ទំនាក់ទំនងអាស៊ាន-អាមេរិក​រំពឹងសម្រេចបាន​ការដំឡើងកម្រិត​គ្រប់ជ្រុងជ្រោយ​ចំពេលកម្ពុជាធ្វើជាម្ចាស់ផ្ទះនាកិច្ចប្រជុំថ្ងៃនេះ

មន្ត្រីជាន់ខ្ពស់ក្រសួងការបរទេសកម្ពុជារំពឹងថា ការដំឡើងកម្រិតទំនាក់ទំនងអាស៊ាន-អាមេរិកទៅជាដៃគូយុទ្ធសាស្ត្រគ្រប់ជ្រុងជ្រោយនឹងប្រព្រឹត្តទៅតាមផែនការនាថ្ងៃប្រជុំកំពូលអាស៊ាន-អាមេរិកនៅថ្ងៃទី ១២ ខែវិច្ឆិកា ឆ្នាំ ២០២២នៅរាជធានីភ្នំពេញ។

លោក គង់ ភោគ រដ្ឋលេខាធិការក្រសួងការបរទេស និងជាអ្នកនាំពាក្យកិច្ចប្រជុំកំពូលអាស៊ានរំពឹងថា ការបង្កើនទំនាក់ទំនងអាស៊ាន-អាមេរិក​ឲ្យទៅដល់កម្រិតគ្រប់ជ្រុងជ្រោយរំពឹងថានឹងប្រព្រឹត្តទៅតាមផែនការ ខណៈសក្ដានុពលនៃទំនាក់ទំនងអាមេរិក-អាស៊ានគឺមានវិសាលភាពធំធេងណាស់ទាំងផ្នែកសេដ្ឋកិច្ច សង្គម នយោបាយ។

បើតាមមន្ត្រីជាន់ខ្ពស់រូបនេះអះអាងថា ការបង្កើនទំនាក់ទំនងមួយនេះនឹងនាំទៅដល់ការស្វែងរកនូវការសហការថ្មីៗបន្ថែមទៀតដូចដែលរូបលោកបានលើកឡើងគឺរដ្ឋមន្ត្រីអាស៊ាន​ និងរដ្ឋមន្ត្រីសហរដ្ឋអាមេរិកនឹងជួបជជែកគ្នាជាលើកដំបូងពាក់ព័ន្ធនឹងបញ្ហាបម្រែបម្រួលអាកាសធាតុ និងបរិស្ថានជាដើមទាំងអស់នេះគឺជាលទ្ធផលនៃការបង្កើនទំនាក់ទំនង ឬក៏លើកកម្ពស់ទំនាក់ទំនងឲ្យទៅជាដៃគូសន្ទនាយុទ្ធសាស្តគ្រប់ជ្រុងជ្រោយ ហើយក៏ជាសមិទ្ធិផលមួយដែលកើតមានឡើង​ចំពេលដែលកម្ពុជាធ្វើជាប្រធានអាស៊ានក្នុងឆ្នាំនេះផងដែរ៕

អត្ថបទ៖ ឡេង ដេត