អាមេរិកសិក្សារកមូលហេតុបន្ទាប់ពីមនុស្ស៧នាក់អាឡ័កស៊ីក្រោយចាក់វ៉ាក់សាំងរបស់ Pfizer

វិទ្យាស្ថានសុខភាពជាតិសហរដ្ឋអាមេរិក (NIH) គ្រោងនឹងពិនិត្យមើលមូលហេតុដែលមនុស្សមួយចំនួនបានទទួលរងប្រតិកម្មអាឡ័កស៊ីទៅនឹងវ៉ាក់សាំងជំងឺកូវីដ១៩។

ទោះបីជាការសិក្សាកំពុងស្ថិតក្នុងដំណាក់កាលដំបូងក៏ដោយ ការសិក្សានេះត្រូវបានគេរំពឹងថានឹងពិនិត្យលើមនុស្សរាប់រយនាក់ដែលមានប្រវតិ្តអាឡ័កស៊ីធ្ងន់ធ្ងរនិងបន្តឃ្លាំមើលពួកគេក្រោយពេលចាក់វ៉ាក់សាំងរួច។ 

លោកវេជ្ជបណ្ឌិត Alkis Togias មកពីវិទ្យាស្ថានជាតិអាឡ័កស៊ីនិងជំងឺឆ្លងរបស់ NIH ហៅកាត់ NIAID បាននិយាយថា ក្រុមរបស់លោកសង្ឃឹមថានឹងចាប់ផ្តើមនៅក្នុងរយៈពេលប៉ុន្មានសប្តាហ៍ខាងមុខ។

ក្រុមអ្នកស្រាវជ្រាវសង្ឃឹមថានឹងកំណត់សមាសធាតុនៃការចាក់ថ្នាំដែលបណ្តាលឲ្យមានប្រតិកម្មគំរាមកំហែងដល់អាយុជីវិតដែលត្រូវបានគេស្គាល់ថាជាប្រតិកម្មអាណាហ្វីឡាក់ទិច។

លោក Togias បានប្រាប់ CNBC ថា ការសិក្សានេះនឹងត្រូវអនុម័តដោយរដ្ឋបាលចំណីអាហារនិងឪសថអាមេរិកនិងគណៈកម្មាធិការក្រមសីលធម៌មុនពេលចាប់ផ្តើម។

លោកនិយាយថា “ជាការពិត អ្នករាល់គ្នានៅពេលពួកគេបានឮអំពីការសិក្សាស្រាវជ្រាវទាក់ទងនឹងវ៉ាក់សាំង យើងព្យាយាមប្រកាន់ខ្ជាប់និងធ្វើឲ្យបានលឿនបំផុត”។

មជ្ឍមណ្ឌលគ្រប់គ្រងនិងបង្ការជំងឺ (CDC) និយាយថា បុគ្គលិកសុខាភិបាលចំនួន៧នាក់បានទទួលរងនូវផលប៉ះពាល់មិនល្អដែលបង្កឡើងដោយវ៉ាក់សាំង Pfizer។

ក្នុងចំណោមពួកគេ មានបុគ្គលិក៣នាក់នៅ Alaska និង៤នាក់នៅមន្ទីរពេទ្យមួយក្នុងតំបន់ Libertyville ជាយក្រុង Chicago៕

ប្រែសម្រួលដោយ៖ Vann Vann

ប្រភព៖ Daily Mail