ទំហំពាណិជ្ជកម្មទ្វេភាគីកម្ពុជា-ចិន កើនឡើងលើស​ការរំពឹងទុក១ម៉ឺនលានដុល្លារ

ទំហំ​ពាណិជ្ជកម្ម​ទ្វេភាគីរវាង​ចិន​ និង​កម្ពុជា​ មានចំនួន​លើសពី​១ម៉ឺន​លាន​ដុល្លារអាមេរិក កាលពីថ្ងៃទី១៧ខែធ្នូ។ នេះបើតាមការប្រកាសនៅលើ Facebook ផ្លូវការរបស់ស្ថានទូតចិនប្រចាំកម្ពុជា កាលពីថ្ងៃទី១៩ ខែធ្នូ ឆ្នាំ២០២១។

 យោងតាមទិន្នន័យរបស់ក្រសួងពាណិជ្ជកម្មចិនបានបង្ហាញថា រយៈពេល១០ខែនាឆ្នាំនេះ ទំហំពាណិជ្ជកម្មទ្វេភាគីរវាងចិន និងកម្ពុជា មានចំនួនឈានដល់ ១០៩៨០លានដុល្លារអាមេរិក មានកំណើន៤៥.៩% បើធៀបនឹងរយៈពេលដូចគ្នាកាលពីឆ្នាំ២០២០ គឺជាតួលេខលើសពីចំនួនដែលថ្នាក់ដឹកនាំប្រទេសទាំងពីរធ្លាប់បានប្តេជ្ញាថា នឹងឈានដល់កម្រិត១ម៉ឺនលានដុល្លារអាមេរិកនៅឆ្នាំ ២០២៣។

មន្ត្រីជាន់ខ្ពស់កម្ពុជា បានបញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា-ចិន នឹងចូលជាធរមាននៅខែមករា ឆ្នាំ២០២២ ខាងមុខនេះ ដែលរំពឹងថា នឹងជំរុញឲ្យមានសកម្មភាពពាណិជ្ជកម្ម និងវិនិយោគកាន់តែកើនឡើងថែមទៀតរវាងកម្ពុជា និងចិន។

កាលពីថ្ងៃទី១៧ខែធ្នូ រដ្ឋបាលគយប្រទេសចិនបានប្រកាសជាផ្លូវការនូវវិធីសាស្រ្តគ្រប់គ្រងទីតាំងផលិតទំនិញនាំចូលនាំចេញក្រោមលក្ខខណ្ឌកិច្ចព្រមព្រៀងពាណិជ្ជកម្មសេរី​រវាងរដ្ឋាភិបាលសាធារណរដ្ឋប្រជាមានិតចិន និងរាជរដ្ឋាភិបាលព្រះរាជាណាចក្រកម្ពុជា ក្នុងគោលបំណង​កំណត់​ត្រឹមត្រូវ​នូវទីកន្លែងផលិត​ទំនិញ​នាំចូលនាំចេញ​ក្រោមលក្ខខណ្ឌ​កិច្ចព្រមព្រៀង​ពាណិជ្ជកម្ម​សេរីខាងលើ ជំរុញ​ការប្រាស្រ័យទៅវិញទៅមកនៃ​សេដ្ឋកិច្ច​ពាណិជ្ជកម្ម​​ចិននិង​កម្ពុជា។

ទំនិញកម្ពុជាដែលនាំចេញទៅកាន់ទីផ្សារប្រទេសចិន រួមមាន អង្ករ , ចំណិតដំឡូងក្រៀម , ស្វាយស្រស់ , គ្រាប់ស្វាយចន្ទី និងទំនិញផ្សេងជាច្រើនមុខទៀត ខណៈទំនិញនាំចូលពីចិនមកវិញ មានដូចជា គ្រឿងអេឡិចត្រូនិច គ្រឿងបរិភោគកែច្នៃជាដើម។ លើសពីនេះទៀត ភាគីកម្ពុជា ចិន កំពុងសិក្សាអំពីលទ្ធភាពនាំចេញមៀនប៉ៃលិន និងត្រីប្រាពីកម្ពុជា ទៅប្រទេសចិនបន្ថែមទៀត។

សូមបញ្ជាក់ថា កាលពីឆ្នាំ ២០២០ ទំហំពាណិជ្ជកម្មរវាងកម្ពុជា-ចិន សម្រេចបានជាង ៨,១១៨លានដុល្លារ ពោលគឺធ្លាក់ចុះ ៥.២ភាគរយ បើធៀបនឹងឆ្នាំ២០១៩ មានចំនួនជាង ៨,៥៦៣លានដុល្លារ៕ ទួន សុផល