ព័ត៌មានជាតិ

ADB៖ វិស័យហិរញ្ញវត្ថុនៅកម្ពុជាត្រូវបង្កើនការផ្តល់ឥណទានដល់អាជីវកម្មបៃតង

បានផុស

១ ខែ មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

លោកស្រី Jyotsana Varma នាយិកានៃធនាគារអភិវឌ្ឍន៍អាស៊ីប្រចាំកម្ពុជា(ADB) បានលើកឡើងថាគ្រឹះស្ថានធនាគារ និងហិរញ្ញវត្ថុនៅកម្ពុជាត្រូវបង្កើននូវការវិនិយោគ និងការផ្តល់កម្ចីបន្ថែមទៀតដល់បណ្តាអាជីវកម្មបៃតង និងការប្រែប្រួលអាកាសធាតុ ខណៈបណ្តាប្រទេសនានារួមទាំងកម្ពុជាកំពុងតែទទួលរងនូវបញ្ហាអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកស្រី Jyotsanaធ្វើឡើង កាលពីថ្ងៃទី១៧ ខែកុម្ភៈ នៅក្នុងសិក្ខាសាលាមួយដែលត្រូវបានរៀបចំដោយADB និងសមាគមធនាគារនៅកម្ពុជា (ABC) លើការពិគ្រោះយោបល់ស្តីពីកម្មវិធីបង្កើនល្បឿននៃវិស័យធនាគារពាក់ព័ន្ធការប្រែប្រួលអាកាសធាតុ។

លោកស្រីថា បច្ចុប្បន្នស្ថាប័នខ្លួនបានកំពុងធ្វើការជាមួយកិច្ចសហប្រតិបត្តិការដៃគូរបស់ADB រួមមានធនាគារជាតិនៃកម្ពុជា និងសមាគមធនាគារនៅកម្ពុជា ធនាគារអភិវឌ្ឍន៍អាស៊ីកំពុងផ្តល់កម្មវិធីជំនួយបច្ចេកទេសគោលដៅមួយគឺ Climate Banking Accelerator ដើម្បីជួយស្ថាប័នហិរញ្ញវត្ថុក្នុងការវាយតម្លៃហានិភ័យ និងឱកាសទាក់ទងនឹងអាកាសធាតុ និងបង្កើតឧបករណ៍ហិរញ្ញវត្ថុប្រកបដោយភាពច្នៃប្រឌិតដើម្បីលើកទឹកចិត្តលើការវិនិយោគផ្នែកប្រែប្រួលអាកាសធាតុពីវិស័យឯកជន។

លោកស្រីបានថ្លែងថា៖«ប្រទេសកម្ពុជាប្រឈមមុខនឹងគម្លាតហិរញ្ញប្បទានលើការប្រែប្រួលអាកាសធាតុ ហើយធនាគារ និងស្ថាប័នហិរញ្ញវត្ថុមានតួនាទីសំខាន់ក្នុងការកៀរគរហិរញ្ញវត្ថុសម្រាប់ការកាត់បន្ថយ និងការបន្សាំនៃការប្រែប្រួលអាកាសធាតុ»។

លោក ឌិត សុចល ប្រធានគណកម្មាការនៃហិរញ្ញវត្ថុប្រកបដោយនិរន្តរភាពនៃ ABC បានលើកឡើងថាការប្រែប្រួលអាកាសធាតុមិនមែនជាការគំរាមកំហែងដែលនៅឆ្ងាយទៀតនោះទេ ប៉ុន្តែវាកំពុងតែកើតឡើងនាពេលបច្ចុប្បន្ន។ ការកើនឡើងសីតុណ្ហភាព ព្រឹត្តិការណ៍អាកាសធាតុធំៗនានា និងការរិចរិលនៃបរិស្ថានកំពុងប៉ះពាល់ដល់សេដ្ឋកិច្ច សហគមន៍ និងប្រព័ន្ធអេកូឡូស៊ីនៅទូទាំងពិភពលោក ហើយកម្ពុជាគេមិនផុតដែរ។

លោកបន្តថា៖« សមាគមធនាគារនៅកម្ពុជារួមជាមួយសមាជិករបស់ខ្លួនបានកំណត់ហិរញ្ញវត្ថុនិរន្តរភាពជារបៀបវារៈអាទិភាព។ ងប្តេជ្ញាលើកកម្ពស់ការអនុវត្តក្នុងវិស័យទាំងនេះ ដោយអនុលោមតាមអនុសញ្ញាអាស៊ាន និងផែនទីបង្ហាញផ្លូវហិរញ្ញវត្ថុប្រកបដោយនិរន្តរភាពនៅកម្ពុជា ដើម្បីលើកកម្ពស់ការអនុវត្តហិរញ្ញវត្ថុប្រកបដោយនិរន្តរភាព ពង្រឹងសមត្ថភាព និងចំណេះដឹង ការតស៊ូមតិសម្រាប់គោលនយោបាយគាំទ្រ និងជំរុញកិច្ចសហប្រតិបត្តិការ និងភាពជាដៃគូនានា»។

កាលពីឆ្នាំ ២០២៣ ADBបានអនុម័តនូវជំនួយបច្ចេកទេសលើ ការពន្លឿនការអភិវឌ្ឍន៍វិស័យឯកជនសម្រាប់អាជីវកម្មបៃតង និងកំណើនប្រកបដោយបរិយាបណ្ណនៅក្នុងតំបន់អាស៊ីអាគ្នេយ៍ ដើម្បីកសាងសមត្ថភាពនៃអន្តរការីផ្នែកហិរញ្ញវត្ថុរបស់វិស័យឯកជននៅអាស៊ីអាគ្នេយ៍ ដើម្បីជំរុញការផ្លាស់ប្តូរសេដ្ឋកិច្ចទៅរកកំណើនកាបូនទាប និងធន់នឹងអាកាសធាតុ។ Carbon Trust គឺជាដៃគូដែលបានជ្រើសរើសដើម្បីគាំទ្រដល់ការផ្តល់កម្មវិធីជំនួយបច្ចេកទេសនេះ៕