យុទ្ធនាការបាញ់ថ្នាំសម្លាប់មូសនៅតាមមូលដ្ឋានត្រូវបានអនុវត្តជាបន្តបន្ទាប់ដើម្បីបង្ការទប់ស្កាត់ជំងឺគ្រុនឈាម

តាមការណែនាំពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ អំពីសុខភាពសាធារណៈរបស់ប្រជាពលរដ្ឋ ដែលរស់នៅក្នុងមូលដ្ឋាន នៅដើមខែមករា ឆ្នាំ២០២៥នេះ អាជ្ញាធរខណ្ឌទាំង១៤ សហការជាមួយក្រុមការងាររបស់មន្ទីរសុខាភិបាលរាជធានីភ្នំពេញ បានបើកយុទ្ធនាចុះបាញ់ថ្នាំសម្លាប់មូសនៅមូលដ្ឋានរបស់ខ្លួនជាបន្តបន្ទាប់ ដើម្បីបង្ការ និងទប់ស្កាត់ជំងឺគ្រុនឈាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរខណ្ឌខណ្ឌមានជ័យ កាលពីយប់ថ្ងៃទី១៤ ខែមករា ឆ្នាំ២០២៥ តាមការណែនាំពីលោក សេង គន្ធ អភិបាលខណ្ឌមានជ័យ ក្រុមការងារខណ្ឌមន្ត្រីជំនាញបានបន្តយុទ្ឋនាការបាញ់ថ្នាំមូសក្នុងសង្កាត់បឹងទំពន់ទី២ ភូមិត្នោតជ្រុំ ត្នោតជ្រុំ៥ ត្នោតជ្រុំ៦។

ប្រជាពលរដ្ឋ នៅក្នុងមូលដ្ឋានខណ្ឌមានជ័យ សង្កាត់បឹងទំពន់២ បានថ្លែងអំណរគុណចំពោះ អភិបាលរាជធានីភ្នំពេញ អភិបាលខណ្ឌ និងក្រុមការងាររបស់រដ្ឋបាលខណ្ឌ ដែលតែងតែគិតគូរពីសុខភាពសាធារណៈរបស់ប្រជាពលរដ្ឋដែលស្ថិតនៅក្នុងមូលដ្ឋាន។

សូមរំលឹកថា លោកវិជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញឱ្យដឹងថា នៅដើមខែមករានេះ ចាប់ពីល្ងាច ថ្ងៃទី២ ខែមករា ឆ្នាំ២០២៥ កម្មវីធីគ្រុនឈាមមន្ទីរសុខាភិបាលរាជធានីភ្នំពេញ មានការចូលរួមពី ការិយាល័យសុខាភិបាលមេគង្គ បានសហការជាមួយមណ្ឌលសុខភាព និងមន្ទីរបង្អែកនានា ក្នុងមូលដ្ឋានខណ្ឌនីមួយៗ ទាំង១៤ ក្នុងភូមិសាស្ត្ររាជធានីភ្នំពេញ បន្តចុះបាញ់ថ្នាំសម្លាប់សត្វមូលដ្ឋានតាមកម្មវិធី ជារៀងរាល់ថ្ងៃ ដើម្បីបង្ការទប់ស្កាត់ជំងឺគ្រុនឈាម៕

អត្ថបទ៖ សុភា