សម្ដេចតេជោ មានជំនឿជាក់លាក់ថា កម្ពុជានឹងចាកចេញពីប្រទេសអភិវឌ្ឍន៍តិចតួចនៅឆ្នាំ ២០២៧ យ៉ាងយូរបំផុត

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា សម្ដេចមានជំនឿជាក់លាក់ថា កម្ពុជានឹងចាកចេញពីប្រទេសអភិវឌ្ឍន៍តិចតួចនៅឆ្នាំ ២០២៧ យ៉ាងយូរបំផុត។

ការថ្លែងរបស់សម្ដេចតេជោ ហ៊ុន សែន បានធ្វើឡើងក្នុងពិធីប្រគល់សញ្ញាបត្រជូននិស្សិតបញ្ចប់​ការ​សិក្សា ពីសាក​លវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ចជិត ៦ពាន់នាក់ នាព្រឹកថ្ងៃទី ៥ ខែមិថុនា ឆ្នាំ ២០២៣នេះ។   

សម្ដេចតេជោ ហ៊ុន សែន បានថ្លែងថា បើទោះបីជាមានបញ្ហាប្រឈម ទាក់ទងទៅនឹងបញ្ហាបម្រែបម្រួលអាកាសធាតុ, ជំងឺរាតត្បាត និងភាពមិនច្បាស់លាស់នៃភូមិសាស្រ្ដនយោបាយយ៉ាងណាក៏ដោយ ក៏សម្ដេច មានជំនឿនៅក្នុងចិត្តថា កម្ពុជានឹងចាកចេញពីប្រទេសអភិវឌ្ឍន៍តិចតួចនៅឆ្នាំ ២០២៧ យ៉ាងយូរបំផុត។ បន្ទាប់មក កម្ពុជានឹងដើរដល់គោលដៅបង្កើនប្រាក់ចំណូលមធ្យមកម្រិតខ្ពស់នៅឆ្នាំ ២០៣០។

សម្ដេចតេជោ ហ៊ុន សែន​ ថ្លែងបែបនេះថា «ប៉ុន្តែយ៉ាងណាក៏ដោយ បើទោះបីមានបញ្ហាប្រឈមផ្នែកទាក់ទិនជាមួយនឹងបញ្ហាការប្រែប្រួលអាកាសធាតុ ជំងឺរាតត្បាត និងភាពមិនច្បាស់លាស់នៃភូមិសាស្រ្ដនយោបាយ តែខ្ញុំមានជំនឿក្នុងចិត្ត ហើយជំនឿជាក់លាក់ទៀតផង នៅត្រង់ថា កម្ពុជានឹងចាកចេញពីប្រទេសអភិវឌ្ឍន៍តិចតួចនៅក្នុងឆ្នាំ ២០២៧យ៉ាងយូរបំផុត ហើយបន្តទៅយើងនឹងដើរដល់គោលដៅនៃការបង្កើនប្រាក់ចំណូលមធ្យមកម្រិតខ្ពស់ នៅក្នុងឆ្នាំ ២០៣០ ដូចអ្វីដែលដាក់ចេញជាគោលដៅនៃការអភិវឌ្ឍប្រកបចីរភាព»។

បើតាមសម្ដេចតេជោ ហ៊ុន សែន កំណើនសេដ្ឋកិច្ចដែលកម្ពុជាបាននិងកំពុងមានសព្វថ្ងៃនេះ ផ្ដល់ឱកាសឲ្យកម្ពុជាឈានទៅសម្រេចគោលដៅខាងលើនេះ៕