ព័ត៌មានជាតិ
កម្ពុជា សហការជាមួយADB បង្កើតសាលាជាតិរដ្ឋបាលមូលដ្ឋានបណ្ដុះបណ្ដាលមន្រ្តីថ្នាក់ក្រោមជាតិ
កម្ពុជា កំពុងសហការជាមួយធនាគារអភិវឌ្ឍន៍អាស៊ី(ADB ) ដើម្បីបង្កើតនិងរៀបចំសាលាជាតិរដ្ឋបាលមូលដ្ឋាន បណ្ដុះបណ្ដាលមន្រ្តីថ្នាក់ក្រោមជាតិ ក្នុងដំណើរលើកកម្ពស់លទ្ធិប្រជាធិបតេយ្យ កាត់បន្ថយភាពក្រីក្រ និងលើកកម្ពស់ភាពជាម្ចាស់របស់ប្រជាពលរដ្ឋនៅមូលដ្ឋាន។ នេះបើតាមប្រសាសន៍សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃ នៅក្នុងជំនួបជាមួយលោក KADA Hiroyuki អនុរដ្ឋមន្ដ្រីក្រសួងយុត្តិធម៌ជប៉ុនកាលពីរសៀលថ្ងៃទី១៩កក្កដា។
សម្ដេចក្រឡាហោមសខេងសង្ឃឹមថា រដ្ឋាភិបាល និងប្រជាជនជប៉ុន បន្តគាំទ្រដំណើរការកំណែទម្រង់ដ៏មានសារៈសំខាន់នេះ។
ជាមួយគ្នានោះដែរ សម្ដេចក្រឡាហោមបានរំលឹកថា ការបោះឆ្នោតលើកទី១ និងលើកទី២ រដ្ឋាភិបាលជប៉ុនបានចូលរួមគាំទ្រថវិកា ៣លានដុល្លារដល់កម្ពុជា ហើយបន្ទាប់មកកម្ពុជាក៏បានរៀបចំការបោះឆ្នោតជាបន្តបន្ទាប់ចំនួន ៥ដងរួចមកហើយ ខណៈការផ្ទេរអំណាចទៅថ្នាក់មូលដ្ឋានត្រូវបានធ្វើឡើងស្របគ្នាផងដែរ។
ទន្ទឹមនឹងនេះ អនុរដ្ឋមន្ដ្រីក្រសួងយុត្តិធម៌ជប៉ុន លោក KADA Hiroyuki បានលើកឡើងអំពីវិស័យយុត្តិធម៌ ដែលក្រសួងយុត្តិធម៌ជប៉ុន កំពុងរៀបចំកិច្ចប្រជុំមួយ ហៅថា «កិច្ចប្រជុំថ្នាក់រដ្ឋមន្ដ្រីយុត្តិធម៌ជប៉ុន-អាស៊ាន» ដែលកម្មវិធីនេះគ្រោងធ្វើឡើងនៅឆ្នាំ២០២៣ ខាងមុខ ហើយនេះជាលើកទី១ ដែលអាស៊ានរៀបចំកិច្ចប្រជុំថ្នាក់រដ្ឋមន្ដ្រីយុត្តិធម៌ ជាមួយប្រទេសក្រៅពីរង្វង់អាស៊ាន។ លោកបានបន្តទៀតថា ការចែករំលែកតម្លៃជាសកល ដូចជា និតិរដ្ឋ និងសិទ្ធិមនុស្ស គឺមានសារៈសំខាន់សម្រាប់សហគមន៍អន្ដរជាតិ ក្នុងនោះ កិច្ចសហប្រតិបត្តិការផ្នែកច្បាប់ គឺមានសារៈសំខាន់ក្នុងការលើកកម្ពស់ នៃការចែករំលែកគុណតម្លៃជាសកលនេះ។ លោកបានបន្ដថា កិច្ចប្រជុំនេះ ត្រូវការធាតុចូលជាច្រើនពីបណ្ដាប្រទេសនានាក្នុងអាស៊ាន រួមទាំងកម្ពុជា ក៏ដូចជាមានការគាំទ្រពីប្រទេសកម្ពុជាផងដែរ។
