ព័ត៌មានជាតិ
ត្រៀមថ្នាំអាបេត ១០០ តោន ទឹកថ្នាំបាញ់សម្លាប់មូស ៦ ពាន់លីត្រ ទប់ស្កាត់ជំងឺគ្រុនឈាម
លោកវេជ្ជបណ្ឌិត លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃក្រសួងសុខាភិបាល បានមានប្រសាសន៍នៅព្រឹកថ្ងៃទី១០ ខែមីនានេះថា ក្នុងការទប់ស្កាត់ជំងឺគ្រុនឈាមនៅឆ្នាំនេះ កម្មវិធីជាតិប្រយុទ្ធនឹងជំងឺគ្រុនឈាមបានត្រៀមថ្នាំអាបេតប្រមាណ ១០០ តោន សេរ៉ូម ៦ ទៅ ៧ម៉ឺន ប្លោក ទឹកថ្នាំបាញ់សម្លាប់មូស ៦ ពាន់លីត្រ ផលិតខិតប័ណ្ណអប់រំស្តីពី ជំងឺគ្រុនឈាម ដើម្បីបង្ការ និងការពារទប់ស្កាត់ក្នុងករណីជំងឺគ្រុនឈាមមានការរាតត្បាតលក្ខណៈទ្រង់ទ្រាយធំ។
លោកវេជ្ជបណ្ឌិត បានបន្តទៀតថា ត្រឹមរយៈពេល ២ខែនេះ មានករណីជំងឺគ្រុនឈាមចំនួន ៣១៥ ករណី និងមិនមានអ្នកស្លាប់ទេ។ តួលេខនេះបើធ្វើការប្រៀបធៀបទៅនឹងរយៈពេលដូចគ្នាកាលពីឆ្នាំ២០២១កន្លងទៅឃើញថា មានចំនួនប្រហាក់ប្រហែលគ្នា និងមិនមានអ្នកស្លាប់ដូចគ្នាដែរ។ យ៉ាងណាក៏ដោយ លោកវេជ្ជបណ្ឌិតបានបញ្ជាក់ថា នៅឆ្នាំ២០២២នេះ ករណីជំងឺគ្រុនឈាមអាចនឹងមានការកើនឡើងខ្ពស់ដោយសារកត្តាប្រែប្រួលអាកាសធាតុ ពិសេសអាកាសធាតុក្តៅអាចបង្កលក្ខណៈងាយស្រួលក្នុងការកកើតមូសខ្លាច្រើន ដោយឆ្នាំ២០២២នេះ ជាឆ្នាំទី៣ស្ថិតក្នុងវដ្តឆ្នាំមានការផ្ទុះជំងឺគ្រុនឈាមមានលក្ខណៈទ្រង់ទ្រាយធំដែលតែងតែផ្ទុះឡើងរយៈពេល៥ឆ្នាំម្តង។
លោកវេជ្ជបណ្ឌិតបានអំពាវនាវដល់សាធារណជន និងអាជ្ញាធរគ្រប់លំដាប់ថ្នាក់ត្រូវចូលរួមសំអាតអនាម័យនៅជុំវិញលំ នៅដ្ឋាន និងទីសាធារណៈឱ្យបានស្អាតដូចជា លប់បំបាត់សំបកកង់ឡាន កង់ម៉ូតូចាស់ៗ និងរាល់វត្ថុដែលអាចដក់ទឹកបាន ព្រោះវាជាជម្រកនៃការកកើតដង្កូវទឹកដែលវិវត្តទៅជាមូសខ្លា ដែលជាភ្នាក់ងារចម្លងជំងឺគ្រុនឈាម ដើម្បីការពារកុំឱ្យឆ្លងជំងឺគ្រុនឈាមដល់កុមារ និងមនុស្សគ្រប់វ័យ។
លោកប្រធានកម្មវិធីជាតិប្រយុទ្ធជំងឺគ្រុនឈាមរូបនេះ បានណែនាំដល់ប្រជាពលរដ្ឋគ្រប់រូបបើសង្ស័យថាមានជំងឺគ្រុនឈាមដូចជា មានអាការៈក្តៅខ្លួនចាប់ពី ៣៩ ទៅដល់ ៤០ អង្សារ និងមានរោគសញ្ញាផ្សេងៗទៀតដូចជា មុខក្រហម ឈឺប្រឡង់កែវភ្នែកចាក់ទៅក្រោយ ឈឺក្បាល ចង់ក្អួត ឬក្អួត ឈឺពោះ ឈឺសាច់ដុំ ឈឺសន្លាក់ដៃជើង ស្នាមអុចៗក្រហមលើស្បែក ឬមានហូរឈាមតាមអញ្ចាញធ្មេញជាដើម ត្រូវរួសរាន់បញ្ជួនអ្នកជំងឺទៅកាន់មន្ទីរពេទ្យជាបន្ទាន់ ដើម្បីឱ្យគ្រូពេទ្យពិនិត្យ និងព្យាបាលទាន់ពេលវេលា។
យោងតាម មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រ បានឱ្យដឹងថា ឆ្នាំ២០២១ មានកុមារ និងមនុស្សពេញវ័យឆ្លងជំងឺគ្រុនឈាមចំនួន ១ ៨១១ ករណី និងស្លាប់ ៨ ករណី មានការថយចុះប្រហែលជាង ៦ ដង បើធៀបនឹងឆ្នាំ ២០២០ កន្លងទៅ មានចំនួនរហូតដល់ទៅ ១១ ៦៩៩ ករណី និងស្លាប់ចំនួន ១៦ ករណី។
លោកវេជ្ជបណ្ឌិត លាង ឫទ្ធា បានបញ្ជាក់ថា ការថយចុះនៃករណីជំងឺគ្រុនឈាមនេះបណ្តាលមកពីប្រជាជនមានការយល់ដឹងច្រើន បានមកទទួលសេវាព្យាបាលនៅមន្ទីរពេទ្យរដ្ឋ ដោយសារគុណភាពសេវា និងសមត្ថភាពផ្តល់សេវារបស់គ្រូពេទ្យព្យាបាលនៅមន្ទីរពេទ្យទូទាំងប្រទេស មានការកើនឡើងជាលំដាប់ពីមួយឆ្នាំទៅមួយឆ្នាំ។ ក្រៅពីនេះអាចបណ្តាលមកពីការអនាម័យខ្លួនប្រាណ លាងសំអាតដៃញឹកញាប់ជាមួយសាប៊ូ អាកុល ឬជែល ក្នុងការការពារការឆ្លងជំងឺកូវីដ-១៩ ក៏ជាកក្តាមួយនាំឱ្យជំងឺគ្រុនឈាមមានការថយចុះផងដែរ៕
អត្ថបទ៖ សំអឿន
-
ព័ត៌មានជាតិ១៩ ម៉ោង ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានអន្ដរជាតិ៤ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៣ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ១ សប្តាហ៍ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៦ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)
-
ជីវិតកម្សាន្ដ៦ ថ្ងៃ ago
រូបថតលិខិតឆ្លងដែនរបស់ Janie ត្រូវគេសរសើរព្រោងព្រាត ទោះមិនមានការតុបតែងមុខ