សម្ដេចតេជោ អះអាងថា ក្នុងដំណាក់កាលគ្រប់គ្រងប្រទេស សម្ដេចបាននិងកំពុងខិតខំអភិវឌ្ឍន៍វិស័យអប់រំឲ្យដល់មូលដ្ឋាន  

សម្ដេចតេជោ ហ៊ុន សែន​ នាយករដ្ឋមន្ត្រីនៃកម្ពុជា បានអះអាងថា ក្នុងដំណាក់កាលដែលសម្ដេចមានលទ្ធភាពគ្រប់គ្រងប្រទេស សម្ដេចបាននិងកំពុងខិតខំអភិវឌ្ឍន៍វិស័យអប់រំឲ្យដល់មូលដ្ឋាន។

ការអះអាងរបស់សម្ដេចតេជោ ហ៊ុន សែន បានធ្វើឡើងក្នុងពិធីប្រគល់សញ្ញាបត្រជូនគរុសិស្ស គរុនិស្សិត និស្សិត និងបុគ្គលិកអប់រំជាង ២ពាន់នាក់ នៃវិទ្យាស្ថានជាតិអប់រំ (NIE) នាព្រឹកថ្ងៃទី ២៥ ខែមេសា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា រឿងអតីតកាលវាបានកន្លងហួសទៅហើយ តែវាបានផ្ដល់មេរៀនច្រើនណាស់សម្រាប់ទាំងអស់គ្នា ដើម្បីឈានទៅមុខទាំងអស់គ្នាដែរ។ «ពង្រឹងនូវសមត្ថភាព ធនធានមនុស្សរបស់កម្ពុជា កុំឲ្យកម្ពុជា​អភ័ព្វ​ដូចខ្ញុំកាលពីកុមារ ដែលត្រឹមតែអាយុ ១៣ឆ្នាំតែប៉ុណ្ណោះ គឺបែកពីឪពុក-ម្ដាយ ដែលជារឿងកំសត់ៗ»។ នេះជាការលើកឡើងរបស់សម្ដេចតេជោ ហ៊ុន សែន។

សម្ដេចតេជោ ហ៊ុន សែន អះអាងថា ក្នុងដំណាក់កាលដែលសម្ដេចគ្រប់គ្រងប្រទេសកម្ពុជា សម្ដេចបាននិងកំពុងខិតខំអភិវឌ្ឍន៍វិស័យអប់រំឲ្យដល់មូលដ្ឋាន ជាមួយនឹងហេដ្ឋារចនាសម្ព័ន្ធនានាជាច្រើន។

សម្ដេចតេជោ ហ៊ុន សែន ថ្លែងបែបនេះថា «អញ្ចឹងទេ បានជាដំណាក់កាលដែលខ្ញុំមានលទ្ធភាពគ្រប់​គ្រងប្រទេស ខ្ញុំខិតខំធ្វើផ្នែកវិស័យអប់រំឲ្យដល់មូលដ្ឋាន ជាមួយហេដ្ឋារចនាសម្ព័ន្ធតភ្ជាប់ ដើម្បីឲ្យកូនសិស្សងាយទៅកាន់សាលារៀនដោយមានផ្លូវល្អ និងសុវត្ថិភាព»។

បើតាមសម្ដេចតេជោ ហ៊ុន សែន នេះគឺជាក្របខណ្ឌគោលនយោបាយបែងចែកផ្លែផ្កា នៃកំណើនសេដ្ឋកិច្ចប្រកបដោយសមធម៌៕

អត្ថបទ៖ ឃួន សុភ័ក្រ