១៤ ត្រូវបានសម្រុះសម្រួលបញ្ចប់ដោយជោគជ័យ និងបានរៀ​បចំ​ចេញ​ជាកំ​ណត់​​​​​​ហេតុព្រមព្រៀងបញ្ចប់វិវាទ។ ចំណែក សំណុំរឿងចំនួន៤ ត្រូវបានបិទ ដោយសារភាគីមិនព្រមព្រៀងសះជា និងសំណុំរឿងចំនួន៤ ត្រូវបានលើកចោល ដោយសារខុសសមត្ថកិច្ច។ រីឯសំណុំរឿង​ចំនួន២០៥ ផ្សេង​ទៀត ​កំពុង​ស្ថិត​ក្នុងចំណាត់ការរបស់​ អ.ដ.ក.។

បើតាមលោក ជិន ម៉ាលីន ចំពោះកត្តាប្រឈមរបស់ អ.ដ.ក គឺដោយសារ អ.ដ.ក ជាយន្តការនៃការទទួលពាក្យបណ្តឹងមួយ ដែលពុំទាន់មានភាពទូលំទូលាយ ដោយបច្ចុប្បន្ន ការទទួលពាក្យបណ្តឹងត្រូវធ្វើទ្បើងដោយផ្ទាល់នៅអគ្គលេខាធិការដ្ឋាននៃ អ.ដ.ក (រាជធានីភ្នំពេញ)។ ម្យ៉ាងទៀត អ.ដ.ក. ជាស្ថាប័នជាតិថ្មី ដែលប្រជាពលរដ្ឋមួយចំនួន ពិសេសនៅតាមបណ្តាខេត្ត មិនទាន់បានស្គាល់នៅទ្បើយ រីឯមន្ត្រីសម្រុះសម្រួលដោះស្រាយវិវាទ នៅមានចំនួនតិចនៅទ្បើយ បើធៀបនឹងបរិមាណនៃសំណុំរឿង។ ទន្ទឹមនឹងនោះ អ.ដ.ក. កំពុងរៀបចំកសាងលិខិតបទដ្ឋានគតិយុត្តចាំបាច់ដទៃទៀត ដើម្បីធានាប្រសិទ្ធភាពនៃការដោះស្រាយវិវាទជូនប្រជាពលរដ្ឋ ពិសេសពាក់ព័ន្ធនឹងការដោះស្រាយវិវាទជូនប្រជាពលរដ្ឋដែលជាជនជាតិដើមភាគតិច។

យ៉ាងណាមិញ នៅពេលខាងមុខ លោកថា នឹងពង្រីកជាជំហានៗ នូវយន្តការនៃការទទួលពាក្យបណ្តឹងរបស់ អ.ដ.ក. ឱ្យកាន់តែទូលំទូលាយ និងងាយស្រួល។ ជាពិសេស បន្តផ្សព្វផ្សាយបង្កើនការយល់ដឹងរបស់ប្រជាពលរដ្ឋ អំពីយន្តការដោះស្រាយវិវាទក្រៅប្រព័ន្ធតុលាការ និងបន្តជ្រើសរើសបន្ថែមនូវមន្ត្រីសម្រុះសម្រួលដោះស្រាយវិវាទ​ ទន្ទឹមនឹងការពង្រឹងសមត្ថភាពក្នុងការដោះស្រាយវិវាទដល់មន្ត្រីសម្រុះសម្រួលដោះស្រាយវិវាទ​។ ព្រមទាំងបន្ត និងពង្រឹងកិច្ចសហប្រតិបត្តិការជាមួយស្ថាប័នដៃគូរពាក់ព័ន្ធ ដែលរួមមានជាអាទិ៍ អាជ្ញាធរមូលដ្ឋាន (រដ្ឋបាលភូមិ ឃុំ សង្កាត់ ក្រុង ស្រុក ខណ្ឌ រាជធានី ខេត្ត) នៅទូទាំងប្រទេស និងស្ថាប័នពាក់ព័ន្ធសំខាន់ៗមួយចំនួនទៀត៕

អត្ថបទ៖ គេន ម៉ាលិះ