អគ្គនាយកដ្ឋាន​អន្តោប្រវេសន៍ ​បញ្ជា​ឲ្យ​ត្រួត​ពិនិត្យ​ហ្មត់ចត់​ចំពោះ​ការ​ធ្វើ​ដំណើរ​ចូល​កម្ពុជា

អគ្គនាយកដ្ឋានអន្តោប្រវេសន៍ បានណែនាំដល់នាយប៉ុស្តិ៍នគរបាល ច្រកទ្វារព្រំដែនអន្តរជាតិ ទាំងអស់ ជា​ពិសេសច្រកទ្វារនៅតាមបណ្តោយព្រំដែនកម្ពុជា-ថៃ ឲ្យយកចិត្តទុកដាក់ត្រួតពិនិត្យចំពោះការធ្វើដំណើរ​ចូល​មកកម្ពុជា បន្ទាប់ពីខេត្តសាមុតសាខន ​ប្រទេសថៃ កំពុងផ្ទុះជំងឺកូវីដ-១៩។

សេចក្ដី​ណែនាំរបស់អគ្គនាយកដ្ឋានអន្តោប្រវេសន៍ បានបញ្ចាក់យ៉ាងដូច្នេះថា៖

១-ត្រូវបន្តរួមសហការយ៉ាងជិតស្និទ្ធ ជាមួយមន្ត្រីក្រសួងសុខាភិបាលធ្វើការត្រួតពិនិត្យ ជាពិសេស​ដំណើរ​ចូលរបស់ភ្ញៀវបរទេស និងពលរដ្ឋខ្មែរ ដែលចូលមកពីប្រទេសថៃ ឱ្យបានហ្មត់ចត់ ដោយតម្រូវឱ្យពួកគាត់​ធ្វើ​ការ​ធ្វើចត្តាឡីស័កត្រឹមត្រូវតាមការកំណត់។

២-យកចិត្តទុកដាក់គ្រប់គ្រង និងល្បាតត្រួតពិនិត្យស្លាបឆ្វេង ស្លាបស្តាំ ក្នុងដែនសមត្ថកិច្ចច្រកទ្វារ​ឱ្យបាន​ច្បាស់លាស់ និងត្រូវឃាត់អ្នកដំណើរចូល ជាពិសេសពលរដ្ឋខ្មែរដែលចូលពីប្រទេសថៃ ដើម្បីយកមក​ប្រ​គល់​ឱ្យមន្ត្រីភ្នាក់ងារសុខាភិបាល ធ្វើការត្រួតពិនិត្យសុខភាព និងធ្វើចត្តាឡីស័ក ឱ្យបានហ្មត់ចត់។

៣-ត្រូវយកចិត្តទុកដាក់ធ្វើការណែនាំ ក្រើនរំលឹកដល់មន្ត្រីនគរបាលអន្តោប្រវេសន៍ ដែលប្រចាំការនៅច្រក​ទ្វារ​ឲ្យយកចិត្តទុកដាក់រក្សាគម្លាតបុគ្គល រក្សាអនាម័យលាងដៃនឹងសាប៊ូ អាកុល ឬជែល និង ប្រុងប្រយ័ត្ន​ការឆ្លងពីអ្នកដំណើរដែលចូលមកព្រះរាជាណាចក្រកម្ពុជា៕