ក្រសួងសុខាភិបាលកំពុងរៀបចំប្រព័ន្ធឌីជីថលទំនើបដើម្បីតាមដានសុខភាពទារករហូតដល់ចាស់

ក្រសួងសុខាភិបាល បាននិងកំពុងរៀបចំប្រព័ន្ធឌីជីថលទំនើបដែលមានឈ្មោះថា អ៊ីអេឡេចត្រូនិច ដើម្បីតាមដានសុខភាពទារកតាំងពីនៅក្នុងផ្ទៃរហូតដល់វ័យចាស់។

ថ្លែងប្រាប់អ្នកសារព័ត៍មានក្រោយសន្និសីទអន្តរជាតិស្ដីពីការវិនិយោគលើការបណ្តុះបណ្តាលឆ្មបដែលជាធនធានមនុស្សសុខាភិបាលស្នូលសម្រាប់ថែទាំសុខភាពស្ត្រីនិងទារកនៅសណ្ឋាគារភ្នំពេញនៅថ្ងៃទី២៧តុលានេះ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានមាប្រសាសន៍ថា បច្ចុប្បន្ននេះក្រសួងកំពុងរៀបចំបប្រព័ន្ធឌីជីថលទំនើបមួយដើម្បីតាមដានសុខភាពរបស់ទារកតាំងពីនៅក្នុងផ្ទៃរហូតដល់វ័យចាស់ និងអាចភ្ជាប់ជាមួយក្រសួងមហាផ្ទៃ ដើម្បីធ្វើសំបុត្រកំណើតពេលទារកកើតមកទៀតផង។

លោករដ្ឋមន្ត្រីបានបន្តថា «ប្រព័ន្ធនេះមានសារសំខាន់ណាស់ក្នុងការតាមដានសុខភាពរបស់ទារកក្នុងផ្ទៃរួមទាំងទម្ងន់ កម្ពស់ ពេលកើតរហូតដល់វ័យចាស់ គឺយើងអាចតាមដានដឹងពីសុខភាពបានច្បាស់លាស់»។ លោករដ្ឋមន្ត្រីបានបន្តទៀតថា លើសពីនេះទៀតប្រព័ន្ធនេះនឹងភ្ជាប់ជាមួយប្រព័ន្ធរបស់ក្រសួងមហាផ្ទៃដើម្បីរៀបចំធ្វើសំបុត្រកំណើតឱ្យទារកពេលកើតមកបានយ៉ាងងាយស្រួលទៀតផង។

យ៉ាងណាក៏ដោយលោករដ្ឋមន្ត្រីបានបញ្ជាក់ថា ប្រព័ន្ធនេះនៅមិនទាន់កំណត់ថា នឹងត្រូវដាក់ចេញអនុវត្តនៅពេលណានោះទេ ព្រោះបច្ចុប្បន្នអ្នកជំនាញក្រសួងកំពុងរៀបចំប្រព័ន្ធនេះនៅឡើយ។ លោករដ្ឋមន្ត្រៅបានបន្ថែមថា ប៉ុន្តែបច្ចុប្បន្ននេះក្រសួងមានប្រព័ន្ធឌីជីថលទំនើបសម្រាប់អ្នកជំងឺមនុស្សចាស់នៅតាមមន្ទីរពេទ្យមួយចំនួនហើយក្រសួងសុខាភិបាលគ្រោងនឹងពង្រីកប្រព័ន្ធនេះនៅតាមមន្ទីរពេទ្យរដ្ឋនានានៅទូទាំងប្រទេស ។

លោករដ្ឋមន្ដ្រីបានមានប្រសាសន៍ទៀតថា ការអនុវត្តនូវប្រព័ន្ធឌីជីថលនេះ វាពិតជាមានសារសំខាន់ណាស់សម្រាប់មន្ទីរពេទ្យនីមួយៗដោយប្រព័ន្ធនេះអាចជួយគ្រប់គ្រងទិន្នន័យ និងប្រវត្តិអ្នកជំងឺបានសុក្រិតនិងច្បាស់លាស់តាំងពីតូចរហូតដល់ធំរួមទាំងអាស័យដ្ឋានដើម្បីងាយស្រួលក្នុងការផ្ដល់សេវាព្យាបាលអ្នកជំងឺបានលឿនរហ័សប្រកបដោយគុណ
ភាពនិងប្រសិទ្ធិភាពខ្ពស់។

លោករដ្ឋមន្ត្រីបានបន្តថាថ្ងៃក្រោយពេលដែលអ្នកជំងឺត្រូវបន្តពិនិត្យសុខភាពឬព្យាបាលជំងឺមិនចាំបាច់កាន់ឯកសារមិនលំបាកប្រាប់ប្រវត្តិជំងឺទៅវេជ្ជបណ្ឌិត និងចំណាយពេលយូរក្នុងការទទូលសេវាព្យាបាលឡើយគឺមានប័ណ្ណសុខភាពនេះជា
ការស្រេច។ លើសពីនេះការប្រើប្រព័ន្ធនេះទោះបីជាអ្នកជំងឺទៅព្យាបាលនៅមន្ទីរពេទ្យផ្សេងដែលមានភ្ជាប់ប្រព័ន្ធនេះដូចគ្នាក៏មានភាពងាយស្រួលផងដែរព្រោះគ្រាន់តែយកបណ្ណសុខភាពអ្នកជំងឺបញ្ចូលទៅក្នុងកុំព្យួទ័រនឹងដឹងពីប្រវត្តិអ្នកជំងឺមានជំងឺអ្វីធ្លាប់បានប្រើប្រាស់ថ្នាំអ្វីងាយស្រួលដល់គ្រូពេទ្យចេញថ្នាំព្យាបាលឱ្យត្រូវនឹងប្រភេទជំងឺតែម្តង។

លោករដ្ឋមន្ត្រីបានបន្តទៀតថា បច្ចុប្បន្ននេះការប្រើប្រាស់ប្រព័ន្ធឌីជីថលនេះមាននៅតែមន្ទីរពេទ្យរដ្ឋធំនៅរាជធានីភ្នំពេញ
ខេត្តសៀមរាបនិងកំពុងរៀបចំនៅតាមបណ្តាខេត្តផ្សេងៗទៀតដូចជាខេត្តកំពតជាដើម៕

អត្ថបទ៖ សំអឿន