ទីភ្នាក់ងារបារាំង គ្រោងសិក្សាវិធីសាស្រ្ដរំដោះទឹកជំនន់ ពីក្រុងបាត់ដំបង
Connect with us
Helistar Cambodia - Helicopter Charter Services

ព័ត៌មានជាតិ

ទីភ្នាក់ងារបារាំង គ្រោងសិក្សាវិធីសាស្រ្ដរំដោះទឹកជំនន់ ពីក្រុងបាត់ដំបង

បានផុស

នៅ

ទីភ្នាក់ងារបារាំងសម្រាប់ការអភិវឌ្ឍប្រចាំប្រទេសកម្ពុជា នឹងធ្វើការសិក្សាអំពីវិធីសាស្រ្ដក្នុងការរំដោះទឹកជំនន់ចេញពីក្រុងបាត់ដំបង ដែលតែងតែលិចជារៀងរាល់ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសការសិក្សានេះបានធ្វើឡើងនៅក្នុងជំនួបពិភាក្សាការងាររវាង លោកស្រី BOURHIS Ophélie ទីភ្នាក់ងារបារាំងសម្រាប់ការអភិវឌ្ឍប្រចាំប្រទេសកម្ពុជា ជាមួយ លោក សុខ លូ អភិបាលខេត្តបាត់ដំបង នៅថ្ងៃទី២៣ ខែវិច្ឆិកានេះ ដោយមានការចូលរួមពីលោក Bryan FORNARI ប្រធានកិច្ចសហប្រតិបត្តិការ នៃសហភាពអឺរ៉ុប លោក ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងប្រតិភូក្រសួងសេដ្ឋកិច្ច និងហិរញ្ញវត្ថុ ដើម្បីពិភាក្សាទៅលើគម្រោងផ្សេងៗសម្រាប់អភិវឌ្ឍក្នុងខេត្តបាត់ដំបង។

លោកស្រី BOURHIS Ophélie មានប្រសាសន៍ថា ប្រសិនបើមានការគាំទ្ររដ្ឋបាលខេត្ត ទីភ្នាក់ងារបារាំងសម្រាប់ការអភិវឌ្ឍ នឹងធ្វើការសិក្សាអំពីវិធីសាស្រ្ដក្នុងការរំដោះទឹកជំនន់ ក្នុងក្រុងបាត់ដំបង ដែលតែងតែកើតមានឡើងរៀងរាល់ឆ្នាំដែលទឹកស្ទឹងសង្កែ ឡើងដល់កម្រិតខ្ពស់ ដើម្បីកាត់បន្ថយបញ្ហាទឹកលិចក្នុងក្រុងបាត់ដំបង។

លោកស្រី បានជម្រាបជូនលោកអភិបាលខេត្តថា ចំពោះគម្រោងដែលទីភ្នាក់ងារបារាំងសម្រាប់ការអភិវឌ្ឍ កំពុងដំណើរការនាពេលនេះ គឺផ្ដោតទៅលើវិស័យកសិកម្ម ការប្រែប្រួលអាកាសធាតុ ការគ្រប់គ្រងប្រព័ន្ធទឹកក្នុងខេត្តបាត់ដំបង។

លោកស្រី បានថ្លែងអំណរគុណ ដល់អាជ្ញាធរខេត្តបាត់ដំបង ដែលបានខិតខំប្រឹងប្រែងអភិរក្ស​បឹងទន្លេ​សាប ដែលជាបឹងដ៏ធំមួយ សម្បូរទៅដោយមច្ឆជាតិជាច្រើន និងបានចូលរួមក្នុងការអភិវឌ្ឍវិស័យកសិកម្មក្នុងខេត្តឱ្យមានការរីកចម្រើនពីមួយថ្ងៃទៅមួយថ្ងៃ។

លោក សុខ លូ បាន មានប្រសាសន៍ថា ខេត្តបាត់ដំបង ជាខេត្តមួយដែលមានសក្តានុពលលើវិស័យកសិកម្ម និងវិស័យទេសចរណ៍ ដែលមានប្រព័ន្ធធារាសាស្រ្ដខ្វាត់ខ្វែង ដែលបង្កឱ្យការបង្កបង្កើនផលដំណាំកសិកម្មក្នុងខេត្ត បានលទ្ធផលល្អ ហើយជាពិសេស ការសាងសង់ទំនប់ស្ទាក់ទឹកសាលាតាអន នឹងជិតសម្រេចបានទាំងស្រុងនាពេលឆាប់ៗខាងមុខនេះ ដែលអាចធ្វើការទប់ទឹកស្ទឹងសង្កែបានទៅតាមកម្រិតកម្ពស់ដែលយើងចង់បាន ដែលនឹងជួយបង្កើនសោភ័ណភាពស្ទឹងសង្កែ និងសោភ័ណភាពក្រុងបាត់ដំបងឱ្យកាន់តែស្រស់ស្អាតបន្ថែមទៀត និងតំបន់ទេសចរណ៍ មានអគារបុរាណ ដែលក្បាច់រចនាស្រស់ស្អាត និងទាក់ទាញដល់ភ្ញៀវទេសចរណ៍ជាតិ និងអន្តរជាតិ៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម

Helistar Cambodia - Helicopter Charter Services