ពីវេទិកាចែកសញ្ញាបត្រ ជូននិស្សិត​សាកលវិទ្យាល័យបៀលប្រាយជាង ៤ពាន់នាក់ នៅព្រឹកថ្ងៃទី ១៦ ខែមីនានេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា យុទ្ធនាការបង្ខូចកេរ្តិ៍ឈ្មោះកម្ពុជា តាមរយៈកំពង់ផែរាមកំពុងបានចាប់ផ្ដើមឡើងវិញ ហើយសម្ដេចបានផ្ញើសារដល់ជនបរទេសទាំងឡាយថា មិនចំាបាច់ថតរូបភាពតាមរយៈផ្កាយរណប អំពីការសាងសង់កំពង់ផែរាមរបស់កម្ពុជា នោះទេ។

សម្ដេចតេជោ ហ៊ុន សែន ថ្លែងបែបនេះថា «ខ្ញុំជូនសារទៅអ្នកទាំងឡាយ មិនចាំបាច់ថតពីផ្កាយរណបអីទេ មិនចាំបាច់ថតទេ កម្ពុជាបានប្រកាសហើយតើ ទៅបើកការដ្ឋាន សម្ដេចពិជ័យសេនា ទៀ បាញ់ ទៅបើកការដ្ឋានតើ ​ហើយថាបើកការដ្ឋានហើយ គេធ្វើហើយកុំខ្វល់ពេក ម៉េចក៏ចាំបាច់ថា អាហ្នឹងជាព័ត៌មានចារកម្ម បើគេបើកចំហហើយ ចាំបាច់ទៅស្អី លើកលែងតែអ្នកឯងចង់រករឿងខ្ញុំ»។

សម្ដេចតេជោ ហ៊ុន សែន លើកឡើងថា​ ទឹកដីនេះជារបស់កម្ពុជា ដូច្នេះកម្ពុជា មានសិទ្ធិពង្រឹងសមត្ថភាពកងទ័ពជើងទឹករបស់ខ្លួន៕