ព័ត៌មានជាតិ

អតីតបុគ្គលិកណាហ្គា ៣នាក់ នឹងត្រូវដោះលែងឱ្យនៅក្រៅឃុំនាពេលឆាប់ៗនេះ

បានផុស

២ years មុន

នៅ

ថ្ងៃព្រហស្បតិ៍ ១៧ មីនា ២០២២

ដោយ

ក្រសួងការងារ និងបណ្ដុះបណ្ដាលវិជ្ជាជីវៈមានក្តីរំពឹងថា អតីតបុគ្គលិកក្រុមហ៊ុនណាហ្គាវើលដ៍ ចំនួន ៣ នាក់ដែលកំពុងជាប់ឃុំ អាចនឹងត្រូវបានដោះលែងឱ្យនៅ ក្រៅឃុំជាបណ្តោះអាសន្ននាពេល ឆាប់ៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីបំភ្លឺរបស់ក្រសួងការងារ និងបណ្ដុះបណ្ដាលវិជ្ជាជីវៈចុះថ្ងៃទី១៧ មីនានេះបានឱ្យដឹងថា កាលពីថ្ងៃទី១៥ ខែមីនា ឆ្នាំ២០២២ អតីតបុគ្គលិកនៃក្រុមហ៊ុនណាហ្គាវើលដ៍ចំនួន ៣នាក់ រួមមានឈ្មោះលោក ជួប ចាន់ណាត លោក សេង វណ្ណារិទ្ធ និងលោក សៅ សម្បត្តិ បានធ្វើលិខិតមកក្រសួងការងារ និងបណ្ដុះបណ្ដាលវិជ្ជាជីវៈ ស្នើសុំជួយផ្ដល់កិច្ចអន្តរាគមន៍តាមផ្លូវច្បាប់ឱ្យពួកគាត់បាននៅក្រៅឃុំជាបណ្ដោះអាសន្ន ដើម្បីបានចូលរួមស្វែងរក ដំណោះស្រាយ និងឈានទៅបញ្ចប់វិវាទការងារនៅក្រុមហ៊ុន ណាហ្គាវើលដ៏ និងបានសន្យាថា សហការជាមួយ អាជ្ញាធរក្នុងការអនុវត្តឱ្យបានម៉ឺងមាត់នូវវិធានការសុខាភិបាល មិនរារាំងការយកអំណាច មិនធ្វើការប្រមូលផ្ដុំ ឬដឹកនាំតវ៉ាណាមួយដែលធ្វើឱ្យប៉ះពាល់ដល់សណ្ដាប់ធ្នាប់សាធារណៈ និងសន្តិសុខសង្គមជាតិនោះឡើយ។

ក្រសួងបានបន្តថា ដើម្បីបន្តសម្របសម្រួលដោះស្រាយបញ្ចប់វិវាទការងាររួមនៅក្រុមហ៊ុន ណាហ្គាវើលដ៍ ដូចដែលក្រសួង បានខិតខំនាពេលកន្លងមក និងយោងតាមលិខិតស្នើសុំខាងលើ ក្រសួងបានធ្វើលិខិតទៅក្រសួងយុត្តិធម៌ និង បានចម្លងជូនក្រសួងសុខាភិបាល ហើយក្រសួងយុត្តិធម៌ក៏បានធ្វើលិខិតទៅសាលាដំបូងរាជធានីភ្នំពេញស្របតាមនីតិវិធីច្បាប់រួចហើយដែរ។

ប៉ុន្តែមេធាវីរបស់អតីតបុគ្គលិកទាំង៣នាក់ មានការយឺតយ៉ាងក្នុងការដកពាក្យ បណ្តឹងរបស់ខ្លួននៅសាលាឧទ្ធរណ៍ ដែលធ្វើឱ្យរាំងស្ទះដល់ដំណើរការនីតិវិធីតាមផ្លូវច្បាប់។

ក្រសួងបានបន្តទៀតថា ដូច្នេះដើម្បីអាចអនុវត្តតាមនីតិវិធីតាមផ្លូវច្បាប់ក្នុងការដោះលែងឱ្យនៅក្រៅឃុំជាបណ្ដោះអាសន្ន អតីតបុគ្កលិកទាំង ៣នាក់ និង មេធាវីតំណាង ត្រូវផ្តល់ការសហការនិងដកពាក្យបណ្ដឹងរបស់ខ្លួននៅសាលាឧទ្ធរណ៍ជាមុនសិន។

ក្រសួងបានបន្ថែមថា នៅព្រឹកនេះ អតីតបុគ្គលិកទាំង ៣នាក់ កំពុងស្នើសុំដកពាក្យបណ្ដឹងរបស់ខ្លួននៅសាលាឧទ្ទរណ៍។ ដូចនេះ តាមនីតិវិធីច្បាប់ ក្រសួងរំពឹងថា អតីតបុគ្គលិកទាំង ៣នាក់ អាចនឹងត្រូវបានដោះលែងឱ្យនៅក្រៅឃុំជាយ អាសន្នពេលឆាប់ៗនេះ។

ក្នុងការដោះស្រាយបញ្ចប់វិវាទការងាររួមជាមួយក្រុមហ៊ុន ណាហ្គាវើលដ៍ ក្រសួងការងារបានអញ្ជើញតំណាងភាគីកម្មករនិយោជិត និងតំណាងភាគីនិយោជកមកបន្តប្រជុំដោះស្រាយវិវាទនៅទីស្តីការក្រសួង នៅទី១៦ ខែមីនា ឆ្នាំ២០២២ វេលាម៉ោង ២រសៀល។

ក្រសួងបានបន្តថា ជាក់ស្តែង នៅរសៀលថ្ងៃទី១៦ ខែមីនា ឆ្នាំ២០២២ នេះ តំណាងភាគីនិយោជកបានមកចូលរួមប្រជុំតាមការអញ្ជើញរបស់ក្រសួង ចំណែកតំណាងភាគីកម្មករនិយោជិតមិនបានមកចូលរួមប្រជុំតាមការអញ្ជើញរបស់ក្រសួងឡើយ។ ក្រសួងមានការសោកស្តាយ ដែលកិច្ចប្រជុំនេះមិនអាចដំណើរការបាន។

ជាថ្មីម្តងទៀត ក្រសួងការងារក៏បានអំពាវនាវដល់តំណាងភាគីកម្មករនិយោជិត មេត្តាចូលរួមប្រជុំតាមការអញ្ជើញរបស់ក្រសួង ដើម្បីដោះស្រាយបញ្ចប់ករណីវិវាទរួមនេះឱ្យបានឆាប់ស្របតាមនីតិវិធីច្បាប់ និងតាមការសន្យារបស់ខ្លួន នៅថ្ងៃទី១៧ ខែមីនា ឆ្នាំ២០២២ វេលាម៉ោង ១៤៖៣០នាទីរសៀល នៅទីស្តីការក្រសួង៕

អត្ថបទ៖ សំអឿន