ABC កំពុងពិចារណាជំរុញការផ្តល់ឥណទានបន្ថែមដល់សមាគមកសិកម្មទំនើប

លោក តូច ចៅចេក ជាសមាជិកក្រុមប្រឹក្សាភិបាលនៃសមាគមធនាគារនៅកម្ពុជា (ABC) និងជាប្រធាននាយកប្រតិបត្តិធនាគារ ប្រៃសណីយ៍កម្ពុជា បានថ្លែងថា តបទៅនឹងសំណើររបស់ក្រសួងកសិកម្ម រុក្ខាប្រមាញ់ និងនេសាទ និងធនាគារជាតិនៃកម្ពុជា ដើម្បីឱ្យ​គ្រឹះស្ថានធនាគារ និងហិរញ្ញវត្ថុ​ពិចារណាដាក់អត្រាការប្រាក់ទាប លោកនឹងធ្វើការជាមួយសមាជិកដើម្បីផ្តល់លទ្ធភាពបន្ថែមដល់សមាគមកសិកម្មទំនើប។

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ លោក យឹម លាត ទេសាភិបាលរង ធនាគារជាតិនៃកម្ពុជា​ និង សមាគមធនាគារនៃកម្ពុជា សមាគមមីក្រូហិរញ្ញវត្ថុកម្ពុជា គ្រឹះស្ថានធនាគារនិងហិរញ្ញវត្ថុ និងស្ថាប័នពាក់ព័ន្ធនានាសរុបប្រមាណ ៤០ រូបកាលពីថ្ងៃទី៥ ខែកុម្ភៈដោយពិភាក្សាស្តីពី ឥណទានកសិកម្ម​ដល់”សហគមន៍កសិកម្មទំនើប”។

លោក តូច ចៅចេក  បានលើកឡើងថា តាមរយៈកិច្ចប្រជុំជាមួយធនាគារជាតិនៃកម្ពុជា និងក្រសួង​កសិកម្ម​នាពេលថ្មីៗនេះ ដោយស្នើរដល់សមាគមធនាគារនៅកម្ពុជា​ចូលរួម​សហការផ្តល់ឥណទានដល់៩សហគមន៍កសិកម្ម​ទំនើបដែលទើបតែងបង្កើតឡើងនេះ ជាមួយអត្រាការប្រាក់ទាប។

លោកបានថ្លែងថា៖«យើងនឹងពិនិត្យ​ និងរៀបចំការផ្តល់ឥណទានទៅដល់សហគមន៍កសិកម្ម​ទមនើបនេះ ដោយសារតែកន្លងមកសហគមន៍នេះទទួលបានឥណទានទីធនាគារកិសកម្ម និងអភិវឌ្ឍន៍ជនបទក្នុងអត្រាប្រាក់៧%ទៅ៨% ដូច្នេះទាំងធនាគារជាតិ និងក្រសួងកសិកម្ម​ស្នើដល់គ្រឹះស្ថានធនាគារ និងហិរញវត្ថុផ្តល់ឥណទានក្នុងអត្រានេះដែរ ដើម្បីឱ្យកសិករអាចមានលទ្ធភាពច្រើន»។

លោកពន្យល់ថា៖ជារួម ខ្ញុំយល់ឃើញថាប្រសិនបើអត្រា៧%ទៅ៨%នេះអាចពិបាកសម្រាប់​គ្រឹះស្ថានធនាគារនិងហិរញ្ញវត្ថ​យកទៅអនុវត្តន៍ ប៉ុន្តែ​ប្រសិនបើអត្រាការប្រាក់ចន្លោះពី៩% ១០% ទៅ១១% ពួកគេអាចនឹងពិចារណាផ្តល់ជូនបាន»។

លោកថានាពេលបច្ចុប្បន្ន ​គ្រឹះស្ថានធនារគារ​ និងហិរញ្ញវត្ថុបាននឹងកំពុងផ្តល់ឥទាន​ដល់វិស័យកសិកម្មក្នុងរង្វ​ង់៨%នៃឥណទានសរុបក្នុងវិស័យនេះ។ សម្រាប់ធនាគារ​ប្រៃសណីយ៍ ក្នុងឆ្នាំ២០២៤ ​បានផ្តល់រហូតដល់១០%នៃឥណទានសរុបក្នុងវិស័យកសិកម្ម។

លោកបានថ្លែងបន្តទៀតថា​ជារួមសម្រាប់អត្រានៃការផ្តល់ឥណទានក្នុងរង្វ​ង់១០%នៃទំហំ​ឥណទានសរុប គឺសមលម្ម​នៃវិស័យនេះ ដោយសារតែនៅក្នុងវិស័យធនាគារបានចាត់ទុកថា វិស័យកសិកម្មគឺជាវិស័យមួយដែលមានហានិភ័យ ដោយសារវិស័យនេះផ្តល់នូវតម្លៃតបស្នង​មិនប្រាកដប្រជាដោយសារតែពឹងផ្អែកខ្លាំងទៅលើកកត្តាអាកាសធាតុ និងធ​ម្មជាតិ។​

លោកថា៖«ការណ៍នេះមិនមែនមានន័យថា បណ្តាគ្រឹះស្ថានធនាគារមិនផ្តល់ឥណទាន​ដល់វិស័យនេះឡើយ យើងនៅតែផ្តល់ប៉ុន្តែយើងអនុវត្តន៍ទៅតាមវិធីសាស្រ្ត​ផ្សេងៗនៃស្ថាប័ន​និមួយៗ ដូច្នេះធនាគារបានបែងចែកការផ្តល់ឥណទាននៅក្នុង​វិស័យនេះជាពីរគឺទី១សម្រាប់​ការផ្តល់ឥណទានដល់ការធ្វើកសិកម្ម​ជាលក្ខណៈគ្រួសារគឺវាមានហានិភ័យខ្ពស់ ហើយទី២សម្រាប់ការធ្វើការកសិកម្មជាលក្ខណៈពាណិជ្ជកម្ម​គឺវាមានហានិភ័យទាប។​

បើតាមលោក ឃឹម ហ្វីណង់ បានមានប្រសាសន៍ថា សហគមន៍កសិកម្មទំនើបដើរតួនាទីយ៉ាងសំខាន់ក្នុងការជំរុញផលិតកម្មកសិកម្ម សម្រាប់ការផ្គត់ផ្គង់តម្រូវការក្នុងស្រុកនិងការនាំចេញ។

លោកថា៖«ក្នុងទិសដៅនេះ ដើម្បីគាំទ្រដល់សហគមន៍កសិកម្មទំនើប ឯកឧត្តមបានស្នើសុំកិច្ចសហការពីធនាគារជាតិនៃកម្ពុជា និងគ្រឹះស្ថានធនាគារនិងមីក្រូហិរញ្ញវត្ថុ ដោយពិនិត្យលទ្ធភាពផ្តល់ឥណទាន ដែលមានលក្ខខណ្ឌអំណោយផល និងផ្តល់ការអនុគ្រោះបន្ថែម ដើម្បីប្រែក្លាយវិស័យកសិកម្មកម្ពុជា ពីលក្ខណៈគ្រួសារឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ នឹងជួយលើកកម្ពស់កម្រិតជីវភាពប្រជាកសិករ»៕