ខេត្តតាកែវ នាំចេញផលិតផលស្រូវជាង ១៣ ម៉ឺនតោន ទៅប្រ​ទេសវៀតណាម

យោងតាម​របាយការណ៍​របស់​មន្ទីរ​កសិកម្ម​ រុក្ខាប្រមាញ់ និងនេសាទ ខេត្តតាកែវ កាលពីថ្ងៃទី១៥ ខែធ្នូ ឆ្នាំ​២០២០ បានឲ្យដឹងថា នាឆ្នាំនេះ ខេត្តតាកែវ​ធ្វើស្រូវរដូវរស្សា បានចំនួន ២០៩,៣៧៣ ហិកតា ស្មើ ១១៦​%​ នៃផែនការលើផ្ទៃដីសរុបចំនួន ១៨០ ០០០ហិកតា ។ ទិន្នផល ៣,៤ ត/ហ.ត ទទួលបានបរិមាណ​ផល​សរុបចំនួន ៧១១ ៤២៣ តោន លើសឆ្នាំមុនចំនួន ៣៥ ៣៧២តោន។

ដោយឡែកចំពោះស្រូវប្រាំងវិញ អនុវត្តបានចំនួន១០១៥១១ហិកតា ស្មើនឹង ១២៧% នៃផែនការចំនួន ៨០,០០០ ហិកតា ទិន្នផល ៤,៨៩៨ ត/ហិកតា បរិមាណផលសរុបទ ចំនួន ៤៩៧ ២០១ តោន តិច​ជាង​ឆ្នំាមុន ៦,៦៨៤ តោន (បញ្ហាមកពីខ្វះទឹកមិនអាចធ្វើលើកទី២បាន)។ គិតមក ទល់ថ្ងៃទី១៥ ខែធ្នូ ផល​ស្រូវ​ចំនួន ១៣៦ ៨៥២តោន ត្រូវបាននាំចេញទៅកាន់ប្រទេសវៀតណាម ។

ខេត្តតាកែវ គឺជាខេត្តមួយ ក្នុងចំណោមខេត្តធំៗដែលមាន​សក្តានុពល​លើ​ផលិតកម្ម​ដំណាំ​ស្រូវ​ជាប់​ចំណាត់​លេខ ១ ចំនួន​៨ឆ្នាំ,ចំណាត់ថ្នាក់លេខ២ ចំនួន៨ឆ្នាំ និងចំណាត់ ថ្នាក់លេខ៣ ចំនួន២ឆ្នាំ​,ហើយ​ក៏​ជា​ខេត្ត​មួយ​មានច្រកនាំចេញផលស្រូវធំមួយទៅកាន់ប្រទេសជិតខាងតាមមធ្យោបាយផ្លូវទឹកនិងផ្លូវគោក ។

គិតមកទល់ថ្ងៃទី ១៥ ខែធ្នូ ឆ្នាំ២០២០ ផលស្រូវចំនួន ១៣៦,៨៥២ តោន ត្រូវបាននាំចេញទៅកាន់​ប្រ​ទេស​វៀត​ណាម​។

ចំពោះការនាំចេញខេត្តតាកែវ មានច្រកនាំចេញផលស្រូវសំខាន់ៗចំនួន៤ ទៅកាន់​ប្រទេសជិតខាង គឺច្រក​កំពង់ទូកអង្គរបុរី ច្រកកំពង់អំពិល ច្រកភ្នំដិន ច្រកដើមដូង និង ប្រឡាយ ៩២ ៕

អត្ថបទ ៖ ដោយ៖ណារី