សម្ដេចតេជោ ហ៊ុន សែន បញ្ជាដាច់ណាត់មិនឲ្យមានការយកប្រាក់ពីប្រជាជន ដែលចូលទៅខេត្តកែបនោះទេ

ក្រោយទទួលបានព័ត៌មានភ្លាមៗ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាទៅអភិបាលខេត្តកែបលោក សោម ពិសិដ្ឋ ត្រូវធ្វើការជាមួយក្រសួង-ស្ថាប័នពាក់ព័ន្ធ លុបចោលទាំងអស់នូវកិច្ចសន្យាដែលមានលក្ខណៈជាការយកប្រាក់ សម្រាប់ការចូលទៅខេត្តកែប។  

តាមរយៈសារជាសំឡេង នៅព្រឹកថ្ងៃទី ១៥ ខែមេសា ឆ្នាំ ២០២៣នេះ សម្ដេចតេជោ ហ៊ុន សែន បានមានប្រសាសន៍ថា សម្ដេច ទើបតែនឹងដឹងនៅថ្ងៃនេះទេថា អ្នកដែលឆ្លងកាត់ខេត្តកែប ត្រូវបង់ប្រាក់។ សម្ដេច មិននឹកស្មានថា មានករណីនេះកើតឡើងឡើយ ហើយសម្ដេច បានបញ្ជាទៅអភិបាលខេត្តកែប ត្រូវធ្វើការងារជាមួយក្រសួងសេដ្ឋកិច្ច និងហិរញ្ញវត្ថុ ព្រមទាំងស្ថាប័នពាក់ព័ន្ធ លុបចោលទាំងស្រុងនូវកិច្ចសន្យាណាក៏ដោយ ដែលមានលក្ខណៈជាការយកប្រាក់ សម្រាប់ការចូលទៅខេត្តកែប ឬហៅថា ភាស៊ីនោះ។

សម្ដេចតេជោ ហ៊ុន សែន មានប្រសាសន៍បន្តថា «វាមិនមែនជារឿងគួរ ជារឿងវៃឆ្លាតទេ តែជាអំពើឆោតល្ងង់មួយ សម្រាប់ខេត្តកែបខ្លួនឯង ហើយវាក៏ជាអំពើឆោតល្ងង់នៃស្ថាប័ន ដែលអនុញ្ញាតឲ្យធ្វើបែបនេះ»។

សម្ដេចតេជោ ហ៊ុន សែន បានបញ្ជាដាច់ណាត់មិនឲ្យមានការយកប្រាក់ពីប្រជាជន ដែលចូលទៅខេត្តកែបនោះទេ។ «បើសិនជាលោកឯង យកប្រជាជនទៅលេងនៅកន្លែងនោះ លោកឯងនឹងចំណេញច្រើនជាង ខ្ញុំមិននឹកស្មានថា អភិបាលខេត្តល្ងង់ដល់ថ្នាក់ប៉ុណ្ណឹងទេ»។ នេះជាការលើកឡើងរបស់សម្ដេចតេជោ ហ៊ុន សែន៕