ចំពោះវិស័យពន្ធនាគារ លោក KADA Hiroyuki បានជម្រាបជូន សម្ដេចក្រឡាហោម ស ខេង ថា អង្គការសហប្រជាជាតិសម្រាប់ការទប់ស្កាត់ឧក្រិដ្ឋកម្ម និងប្រព្រឹត្តិចំពោះជនល្មើស ហៅកាត់ថា (UNAFEI) ដែលសហការជាមួយអង្គការ UNODC កំពុងរៀបចំសិក្ខាសាលាមួយនៅប្រទេសជប៉ុន ដើម្បីជំរុញការអភិវឌ្ឍ និងការផ្លាស់ប្ដូរធនធាន ការកសាងបណ្ដាញក្នុងវិស័យច្បាប់ និងយុត្តិធម៌។
នៅដើមឆ្នាំ២០២២ ក្រសួងយុត្តិធម៌ជប៉ុន បានរៀបចំវេទិកាមួយហៅថា «វេទិកាអន្ដោប្រវេសន៍តូក្យូ» ដោយមានការចូលរួមផ្លាស់ប្ដូរព័ត៌មានពីស្ថាប័នពាក់ព័ន្ធផ្សេងៗ នៅក្នុងបណ្ដាប្រទេសអន្ដរជាតិ។ វេទិកានេះ គ្រោងរៀបចំធ្វើឡើងជាលើកទី២ នៅខែធ្នូ ឆ្នាំ២០២២ ខាងមុខ។
សម្ដេចក្រឡាហោម ស ខេង ក៏សង្ឃឹមថា កិច្ចសហប្រតិបត្តិការរវាង កម្ពុជា-ជប៉ុន ជាពិសេសក្នុងវិស័យច្បាប់កាន់តែមានការរីកចម្រើនទៅមុខទៀត។
ពាក់ព័ន្ធទៅនឹងកិច្ចសហប្រតិបត្តិការវិស័យច្បាប់ និងយុត្តិធម៌ សម្ដេចក្រឡាហោម ក៏សម្ដែងការគាំទ្រ ក្នុងការរៀបចំកិច្ចប្រជុំថ្នាក់រដ្ឋមន្ដ្រីយុត្តិធម៌ជប៉ុន-អាស៊ាន។ សម្ដេច មានប្រសាសន៍ថា នេះគឺជាឱកាសដ៏ល្អសម្រាប់អាស៊ានផ្លាស់ប្ដូរបទពិសោធន៍ ពាក់ព័ន្ធនឹងវិស័យអនុវត្តច្បាប់ វិស័យយុត្តិធម៌ វិស័យពន្ធនាគារ និងវិស័យអន្ដោប្រវេសន៍ផងដែរ។ សម្ដេចក្រឡាហោម បានលើកឡើងថា បច្ចុប្បន្នការងារពន្ធនាគារនេះគឺស្ថិតនៅក្រោមសមត្ថកិច្ចរបស់ក្រសួងមហាផ្ទៃ និងមានកិច្ចសហប្រតិបត្តិការជាមួយក្រសួងយុត្តិធម៌។
បើតាមសម្ដេចក្រឡាហោម «កម្ពុជាកំពុងតែមានការប្រឈមមួយ គឺការចង្អៀតណែនក្នុងពន្ធនាគារ» ដែលកន្លងមករាជរដ្ឋាភិបាល និងក្រសួងមហាផ្ទៃ បានដាក់ចេញនូវវិធានការផ្សេងៗ ក្នុងនោះរួមមាន៖ ទី១-បន្ធូរបន្ថយទោស ដែលរាជរដ្ឋាភិបាល បានបង្កើតគណៈកម្មាធិការពិនិត្យ និងលើកលែងបន្ធូរបន្ថយទោស ក្នុងឱកាសបុណ្យជាតិផ្សេងៗ ,ទី២-ការអនុវត្តទោស នៅក្នុងសហគមន៍ និងទី៣-និងការដោះលែងដោយមានលក្ខខណ្ឌ៕ សំអឿន
-
ព័ត៌មានជាតិ៧ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៥ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៥ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍១ ថ្ងៃ ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៦ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore